ဘၣ်ဟံအၣ် (Baheer) ဒီး မဲးဒၢး (Medet) တၢ်ဒီတံၤသကိးအဂ့ၤကတၢၢ်ခံဂၤန့ၣ် ဒိၣ်ထီၣ်သကိးဒ်သိးသိး, ဒီးအိၣ်ဆိးဝဲလၢ အ့ရှၢၣ် လီၢ်ခၢၣ်သး (Central Asia) န့ၣ်လီၤ. ဘၣ်ဆၣ်, ဖဲဘၣ်ဟံအၣ် ကဲထီၣ် ပှၤလၢအစူၢ်က့ၤနာ်က့ၤ ကစၢ်ယ့ၣ်ရှူးန့ၣ်ဒီး, တၢ်ခဲလၢာ်ဆီတလဲကွံာ်အသးန့ၣ်လီၤ. မဲးဒၢး ဆှၢထီၣ်ဝဲ ဘၣ်ဟံအၣ်အဂ့ၢ်ဆူ ပဒိၣ်ပပှၤတဖၣ် အအိၣ်ဝံၤအလီၢ်ခံန့ၣ်, ဘၣ်ဟံအၣ် တူၢ်ဘၣ်ခီၣ်ဘၣ် တၢ်မၤအၢမၤနး, နးနးကျံးကျံးန့ၣ်လီၤ. ပှၤခိးတၢ်ဖိတဂၤ လၢတၢ်သးဒိၣ်အပူၤ ကညီၤထီၣ်ဝဲ, ဒီးစံးဝဲဒၣ်, “နထးခိၣ်န့ၣ် တမ့ၢ်လၢကကစံးကတိၤထီၣ် ကစၢ်ယ့ၣ်ရှူးအမံၤနီတဘျီလၢၤဘၣ်”န့ၣ်လီၤ. လၢတၢ်သွံၣ်တၢ်စီၤအပူၤ ဘၣ်ဟံအၣ် ဂုာ်ကျဲးစၢးတဲဖျါထီၣ်ဒံးဝဲလၢ ဒ်သိးယသုတစံးကတိၤကစၢ်ခရံာ်အဂ့ၢ်န့ၣ် အဝဲသ့ၣ် တြီဃာ်အီၤ ကန့ၢ်သ့ၣ်သ့ၣ်, ဘၣ်ဆၣ် “တၢ်လၢခရံာ်မၤတ့ၢ်လၢယသးအပူၤန့ၣ် အဝဲသ့ၣ် ဆီတလဲကွံာ်ဝဲ တန့ၢ်နီတဘျီဘၣ်” န့ၣ်လီၤ.
တၢ်ကတိၤတဖၣ်အံၤ အိၣ်ဆိးတ့ၢ်ဝဲလၢ မဲးဒၢး အသးကံၢ်ပူၤန့ၣ်လီၤ. စှၤလါပူၤကွံာ်ဝံၤအလီၢ်ခံ, မဲးဒၢး တူၢ်ဘၣ်တၢ်ဆါ, ဒီးအတၢ်မုၢ်လၢ်တအိၣ်လၢၤဘၣ်အဃိ, လဲၤဃုဝဲ အတံၤသကိး ဘၣ်ဟံအၣ် လၢအထူၣ်ဖျဲးထီၣ်လံလၢ ဃိာ်ပူၤန့ၣ်လီၤ. မဲးဒၢး ဃၣ်ဃီၤကွံာ်လၢ အတၢ်ပာ်ထီၣ်ထီအသး, ဒီးဃ့ကညး အတံၤသကိးလၢ အကဒုးသ့ၣ်ညါအီၤ ကစၢ်ယ့ၣ်ရှူးအဂ့ၢ်န့ၣ်လီၤ.
မဲးဒၢး မၤဝဲဒ်သးစီဆှံ အတၢ်သိၣ်ဃီၣ်အီၤ, ဒ်အဖျါဝဲဒၣ်လၢ မၤတၢ် ၂:၃၇ အပူၤအသိး, ဖဲဘူၣ်ယဲၢ်ဆံအမုၢ်နံၤန့ၣ် ပှၤဟဲပာ်ဖှိၣ်ထီၣ်အသးလၢ စီၤပ့းတရူးအဃၢၤတဖၣ် “အသးဘၣ်ဆဲး,” ဖဲအဝဲသ့ၣ်ထံၣ်ဘၣ်ကစၢ်ယွၤ လူလီၤဂၢ်လီၤ အတၢ်ဘျုးတၢ်ဖှိၣ်, ဒီးနၢ်ဟူဝဲ စီၤပ့းတရူး အုၣ်အသးလၢ ကစၢ်ခရံာ်အဂ့ၢ်န့ၣ်လီၤ. စီၤပ့းတရူး စံးဘၣ်ပှၤဂီၢ်မုၢ်တဖၣ်လၢ ကသ့ၣ်နီၣ်ပီၢ်ယၢ်လီၤက့ၤအသး, ဒီးဒိးစူၢ် ဒိးဘျၢအသးလၢကစၢ်ယ့ၣ်ရှူးအမံၤ, ဒီးပှၤအဂၤသၢကထိ ဒိးစူၢ်ဒိးဘျၢအသးန့ၣ်လီၤ. ဒ်အဝဲသ့ၣ် ပာ်တ့ၢ်ကွံာ် အတၢ်အိၣ်မူလၢအပူၤကွံာ်အသိးန့ၣ်, မဲးဒၢးစ့ၢ်ကီး ပီၢ်ယၢ်လီၤက့ၤအသး, ဒီးပိာ်တၢ်အုၣ်က့ၤခီၣ်က့ၤကစၢ်အခံန့ၣ်လီၤ.
တၢ်အိၣ်မူအသီလၢ ကစၢ်ယ့ၣ်ရှူးအပူၤန့ၣ် မ့ၢ်တၢ်ဟ့ၣ်တမံၤ, ဒီးကယဲၢ် ပှၤတဂၤလၢ်လၢ် လၢအစူၢ်အီၤနာ်အီၤတဖၣ် ဒိးန့ၢ်သ့ဝဲဒၣ်န့ၣ်လီၤ. ဖဲပစူၢ်က့ၤနာ်က့ၤကစၢ်ယ့ၣ်ရှူးန့ၣ်ဒီး, ပမ့ၢ်မၤတ့ၢ်တၢ်မနုၤဂ့ၤမနုၤဂ့ၤ, ပမုာ်လၤသးခုလၢတၢ်ပျၢ်ပတၢ်ဒဲးဘးသ့ဝဲဒၣ်န့ၣ်လီၤ.
