ဖဲလၢပတၢ်အိၣ်ဖှိၣ် သဂၢၢ်မၤလၤကပီၤ ခရံာ်အိၣ်ဖျဲၣ်ဟါတၢ်အီၣ်အကတီၢ်န့ၣ် ပၣ်ဃုာ်ဒီးတၢ်ဒုးနဲၣ်ပှၤသမှံၤသပျီၤလၢဟီၣ်ခိၣ်ဒီဘ့ၣ်တဖၣ် အတၢ်ဆဲးတၢ်လၤ, ဒီးဖဲပှၤဒ့တၢ်အူတၢ်ဖိတဖၣ် ဒ့ထီၣ်ဝဲမုၢ်ထီၣ်လီၢ်ခၢၣ်သးလုၢ်လၢ်ထူသနူ ခရံာ်အိၣ်ဖျဲၣ် အတၢ်သးဝံၣ် (Laylat Al-Milad) န့ၣ်ဒီး, ဒ် “ဒၣ်ဘူၣ်ကၤ” darbuka (တၢ်ပှီၢ်ဒၢတကလုာ်) ဒီး “အီး” oud (သံကျံပိးလီလၢ အလီၤဂာ်ဒီးကံၢ်ထါ) သီၣ်အကလုၢ်အသိး, လၢတၢ်သးခုအပူၤ, ယဒဲပိာ်ထွဲယစုန့ၣ်လီၤ. ပှၤတဖုအံၤ အပှၤသးဝံၣ်တၢ်ဖိတဲနၢ်ပၢၢ် တၢ်သးဝံၣ် အခိၣ်တီအခီပညီန့ၣ် မ့ၢ်ဝဲ “မုၢ်နၤလၢကစၢ်ယ့ၣ်ရှူးခရံာ် အိၣ်ဖျဲၣ်ထီၣ်” (Nativity Night) န့ၣ်လီၤ. ထါသးဝံၣ်အလံာ်မဲာ်ဖျၢၣ်တဖၣ်န့ၣ် ဒုးသ့ၣ်နီၣ်ထီၣ်က့ၤ ပှၤဒိကနၣ်တၢ်ဖိတဖၣ်လၢ ခရံာ်အိၣ်ဖျဲၣ်အသးစံးတၢ်န့ၣ် မ့ၢ်တၢ်လၢပထံၣ်န့ၢ်ဘၣ်အီၤလၢ တၢ်မၤဂ့ၤမၤစၢၤတၢ်လၢပှၤဂၤအဂီၢ်, ခီဖျိလၢကျိၤကျဲတဖၣ်, ဒ်အမ့ၢ် ပှၤလၢတၢ်သူအသးလၢထံန့ၣ် တၢ်ဟ့ၣ်ဒုးအီအီၤလၢထံ, မ့တမ့ၢ် တၢ်မၤမုာ်ထီၣ်က့ၤ ပှၤလၢအသူၣ်အုးသးအုးတဂၤဂၤန့ၣ်လီၤ.

ဖျါလၢ ခရံာ်အိၣ်ဖျဲၣ်အတၢ်သးဝံၣ်ဖိအံၤ ဘၣ်တၢ်ဟံးန့ၢ်ကွဲးအီၤလၢ ပူဟ့ၣ်ဒိတယုၢ်, ပကထံၣ်ဘၣ်လၢ မး ၂၅:၃၄-၃၆ အပူၤ, ဖဲကစၢ်ယ့ၣ်ရှူး စံးကတိၤပတြၢၤ အပျဲၢ်အဘီၣ်တဖၣ်လၢ တၢ်လၢအပျဲၢ်အဘီၣ်တဖၣ်မၤတ့ၢ်ဝဲလၢအဂီၢ်- “တၢ်သၣ်ဝံၤယသး, ဒီးသုဟ့ၣ်အီၣ်ယၤလီၤ. တၢ်သုယသးလၢထံ, ဒီးသုဒုးအီယၤလီၤ… ယဆူးယဆါ, ဒီးသုအိၣ်သကိးယၤလီၤ. ယအိၣ်လၢဃိာ်ပူၤ, ဒီးသုဟဲဆူယအိၣ်” န့ၣ်လီၤ. ကစၢ်ယ့ၣ်ရှူး စံးကတိၤပတြၢၤတၢ်န့ၣ် ပှၤလၢပူဟ့ၣ်ဒိအပူၤတဖၣ် ကဘၣ်တူၢ်လိာ်ဝဲအလီၢ်န့ၣ်, ကဲထီၣ်တၢ်ကမၢကမၣ်လၢ အဝဲသ့ၣ်အဂီၢ်န့ၣ်လီၤ. ကစၢ်ခရံာ်အဂီၢ် အဝဲသ့ၣ်ဆိကမိၣ်ဝဲဒၣ်လၢ အတမၤတ့ၢ်ဘၣ်တၢ်နီၤတမံၤဘၣ်အဃိန့ၣ်လီၤ. ကစၢ်ယ့ၣ်ရှူး စံးဆၢဝဲ, ဖဲအဆၢဖိ ၄၀ န့ၣ် “မ့ၢ်သုမၤပှၤအဆံးကတၢၢ်တဂၤ လၢယဒီပုၢ်ဝဲၢ်အကျါအံၤဒီး, မ့ၢ်သုမၤယၤ” န့ၣ်လီၤ.

နံၤသဘျ့အကတီၢ်အံၤအပူၤန့ၣ်, တၢ်ဟ့ၣ်ဂံၢ်ဟ့ၣ်ဘါလၢ ပကအိၣ်ဒီး ခရံာ်အိၣ်ဖျဲၣ်အသးအဂီၢ်န့ၣ် မ့ၢ်တၢ်ဟ့ၣ်ပလီၢ် ပတၢ်ပာ်သူၣ်ပာ်သး ဘၣ်ထွဲဒီးတၢ်မၤ တၢ်သူၣ်ခုသးခု, တၢ်သူၣ်ဖှံသးညီ အမူးပွဲတဖၣ်န့ၣ်လီၤ. တၢ်သးဝံၣ် “Laylat Al- Milad” မၤသ့ၣ်နီၣ်ထီၣ်က့ၤပှၤလၢ ပကဒုးအိၣ်ထီၣ် ခရံာ်အိၣ်ဖျဲၣ်အသးနီၢ်နီၢ်, ခီဖျိ တၢ်ကွၢ်ထွဲမၤစၢၤပှၤဂၤတဖၣ်န့ၣ်လီၤ. လၢတၢ်လီၤကမၢကမၣ်အပူၤ, ဖဲပမၤတၢ်ဒ်သိးအံၤန့ၣ်ဒီး, တမ့ၢ်ထဲ ပမၤပှၤဂၤပှၤဂၤအဂီၢ်ဘၣ်. မ့ၢ်စ့ၢ်ကီး ပမၤတၢ်လၢကစၢ်ယ့ၣ်ရှူးအဂီၢ်န့ၣ်လီၤ.