ဖဲလါနိၣ်ဝ့ဘၢၣ် ၂၂ သီ, ၁၉၆၃ နံၣ်န့ၣ်, အမဲရကၤ ကီၢ်ခိၣ် ကၠီ အဲးဖ် ခဲနဒံၣ် (John. F Kennedy), ပှၤသ့ဆိကမိၣ်တၢ်ဒီးပှၤကွဲးလံာ် အဲလ်ဒါးစ် ဟၢးစလံၣ် (Aldous Huxley), ဒီးခရံာ်အပှၤစိာ်တၢ်သးခုကစီၣ် စံၣ် အဲးစ် လူဝ့းစ် (C.S. Lewis) သ့ၣ်တဖၣ်စူးကွံာ်အသးကိးဂၤဒဲးန့ၣ်လီၤ. ပှၤမံၤဒိၣ်သၣ်ဖျါ သၢဂၤအံၤ အိၣ်ဒီးတၢ်နာ်လၢ အလီၤဆီလိာ်သးဒိၣ်မး ဘၣ်ထွဲဒီးတၢ်အိၣ်မူန့ၣ်လီၤ. ဟၢးစလံၣ် န့ၣ် မ့ၢ်ပှၤလၢအတနာ် ကစၢ်ယွၤအိၣ်တဂၤအံၤ အတၢ်မၤအါဝဲဒၣ်လၢ ကီၢ်မုၢ်ထီၣ် အတၢ်ကူၣ်သ့လၢ အလီၤဆီလီၤလးတဖၣ်အပူၤန့ၣ်လီၤ. ကီၢ်ခိၣ် ခဲနဒံၣ် မ့ၢ် ပှၤရိမ့ၤ ကဲးသလ့းဖိ (Roman Catholic)ဘၣ်ဆၣ် ဟံးဃာ်ဝဲ တၢ်ဆိကမိၣ်လၢ အပာ်ပှၤကညီ မ့ၢ်တၢ်အကါဒိၣ်န့ၣ်လီၤ. ဒီး လူဝ့းစ် တဘျီမ့ၢ်တ့ၢ်ဝဲ ပှၤလၢအတနာ်ကစၢ်ယွၤ တဂၤ, ဒီးလၢခံန့ၣ် ဒ်အမ့ၢ် ပှၤအဲန်ကလံၣ်ကၣ် ခရံာ်ဖိတဂၤအသိး(Anglican), ကဲထီၣ် ပှၤလၢအစူၢ်က့ၤနာ်က့ၤကစၢ်ယ့ၣ်ရှူး လၢၢ်လၢၢ်ဆ့ဆ့န့ၣ်လီၤ. တၢ်သံတၢ်ပှၢ်န့ၣ်တကွၢ်မဲာ် ပှၤကညီနီတဂၤဘၣ်. ဒ်ပှၤမံဟူသၣ်ဖျါသၢဂၤလိာ်အံၤ ဘၣ်ကွၢ်ဆၢၣ်မဲာ်ဒီးအဝဲသ့ၣ် အတၢ်သ့ၣ်ဆၢဖးကတီၢ်, ဒီးတၢ်သံ လၢမုၢ်တနံၤဃီအတီၢ်ပူၤန့ၣ်လီၤ.
၁ မိၤ ၃ အပူၤန့ၣ် လံာ်စီဆှံ စံးဘၣ်ပှၤ စးထီၣ်ဖဲ စီၤအၤဒၣ်ဒီးနီၢ်အံၣ်အု တဒိကနၣ် တၢ်လၢဧ့ၤဒ့ၣ်တၤသၣ်လီၢ်အပူၤန့ၣ် တၢ်သံနုာ်လီၤဆူ ပှၤကူပှၤကညီ အတၢ်အိၣ်မူအပူၤ-တၢ်မၤအသးနီၢ်နီၢ် လၢအလီၤသးအုးတမံၤ, လၢအဘၣ်တၢ်မၤပာ်ပနီၣ်အီၤလၢ ပှၤကညီ အတၢ်စံၣ်စိၤတဲစိၤအပူၤန့ၣ်လီၤ. တၢ်သံတၢ်ပှၢ် မ့ၢ်တၢ်လၢအမၤဟူမၤဖိးတၢ်လၢပှၤကညီတဖၣ် ကလဲၤခီဖျိဘၣ်ဝဲဒ်သိးသိးအဂီၢ်, မ့တမ့ၢ် ဒ်ပှၤတဂၤ ပာ်ဖျါတ့ၢ်ဝဲအသိး, တၢ်သံတၢ်ပှၢ်န့ၣ် မ့ၢ်တၢ်သ့ၣ်ဆၢဖးကတီၢ်လၢ ပှၤလဲကပာ်ပူၤဖျဲးတသ့နီတဂၤဘၣ်န့ၣ်လီၤ. တၢ်ဂ့ၢ်အံၤမ့ၢ်တၢ်တမံၤဃီ, ဖဲပဖးဘၣ်လၢ လံာ်ဧ့ၤဘြံၤ ၉:၂၇ အတၢ်ပာ်ဖျါ, “ဒ်တၢ်ပာ်ပှၤကညီလၢ အကသံဝဲတဘျီ, ဒီးလၢခံက့ၤတၢ်စံၣ်ညီၣ်အသိး” န့ၣ်လီၤ.
ဘၣ်ဃးဒီးပတၢ်သ့ၣ်ဆၢဖးဒီးတၢ်သံ, ဒီးတၢ်လၢအပိာ်ထွဲထီၣ်အခံတဖၣ်န့ၣ် မ့ၢ်ပဃုထံၣ်န့ၢ် တၢ်မုၢ်လၢ်လၢ တၢ်လီၢ်မတၤလဲၣ်. မ့ၢ်ဒၣ်လၢ ကစၢ်ယ့ၣ်ရှူးခရံာ်အပူၤန့ၣ်လီၤ. ရိမ့ၤ ၆:၂၃ န့ၣ် ဟံးဃာ် တၢ်မ့ၢ်တၢ်တီအံၤ အလၢအပှဲၤ, ဒီးပာ်ဖျါဝဲ, “အဂ့ၢ်ဒ်အံၤ, တၢ်ဒဲးဘး အဘူးအလဲ မ့ၢ်တၢ်သံလီၤ. မ့မ့ၢ်ယွၤ အတၢ်ဟ့ၣ်န့ၣ်, မ့ၢ်တၢ်မူအထူအယိာ်လၢ ပကစၢ်ယ့ၣ်ရှူးခရံာ်အဃိ” န့ၣ်လီၤ. ကစၢ်ယွၤ အတၢ်ဟ့ၣ်တမံၤအံၤ ပကဒိးန့ၢ်ဘၣ်အီၤဒ်လဲၣ်. ၂တံၤ ၁:၁၀ စံးဘၣ်ပှၤလၢ ယွၤအဖိခွါ ကစၢ်ယ့ၣ်ရှူးန့ၣ် ဒ်သိးကမၤဟးဂီၤဝဲတၢ်သံအဂီၢ် တူၢ်သံအသး, ဒီးဂဲၤဆၢထၢၣ်သမူထီၣ်က့ၤလၢတၢ်သွၣ်ခိၣ် ဒ်သိးကဟ့ၣ်ပှၤ တၢ်မူအထူအယိာ်န့ၣ်လီၤ.
