ဒ်အမ့ၢ်ဝဲထဲဒၣ် ပှၤနီၣ်သိလ့ၣ် ဒိးလဲတၢ်တဂၤအသိး, စတဲန်လ့ၣ် (Stanley) အိၣ်ဒီးတၢ်သဘျ့, ဒီးဒ်အသးအိၣ်ဝဲအသိး မၤဘၣ်တၢ်ဘီၣ်ဘီၣ်ညီညီသ့အဃိ, အသူၣ်မံ အသးမုာ်ဝဲလၢ တၢ်မၤအံၤန့ၣ်လီၤ. လၢတၢ်အဂုၤအဂၤတဖၣ်အကျါ, အဝဲအဲၣ်ဒိး စးထီၣ်မၤ, ဒီးအဲၣ်ဒိးဆိကတီၢ် အတၢ်မၤသ့ဝဲ ဖဲတၢ်ဆၢကတီၢ်တဘျီလၢ်လၢ်န့ၣ်လီၤ. ဒီးတလိၣ်ပာ်ဖျါထီၣ် အတၢ်ဆၢကတီၢ်, ဒီးအတၢ်ဟူးတၢ်ဂဲၤတဖၣ်ဆူ, မတၤတဂၤမးအအိၣ်န့ၣ်ဘၣ်. နီၢ်နီၢ်န့ၣ်, အဝဲစံးဝဲလၢ တၢ်အံၤမ့ၢ်တၢ်အကီကတၢၢ်တမံၤန့ၣ်လီၤ.
စတဲန်လ့ၣ် အၢၣ်လီၤတီတီလိၤလိၤ, ဒီးစံးဝဲ “လၢတၢ်မၤအံၤန့ၣ်, တၢ်အဲၣ်ဘၢမါ, အဲၣ်ဘၢဝၤ ကစးထီၣ်မၤအသးအဂီၢ်, ညီဒိၣ်မး” န့ၣ်လီၤ. ယဘၣ်နီၣ်ဆှၢ ပှၤလဲၤတၢ်က့ၤတၢ်ဖိတဖၣ်အိၣ်ဝဲ အကလုာ်ကလုာ်, ဘၣ်ဆၣ် တနံၤတနံၤအတီၢ်ပူၤ ယအိၣ် ဖဲလဲၣ်န့ၣ်, ပှၤနီတဂၤမး, ပာ်ဃုာ်ဒီးယမါန့ၣ် တသ့ၣ်ညါဝဲဘၣ်.” အဝဲစံးဝဲဒၣ်လၢ တမ့ၢ်တၢ်လ့ပစီအဘီၣ်အညီတမံၤ, လၢတၢ်တြီဆၢကန့ၢ်အီၤဘၣ်. ဒီးအတံၤသကိး ပှၤနီၣ်သိလ့ၣ်တဖၣ်အါဂၤ ဟ့ၣ်လီၤအသးဆူ တၢ်လ့ပစီတမံၤအံၤန့ၣ်လီၤ. “ဒ်သိးယသုတလီၤဘၣ်လၢတၢ်လ့ပစီအံၤအဂီၢ် တၢ်လၢအတြီဃာ်ယၤန့ၣ် မ့ၢ်တၢ်ကွၢ်ထံ ဆိကမိၣ် ကစၢ်ယွၤကထံၣ်ဝဲဒ်လဲၣ်, ဒီးယမါသးဘိန့ၣ် အသးကဘၣ်ဒိဘၣ်ထံးဒ်လဲၣ်” န့ၣ်လီၤ.
ပတၢ်ဂံၢ်စၢ်ဘါစၢ်, ပတၢ်သးလီဆၢန့ၢ်တၢ်တဖၣ်, ဒီးတၢ်လ့ပစီ ကလီၤဘၣ်ပှၤ ညီထဲလဲၣ်န့ၣ် ပကစၢ်ယွၤ, လၢအတ့လီၤပဝဲတဂၤစုာ်စုာ်န့ၣ် သ့ၣ်ညါဝဲဒၣ်န့ၣ်လီၤ. ဘၣ်ဆၣ်, ဒ် ၁ ကရံၣ် ၁၀:၁၁-၁၃ ဒုးသ့ၣ်နီၣ်ထီၣ်က့ၤပှၤအသိး, ပဃ့တၢ်မၤစၢၤလၢ ယွၤအအိၣ်သ့ဝဲဒၣ်န့ၣ်လီၤ. ဖဲအဆၢဖိ ၁၃ န့ၣ် စီၤပီလူးစံးဝဲ “ယွၤမၤဝဲအကလုၢ်တီသတးဒီး, တၢ်လ့ပစီလၢအဆူၣ်ကဲၣ်ဆိး, လၢသုဒိးတကဲဘၣ်န့ၣ်, တဒုးဒိးဘၣ်သုဘၣ်. မ့မ့ၢ်လၢတၢ်လ့ပစီအပူၤ, ကမၤထီၣ်ကျဲ ဒ်သိးသုကပူၤဖျဲးလၢအီၤ” န့ၣ်လီၤ. “ကျဲပူၤဖျဲး” အံၤန့ၣ် ကမ့ၢ်သ့ၣ်သ့ၣ် သးလၢအပျံၤ တၢ်အစၢလၢကပိာ်ထွဲထီၣ်အခံတဖၣ်, သးခီၣ်ရှ့ၣ်လၢအသ့ၣ်ညါ ပမၤကမၣ်တၢ်, တၢ်သ့ၣ်နီၣ်ထီၣ်က့ၤ ကစၢ်ယွၤအကလုၢ်အကထါ, တၢ်လၢအထုးကွံာ် ပတၢ်သးစၢၢ်ဆၢတဖၣ် ဘၣ်ဆၢဘၣ်ကတီၢ်, မ့တမ့ၢ် တၢ်အဂုၤအဂၤတမံၤမံၤန့ၣ်လီၤ. ဖဲပဃ့န့ၢ် တၢ်ဂံၢ်တၢ်ဘါလၢကစၢ်ယွၤန့ၣ်ဒီး, ဒ်သိးပကဃၣ်ကဒါကွံာ်ပသးလၢ တၢ်လ့ပစီတဖၣ်, ဒီးပကကွၢ်ဃီၤဆူ ကျဲပူၤဖျဲးလၢ ကစၢ်ယွၤဟ့ၣ်လီၤပှၤအဂီၢ်န့ၣ် သးစီဆှံ ကမၤစၢၤပှၤန့ၣ်လီၤ.
