အါတက့ၢ်, တၢ်ဂိၢ်အကတီၢ် လၢကီၢ်နဲၣ်သၣ်လဲၣ် (Netherlands) န့ၣ် မူခိၣ်ဖီတလီၤ အါအါဂီၢ်ဂီၢ်ဘၣ်ဆၣ်, တၢ်ခုၣ်တုၤဒၣ်လဲာ် ထံကျိၤလၢပှၤခုၣ်န့ၢ်ဝဲ (canal) အပူၤန့ၣ် ထံလီၤသကၤကွံာ် သ့ဝဲဒၣ်န့ၣ်လီၤ. ဖဲလၢယဝၤ ထီ(မ) (Tom) ဒိၣ်ထီၣ်လၢ ကီၢ်တဘ့ၣ်အံၤအပူၤအကတီၢ်, အမိၢ်အပၢ် ပာ်လီၤဝဲတၢ်ဘျၢလၢ ဟံၣ်ဖိဃီဖိအဂီၢ်န့ၣ်လီၤ. “ထံလီၤသကၤ မ့ၢ်တတီၣ်ဝဲတုၤဒၣ်လဲာ် အတူၢ်န့ၢ်ကသ့ၣ်တဒု အတယၢၣ်န့ၣ်ဒီး, သုကဘၣ်အိၣ်ယံၤဒီးအီၤ” န့ၣ်လီၤ. မ့ၢ်လၢ ကသ့ၣ်တဖၣ်န့ၣ် ညီနုာ်ပာ်လီၤတ့ၢ်ဝဲ တၢ်အုၣ်အသးလၢအိၣ်ဆိးတၢ်အလီၢ်အဃိ, ထီ(မ) ဒီးအတံၤသကိးတဖၣ် ပာ်လီၤ အသးလၢ ကလဲၤဃုန့ၢ် ကသ့ၣ်အ့ၣ်တဖၣ်လၢကျဲ, ဒီးကွံာ်လီၤ ကသ့ၣ်အ့ၣ် လၢထံလီၤသကၤဘူဘူဖိအလိၤ, ဒီးလဲၤဂဲၤလိာ်ကွဲလၢထံလီၤသကၤ အမဲာ်ဖံးအဖီခိၣ်န့ၣ်လီၤ. တၢ်ဘၣ်ဒိဘၣ်ထံးတအိၣ်, ဒီးအဝဲသ့ၣ် မၤတၢ်အံၤန့ၣ် ပှၤတသ့ၣ်ညါထွဲဘၣ်ဆၣ်,အဝဲသ့ၣ် သ့ၣ်ညါလီၤအသးလၢ အဝဲသ့ၣ် တအိၣ်ဒီးတၢ်ဒိကနၣ်ဘၣ်န့ၣ်လီၤ.
တၢ်ဒိကနၣ်စံးတၢ်န့ၣ် တဟဲညီနုာ်အကစၢ်ဒၣ်ဝဲဘၣ်. တၢ်ဃုထၢ တၢ်ဒိကနၣ်, မ့တမ့ၢ် တၢ်တဒိကနၣ်န့ၣ်, အိၣ်ဟဲကဲထီၣ် ခီဖျိသးလၢအသ့ၣ်ညါမူဒါ မ့တမ့ၢ် တၢ်ပျံၤဘၣ်ယိၣ်လၢအကဘၣ်တၢ်သိၣ်ဃီၣ်န့ၣ်လီၤ. ဘၣ်ဆၣ်, ဒ်သိးပကဒိကနၣ် ပှၤအိၣ်ဒီးအစိအကမီၤလၢပဖီခိၣ်တဖၣ် လၢတၢ်အဲၣ်, ဒီးလၢတၢ်ယူးယီၣ်အပူၤအဂီၢ် ပဃုထၢသ့ဝဲဒၣ်န့ၣ်လီၤ.
ဖဲယိၤဟၣ် ၁၄:၂၃-၂၄ အပူၤန့ၣ်, ကစၢ်ယ့ၣ်ရှူး တၤဝဲအပျဲၢ်အဘီၣ်တဖၣ်, ဒီးစံးဝဲဒၣ်, “ပှၤမ့ၢ်အဲၣ်ယၤဒီး, ကတိၢ်န့ၢ်ယကလုၢ်ကထါ,… ပှၤလၢအတအဲၣ်ဘၣ်ယၤဘၣ်န့ၣ်, တတိၢ်န့ၢ်ဘၣ် ယကလုၢ်ကထါဘၣ်” န့ၣ်လီၤ. တၢ်ကဒိကနၣ်တၢ် ထီဘိန့ၣ် တမ့ၢ်တၢ်ဃုထၢအညီဘၣ်ဆၣ်, အဆၢဖိ ၁၅-၁၇ ပာ်ဖျါထီၣ်ဝဲ သးစီဆှံအစိကမီၤ အိၣ်ဆိးလၢပပူၤန့ၣ် ကဟ့ၣ်ပှၤတၢ်သးအိၣ်, ဒီးကမၤစၢၤပှၤဒ်သိး ပကဒိကနၣ်ကစၢ်ယွၤန့ၣ်လီၤ. ခီဖျိလၢကစၢ်အတၢ်မၤစၢၤပှၤအဃိ, ပှၤလၢအအဲၣ်ပှၤအဒိၣ်ကတၢၢ်တဂၤ အတၢ်မၤလိာ်တဖၣ်န့ၣ် ပလူၤပိာ်ထွဲဆူညါသ့ဝဲဒၣ်-တမ့ၢ်လၢ တၢ်ပျံၤတၢ်ဘၣ်ယိၣ်ယွၤအတၢ်သိၣ်ဃီၣ်အဃိဘၣ်, မ့မ့ၢ်လၢတၢ်အဲၣ်ဘၣ်ကစၢ်ယွၤအဃိန့ၣ်လီၤ.
