တံၤသကိးခံဂၤလူၤဃုပှ့ၤ ခီၣ်ဖၠူၣ်ထၢၣ် (Laptop) လၢလီမ့ၣ်အူအပိးအလီအကျးအကတီၢ်, အဝဲသ့ၣ်ထံၣ်ဝဲဒၣ် ပှၤလိာ်ကွဲဖျၢၣ်သွ့ လၢအမံၤဟူသၣ်ဖျါ ရှၣ်ခ့ အိၣ်နံလ် (Shaquille O’Neal) န့ၣ်လီၤ. အဝဲသ့ၣ်ခံဂၤ သ့ၣ်ညါထွဲဝဲဒၣ်လၢ တၢ်တယံာ်ဒံးဘၣ်န့ၣ် အိၣ်နံလ် အမုၢ်ဒ့မုၣ်တဂၤ, ဒီးအတံၤသကိးလၢ လိာ်ကွဲသကိး ဖျၢၣ်သွ့တဖုဃီတဂၤန့ၣ် သံလဲၤပူၤကွံာ်ဟီၣ်ခိၣ်အဃိ, အဝဲသ့ၣ်လဲၤစံးကတိၤသကိး, မၤမုာ်ထီၣ်က့ၤအီၤ, ဒီးပာ်ဖျါထီၣ်တၢ်သးအုးဃုာ်ဒီးအီၤန့ၣ်လီၤ. အိၣ်နံလ် အသးကလၢၢ်ဘၣ်ဝဲလၢ, ပှၤဒီတံၤသကိး ခံဂၤအံၤ ထံၣ်အီၤ ဒ်အဝဲမ့ၢ်ပှၤလၢအဘၣ်လဲၤခီဖျိအကတီၢ်လၢအကီအခဲတဂၤအဃိ, ဖဲအဝဲသ့ၣ်ခံဂၤ ဟဲက့ၤကွၢ်ဃုပှ့ၤ ခီၣ်ဖၠူထၢၣ်အကတီၢ်, အိၣ်နံလ် ဟဲဆူအဝဲသ့ၣ်အအိၣ်, ဒီးမၢအဝဲသ့ၣ်ဃုထၢ ခီၣ်ဖၠူထၢၣ် အဂ့ၢ်ကတၢ်, ဒီးပှ့ၤန့ၢ်ဝဲဒၣ်လၢအဝဲသ့ၣ်အဂီၢ်န့ၣ်လီၤ.
တချုးလၢတၢ်ထံၣ်လိာ်သးဒ်သိးအံၤ အနံၣ်တကထိဘျဲၣ်, ကတိၤ ၁၁:၁၇ အပူၤ န့ၣ်, စီၤရှလိၤမိၤကွဲးတ့ၢ်ဝဲ “ပှၤမၤဘျုးမၤဖှိၣ်တၢ်န့ၣ် မၤတၢ်ဂ့ၤလၢအသးဒၣ်ဝဲအဂီၢ်” န့ၣ်လီၤ. ဖဲပဆိကမိၣ်ထီၣ် တၢ်လၢပှၤဂၤအတၢ်လိၣ်, ကွၢ်ဖဲပမၤသ့တမံၤမံၤ ဒ်သိးဒီးပကဟ့ၣ်ဂံၢ်ဟ့ၣ်ဘါ အဝဲသ့ၣ်စံးတၢ်န့ၣ်, မ့ၢ်ဒၣ်ပမၤဂ့ၤမၤဘျုးလီၤက့ၤပနီၢ်ကစၢ်ဒၣ်ဝဲန့ၣ်လီၤ. တၢ်မၤအံၤတမ့ၢ်လၢ တၢ်ပှ့ၤန့ၢ် ခီၣ်ဖၠူထၢၣ် မ့တမ့ၢ် တၢ်အပီးအလီတဖၣ်ဘၣ်ဆၣ်, မ့မ့ၢ် ကစၢ်ယွၤ ကဆိၣ်ဂ့ၤပှၤအဂီၢ် အဝဲအိၣ်ဒီးကျိၤကျဲလၢ ဟီၣ်ခိၣ်ထိၣ်တဲာ်တသ့တန့ၢ်ဘၣ်န့ၣ်လီၤ. ကတိၤ ၁၁:၁၆ န့ၣ် စီၤရှလိၤမိၤ ပာ်ဖျါထီၣ်ဝဲ,လၢ “ပိာ်မုၣ်အိၣ်ဒီးအဃံအလၤ ဟံးဃာ် တၢ်လၤကပီၤ, ဒီးပှၤအဆူၣ်ဟံးဃာ် တၢ်ထူးတၢ်တီၤ” န့ၣ်လီၤ. တၢ်ဟ့ၣ်တၢ်ဘျုးတၢ်ဖှိၣ်တဖၣ် အိၣ်ဟဲလၢကစၢ်ယွၤန့ၣ် ကၢပှ့ၤကၢကလံၤဒိၣ်န့ၢ်အါန့ၢ်ကျိၣ်စ့, ဒီးယွၤအသးအိၣ်ထိၣ်တဲာ်ဝဲတၢ်ဟ့ၣ်တဖၣ်အံၤ ခီဖျိလၢအတၢ်ကူၣ်သ့, ဒီးခီဖျိလၢအကျိၤကျဲအလၢအပှဲၤန့ၣ်လီၤ.
တၢ်သးကညီၤ, ဒီးတၢ်သးအိၣ်ဟ့ၣ်ညီတၢ်န့ၣ် မ့ၢ်ယွၤအတကဲာ်ပဝးတဖၣ်အကျါတနီ, ဒီးကစၢ်ယွၤအဲၣ်ဒိး ပကပာ်ဖျါထီၣ်ဝဲလၢ ပသူၣ်ပသး, ဒီးပတၢ်အိၣ်မူအပူၤန့ၣ်လီၤ. တၢ်ဂ့ၢ်အံၤ, စီၤရှလိၤမိၤ စံးကတိၤကျၢၢ်တံၢ်ဝဲဂ့ၤဂ့ၤဘၣ်ဘၣ် လၢကတိၤ ၁၁:၂၅ အပူၤ, “ပှၤလၢအဟ့ၣ်တၢ်ညီ ကဘီၣ်ထီၣ်ညီထီၣ်, ဒီးပှၤလၢအဖှိၣ်ထံန့ၣ် ကဒိးဖှိၣ်ထံအကစၢ်ဒၣ်ဝဲလီၤ” န့ၣ်လီၤ (:၂၅).
