မၤ ၂၁:၂၆ ပာ်ဖျါဝဲ စီၤပီလူးလဲၤဆူ တၢ်လုၢ်ဟံၣ် ဖဲပှၤယူဒၤဖိအတၢ်မၤကဆှီထီၣ်အမူးအဂီၢ်န့ၣ်လီၤ. ဘၣ်ဆၣ် အဆၢဖိ ၃၁ စံးဘၣ်ပှၤလၢ ပှၤမၤတၢထီၣ်တၢလီၤတၢ်တဖၣ် ဆိကမိၣ်ဝဲလၢ စီၤပီလူး သိၣ်သီတၢ်တဖၣ်န့ၣ် ထီဒါတၢ်သိၣ်တၢ်သီအဃိ ဃုမၤသံအီၤန့ၣ်လီၤ. ရိမ့ၤပှၤသုးဖိတဖၣ် ဘၣ်နုာ်လီၤ, ဒီးဟံးဃာ်ဖီၣ်ဃာ် စီၤပီလူး,ဘၣ်တၢ်စၢဃာ်အီၤ, ဒီးဘၣ်တၢ်စိာ်ဟးထီၣ်အီၤလၢတၢ်လုၢ်ဟံၣ်- ဒီးအဆၢဖိ ၃၆ ပာ်ဖျါဝဲလၢ ပှၤကညီဂီၢ်မုၢ်လူၤပိာ်ထွဲထီၣ်အခံ, ဒီးကိးထီၣ်ဝဲ, “မၤသံအီၤတက့ၢ်” (ခ့ခါ) န့ၣ်လီၤ.
တၢ်မၢဖိ စီၤပီလူး ကမၤဆၢဝဲ တၢ်မၤလီၤပျံၤလီၤဖုးအီၤဒ်လဲၣ်. အဆၢဖိ ၃၉ န့ၣ် အဝဲဃ့တၢ်ပျဲလၢ သုးမုၢ်တဖုအံၤအခိၣ်, ဒ်သိး “ကစံးကတိၤတၢ်ဒီးပှၤဂီၢ်မုၢ်” ကသ့ဧၣ်န့ၣ်လီၤ. မၤ ၂၂:၁-၁၆ ပာ်ဖျါဝဲ, ဖဲရိမ့ၤအသုးခိၣ် ဟ့ၣ်အီၤတၢ်ပျဲန့ၣ်ဒီး, လၢတၢ်သွံၣ်, ဒီးတၢ်ထီၣ်လုးထီၣ်လါတဖၣ်အပူၤ, စီၤပီလူး ဃၣ်အသးဆူ ပှၤကညီဂီၢ်မုၢ်လၢအသူၣ်ဒိၣ်သးဖျိးအီၤတဖၣ်အအိၣ်, ဒီးနီၢ်ဟ့ၣ်လီၤအတၢ်စူၢ်တၢ်နာ်လၢခရံာ်အဂ့ၢ်န့ၣ်လီၤ.
တၢ်ဂ့ၢ်အံၤမ့ၢ် တၢ်လၢအပူၤကွံာ်အနံၣ် ၂၀၀၀- လံာ်စီဆှံအတၢ်ဂ့ၢ် ယံာ်တ့ၢ်လံလၢ ပကနၢ်ပၢၢ်အီၤ ကီဝဲဒၣ်န့ၣ်လီၤ. တယံာ်ဒံးဘၣ်န့ၣ်, ပှၤတဂၤအမံၤမ့ၢ် ဖံထၢၣ် (Peter) န့ၣ်, ပှၤဖီၣ်န့ၢ်အီၤ ဖဲအလဲၤဟးအိၣ်သကိး အတံၤသကိး, လၢအစူၢ်က့ၤနာ်က့ၤ ကစၢ်ယ့ၣ်ရှူးတဂၤ ဘၣ်တၢ်ဖီၣ်ဒုးဃာ်အီၤလၢဃိာ်ပူၤ, ဖဲထံကီၢ်လၢ အမၤအၢမၤနး ပှၤစူၢ်က့ၤနာ်က့ၤတၢ်တဖၣ်ထီဘိအကတီၢ်န့ၣ်လီၤ. ဖံထၢၣ် ဘၣ်တၢ်တ့ၢ်နုာ်လီၤအီၤဆူ ဃိာ်အဒၢးခံးသူတဖျၢၣ်အပူၤ, ဒီးဖဲတၢ်သံကွံာ်သံဒိးအီၤ အကတီၢ်န့ၣ် တၢ်မၤဘၢဃာ်အမဲာ်ချံန့ၣ်လီၤ. ဖဲတၢ်ထုးပျဲတၢ်မၤဘၢအမဲာ်ချံန့ၣ်ဒီး, ထံၣ်ဝဲလၢ ပှၤသုးဖိလွံၢ်ဂၤန့ၣ် ပညိၣ်အကျိတဖၣ်ဆူအအိၣ် န့ၣ်လီၤ. ဖံထၢၣ် ကမၤဆၢဝဲဒ်လဲၣ်. တၢ်မၤအသးဒီးအီၤဒ်သိးအံၤန့ၣ် ထံၣ်ဝဲဒ်အမ့ၢ် “တၢ်ခွဲးတၢ်ယာ်အဂ့ၤကတၢၢ်လၢ ကနီၤဟ့ၣ်လီၤ အတၢ်စူၢ်တၢ်နာ်န့ၣ်လီၤ.”
စီၤပီလူး, ဒီး ဖံထၢၣ် ခ့ခါအကတီၢ်အံၤ, နဲၣ်ဖျါထီၣ် တၢ်မ့ၢ်တၢ်တီလၢအကီအခဲ, ဒီးအရ့ဒိၣ်တမံၤန့ၣ်လီၤ. ကစၢ်ယွၤမ့ၢ်ဟ့ၣ်ဝဲ တၢ်ပျဲၤလၢ ပကလဲၤခီဖျိဘၣ် တၢ်ဆၢကတီၢ်အကီအခဲတဖၣ်- တၢ်မၤအၢမၤနးပှၤဒၣ်လဲာ်- မၢ် ၁၆:၁၅ စံးဘၣ်ပှၤ, ပအိၣ်ဒံးဒီးမူဒါလၢ ပကဘၣ် “စံၣ်တဲၤတဲလီၤတၢ်သးခုကစီၣ်” န့ၣ်လီၤ. ဒ်သိးဒီးပကနီၤဟ့ၣ် ပတၢ်စူၢ်တၢ်နာ်အဂီၢ်, ကစၢ်ယ့ၣ်ရှူး ကအိၣ်ဒီးပှၤ, ဒီးကဟ့ၣ်ပှၤတၢ်ကူၣ်သ့ဒီးတၢ်စိတၢ်ကမီၤန့ၣ်လီၤ.
