ဖဲခရ့းစတဲၣ် (Krystal) စးထီၣ်မၤတၢ်သီသီလၢ ဘၣ်ကၠံနယၤ (Virginia) ခီဖံၣ်ကျးန့ၣ်, ဘၣ်ကွၢ်ထွဲဝဲ အဲးဘံၣ် (Ibby), ပှၤလၢညီနုာ်ဟဲအီၣ်အီတၢ်တဂၤန့ၣ်လီၤ. မ့ၢ်လၢ အဲးဘံၣ်အနၢ်တအၢအဃိ, တၢ်လၢအလိၣ်ဘၣ်ဝဲန့ၣ် ဒုးသ့ၣ်ညါခီဖျိ တၢ်ဒိလီၤလံာ်လၢ အကွဲၤဒီနၢ်အပူၤန့ၣ်လီၤ. ဖဲ ခရ့းစတဲၣ် သ့ၣ်ညါဝဲလၢ အဲးဘံၣ် မ့ၢ်ပှၤလၢဟဲအီၣ်ညီနုာ်တၢ်တဂၤအဃိ, ပာ်လီၤအသး ဒ်သိးကမၤဂ့ၤအါထီၣ်တၢ် လၢအဲးဘံၣ်အဂီၢ်န့ၣ် ခရ့းစတဲၣ် မၤလိဝဲ အမဲရကၤ တၢ်ဒုးနဲၣ် တၢ်ပနီၢ် အတၢ်ကတိၤ ခီဖျိလၢ နီၣ်ခိအတၢ်ဟူးတၢ်ဂဲၤ ဒ်သိးအဲးဘံၣ် ကဒုးနဲၣ် တၢ်လၢအဲၣ်ဒိးအီၣ်အီတဖၣ်, ဒီးတလိၣ်ကွဲးဝဲလၢ ကွဲၤဒီနၢ်အပူၤလၢၤဘၣ်န့ၣ်လီၤ.
တၢ်ဂ့ၢ်ဆံးဖိတမံၤ, ဒ် ခရ့းစတဲၣ် ပာ်ဖျါထီၣ်ဝဲ တၢ်အဲၣ်, ဒီးတၢ်ခ့တၢ်ပှၤ အတၢ်မၤ တကလုာ် ဆူ အဲးဘံၣ် အဂီၢ်အသိးန့ၣ်, စီၤပီလူး ဟ့ၣ်ဂံၢ်ဟ့ၣ်ဘါ ပဝဲခဲလၢာ်လၢ ပကမၤဂ့ၤမၤစၢၤလိာ်သးကဒဲကဒဲန့ၣ်လီၤ. လၢအလံာ်ပရၢအပူၤန့ၣ် ပှၤစူၢ်နာ် ကစၢ်ခရံာ်တဖၣ်လၢ အလီၤပြံလီၤပြါ, ဒီးဘၣ်အိၣ်ဆိးလၢထံကီၢ်အဂၤတဖၣ်အဂီၢ်, ၁ ပ့း ၄:၈,၁၀ န့ၣ် စီၤပီလူး ပာ်ဖျါဝဲ “မ်တၢ်အဲၣ်တၢ်ကွံဒိၣ်မး အိၣ်လၢသုကျါတက့ၢ်,” ဒီး “အံးက့ၤကွၢ်က့ၤလိာ်သုသး, ဒ်သုန့ၢ်တၢ်ဘျုးတၢ်ဖှိၣ်တဂၤဒီးတဂၤအသိးန့ၣ်တက့ၢ်” န့ၣ်လီၤ. ကယဲၢ်တၢ်သ့တၢ်ဘၣ်, ဒီးတၢ်ကူၣ်ဘၣ်ကူၣ်သ့တမံၤဂ့ၤတမံၤဂ့ၤ, လၢယွၤကတဲာ်ကတီၤန့ၢ်ပှၤတဖၣ်န့ၣ် မ့ၢ်ယွၤ အတၢ်ဟ့ၣ်, ဒ်သိးပစူးကါအီၤကသ့လၢ ပှၤအါဂၤအတၢ်ဘၣ်ဘျုးဘၣ်ဖှိၣ်အဂီၢ်န့ၣ်လီၤ. ပမ့ၢ်မၤန့ၣ်, ပတၢ်ကတိၤ, ဒီးပတၢ်ဖံးတၢ်မၤတဖၣ် ကကဲထီၣ် တၢ်မၤလၤကပီၤယွၤန့ၣ်လီၤ.
ပှၤလၢအဒိးန့ၢ်အလံာ်ပရၢအံၤသ့ၣ်တဖၣ်အဂီၢ်, ခီဖျိလၢအဝဲသ့ၣ်ဘၣ်လဲၤခီဖျိ တၢ်နးတၢ်ဖှီၣ်, ဒီးဘၣ်အိၣ်လီၤဖးဒီးပှၤဂၤအကတီၢ်အဃိ, စီၤပီလူး အတၢ်ကတိၤတဖၣ်အံၤ အကါဒိၣ်ဝဲလီၤလီၤဆီဆီန့ၣ်လီၤ. စီၤပီလူး ဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကအံးက့ၤကွၢ်က့ၤလိာ်အသး တဂၤဒီးတဂၤ ဖဲအကတီၢ်လၢ အကိၢ်အဂီၤအပူၤန့ၣ်, ဒ်သိးကမၤစၢၤ အဝဲသ့ၣ်တူၢ်ခီၣ်ဝဲ တၢ်မၤကွၢ်တဖၣ်ကန့ၢ်အဂီၢ်န့ၣ်လီၤ. ပှၤဂၤဘၣ်ကွၢ်ဆၢၣ်မဲာ် တၢ်နးတၢ်ဖှီၣ်တဖၣ် မ့ၢ်တၢ်ဒ်လဲၣ်ဒ်လဲၣ်န့ၣ် ပတသ့ၣ်ညါလီၤတံၢ်လီၤဆဲးဘၣ်ဆၣ်, ဒ်သိးပကဒုးနဲၣ်ပာ်ဖျါထီၣ် ပတၢ်အဲၣ်သူၣ်ကညီၤသးကညီၤတၢ်ဆူ ပှၤအါဂၤ,ဃုာ်ဒီးတၢ်မၤဂ့ၤမၤဘျုးတၢ်, ဒီးလၢ တၢ်သူၣ်ဖှံသးညီအပူၤ, ယွၤမၤစၢၤပှၤသ့ဝဲဒၣ် ခီဖျိလၢပတၢ်စံးတၢ်ကတိၤ, ပတၢ်ဂံၢ်ခီၣ်ထံးတဖၣ်, ဒီးပတၢ်သ့တၢ်ဘၣ်တဖၣ်န့ၣ်လီၤ. မ်ကစၢ်ယွၤ ကမၤစၢၤပှၤလၢ တၢ်အံးက့ၤကွၢ်က့ၤလိာ်ပသး ဒ်အမ့ၢ် တၢ်ပာ်ဖျါထီၣ်က့ၤ ယွၤအတၢ်အဲၣ်န့ၣ်တက့ၢ်.
