ဖဲယသးစၢ်အကတီၢ်, ဒ်ယမ့ၢ်ယဲပှၤစူၢ်က့ၤနာ်က့ၤ ကစၢ်ယ့ၣ်ရှူးတဂၤအသိး, ယဟံးထီၣ် ယလံာ်စီဆှံအသီတဘ့ၣ်, လၢတၢ်ဘူၣ်တၢ်ဘါအဂီၢ်, ဒီးယဖး မး ၇:၇, လံာ်စီဆှံအဆၢလၢ ပညီနုၢ်ဖးအီၤ- “ ဃ့တၢ်တက့ၢ်, ဒီးတၢ်ကဟ့ၣ်သုလီၤ” န့ၣ်လီၤ. လံာ်ပာ်ဖျါထီၣ် တၢ်အခီပညီလၢပကြၢးဃ့တၢ်နီၢ်နီၢ် လၢကစၢ်ယွၤန့ၣ် ကဘၣ်မ့ၢ်ဝဲဒၣ် ပတၢ်ဘၣ်သးတဖၣ် ဒ်သိးကလီၤပလိာ်အသးဒီး ကစၢ်ယွၤအတၢ်ဘၣ်အသးအဂီၢ်န့ၣ်လီၤ. ခီဖျိလၢပဃုထံၣ်န့ၢ်တၢ်မၤလၢပှဲၤ ကစၢ်ယွၤအတၢ်ဘၣ်သးအဃိဒီး, ပဃ့တၢ်လၢ ယွၤန့ၣ် ပကဒိးန့ၢ်ဝဲသပှၢ်တၢၢ်န့ၣ်လီၤ. လၢယဂီၢ်, တၢ်အံၤမ့ၢ်တၢ်ထံၣ်ဆိကမိၣ် အသီတမံၤအဃိ, ယဃ့ထုကဖၣ်ယဲ, တၢ်ကမၤအသးလၢယတၢ်အိၣ်မူအပူၤ ဒ်တၢ်ဘၣ်ကစၢ်ယွၤအသးအသိးန့ၣ်လီၤ.
တၢ်လၢမုၢ်တနံၤအံၤန့ၣ်ဝံၤအလီၢ်ခံ, ယသူၣ်ပိၢ်သးဝးထီၣ်ယဲလၢ တၢ်လီၤကမၢကမၣ်အပူၤ, ဘၣ်ထွဲဒီးတၢ်ဖံးတၢ်မၤခွဲးယာ်လၢ ယညိကွံာ်အီၤ, ဒီးဒုးသ့ၣ်နီၣ်ထီၣ်က့ၤယၤ တၢ်လၢ ယဃ့ထုကဖၣ်န့ၣ်လီၤ. ယဆိကမိၣ် တၢ်လၢတဘၣ်ယသးတမံၤန့ၣ် ဘၣ်သ့ၣ်သ့ၣ် ကမ့ၢ်တၢ်မၤလၢအဘၣ်ယွၤအသး လၢယတၢ်အိၣ်မူအဂီၢ်နီၢ်နီၢ်န့ၣ်လီၤ. ယဃ့ထုကဖၣ်ယဲဆူညါ, ဒီးအကတၢၢ်န့ၣ် ယတူၢ်လိာ်တၢ်ဖံးတၢ်မၤအံၤန့ၣ်လီၤ.
တၢ်မၤအသး, အိၣ်ဒီးအခီပညီအဒိၣ်အယိာ်, ဒီးအကါဒိၣ်ဝဲ လီၤထူလီၤယိာ်အကတီၢ်, ကစၢ်ယ့ၣ်ရှူး အိၣ်မူဟ့ၣ်ဒိပှၤန့ၣ်လီၤ. လူၤ ၂၂:၄၂ အပူၤန့ၣ် တချုးလၢအဝဲဘၣ်တၢ်ဆါလီၤကွံာ်အီၤ, ဒီးတၢ်ဖီၣ်အီၤ, ဒီးတုၤဒၣ်လဲာ် တၢ်မၤသံအီၤလၢ ထူၣ်စုညါအလိၤန့ၣ်, ကစၢ်ယ့ၣ်ရှူး ဃ့ထုကဖၣ်ဝဲလၢ “ပၢ်ဧၢ,မ့ၢ်ဘၣ်နသးဒီး, တၢ်လၢလီခီအံၤ, မ်အလဲၤပူၤကွံာ် လၢယၤတက့ၢ်. ဘၣ်ဆၣ်ဒီး ဖဲယသးဒၣ်ယဲတမ့ၢ်ဘၣ်, မ့ၢ်ဖဲဒၣ်နသးဒၣ်နဲတက့ၢ်” န့ၣ်လီၤ. အဆၢဖိ ၄၄ ပာ်ဖျါဝဲလၢ ကစၢ်ခရံာ် အတၢ်ထုကဖၣ်အံၤ အိၣ်ပှဲၤမးဒီး တၢ်သူၣ်ကိၢ်သးဂီၤ, ဒီးတၢ်ဘၣ်ဒိဆါနးနးကလဲာ်, ဒ်အဘၣ်ကွၢ်ဆၢၣ်မဲာ်ဒီး တၢ်နးတၢ်ဖှီၣ်လၢနီၢ်ခိဒီးနီၢ်သးအဃိန့ၣ်လီၤ. ဘၣ်ဆၣ်, “တၢ်သးတီအပူၤ” ဃ့ဘါထုကဖၣ်ဝဲလၢ ကမ့ၢ်ဖဲဒၣ်ယွၤအသးဒၣ်ဝဲအဂီၢ်န့ၣ်လီၤ.
ယတၢ်ထုကဖၣ်အကါဒိၣ်ကတၢၢ် အခိၣ်သ့ၣ်န့ၣ် မ့ၢ်ဒၣ် တၢ်ဘၣ်ကစၢ်ယွၤအသး ကလၢထီၣ်ပှဲၤထီၣ် လၢယတၢ်အိၣ်မူအပူၤန့ၣ်လီၤ. တၢ်အံၤအခီပညီမ့ၢ်ဝဲ တၢ်လၢယသးဆၢန့ၢ်ဘၣ်တဖၣ်န့ၣ်, ဘၣ်သ့ၣ်သ့ၣ် ကမ့ၢ်တၢ်လၢယအဲၣ်ဒိး, မ့တမ့ၢ် တၢ်လၢယလိၣ်ဘၣ်ယဲနီၢ်နီၢ်ဧါန့ၣ် ယတသ့ၣ်ညါလၢၤဘၣ်န့ၣ်လီၤ. လၢသီ, တၢ်ဖံးတၢ်မၤလၢ ယတအဲၣ်ဒိးမၤတ့ၢ်ဝဲန့ၣ်, ဖျါလၢယဘၣ်စးထီၣ်လဲၤ တၢ်ထုးထီၣ်ရၤလီၤ ပှၤခရံာ်ဖိအလံာ်လဲၢ်န့ၣ်လီၤ. ဖဲယကွၢ်ကဒါက့ၤတၢ်န့ၣ်, ယနာ်လၢ တၢ်ဘၣ်ယွၤအသးလၢပှဲၤဝဲဒၣ်လၢ ယတၢ်အိၣ်မူအပူၤန့ၣ်လီၤ.
