မဲး(ဂ) မုၢ်လၢ်တ့ၢ်ဝဲ အတၢ်ရဲၣ်တၢ်ကျဲၤလၢ ကလဲၤဟးကသုၣ်ဆူ ထံဂၤကီၢ်ဂၤ န့ၣ်လီၤ. ဘၣ်ဆၣ်, ဒ်ညီနုၢ်မၤဝဲအသိး, ဘၣ်ထွဲဒီးတၢ်ဂ့ၢ်အံၤ ဃ့ထုကဖၣ်ဆိဝဲဒၣ်န့ၣ်လီၤ. အတံၤသကိးတဂၤ စံးဘၣ်အီၤလၢ “တၢ်အံၤ မ့ၢ်ဒၣ်နဟံးန့ၢ်နံၤသဘျ့လီၤ. ဘၣ်မနုၤအဃိ, နဃ့တၢ်ဟ့ၣ်ကူၣ်လၢယွၤလဲၣ်” န့ၣ်လီၤ. ဘၣ်ဆၣ်, မဲး(ဂ) နာ်ဝဲ ဒၣ်လၢ တၢ်ဟ့ၣ်လီၤအးလီၤတၢ်ခဲလၢာ် လၢယွၤအစုပူၤန့ၣ်လီၤ. တၢ်တဘျီအံၤန့ၣ်, အသးကလၢၢ်ဘၣ်ဝဲလၢ ယွၤထိၣ်ဟူးထိၣ်ဂဲၤအီၤ ဒ်သိးကဆိကတီၢ် အတၢ်လဲၤ အဂီၢ်န့ၣ်လီၤ. အဝဲဆိကတီၢ်အတၢ်ရဲၣ်တၢ်ကျဲၤ, ဒီးလၢခံ, ဖဲကဘၣ်လဲၤတၢ်အဆၢကတီၢ်န့ၣ် တၢ်ဆါသံသတြိာ် မၤဘၣ်ဒိ ထံကီၢ်လၢ အကလဲၤဝဲတဘ့ၣ် န့ၣ်လီၤ. အဝဲတိၢ်န့ၢ်ဝဲလၢ “ယသးကလၢၢ်ဘၣ်လၢ ယွၤဒီတဒၢတ့ၢ်ယၤန့ၣ်လီၤ.”
ထံလီၤစှၤဝံၤအလီၢ်ခံ စီၤနိအၤဒီးအဟံၣ်ဖိဃီဖိ ဘၣ်အိၣ်ဝဲလၢကဘီပူၤ ခံလါဃၣ်ဃၣ်အကတီၢ်န့ၣ် စီၤနိအၤစ့ၢ်ကီးဘၣ်သန့ၤအသးလၢ ယွၤအတၢ်တဒီတဒၢန့ၣ်လီၤ. အဝဲသ့ၣ်ဘၣ်အိၣ်လၢကဘီပူၤ အါန့ၢ်အလါတဆံဝံၤ, အဝဲအသးဆူၣ် ကဟးထီၣ်ဆူတၢ်ချၢန့ၣ်လီၤ. တၢ်ခဲလၢာ်ဝံၤ, ၁ မိၤ ၈:၁၃ ပာ်ဖျါဝဲ “ထံသူထီၣ်ကွံာ်လၢဟီၣ်ခိၣ်ချၢ,” ဒီး “ဟီၣ်ခိၣ်ဘ့ၣ်ခိၣ်ဃ့ထီၣ်လံအသးလံ” န့ၣ်လီၤ. ဘၣ်ဆၣ် စီၤနိၤအၤ တသန့ၤအသးဒၣ်ထဲ တၢ်လၢအထံၣ်ဝဲဘၣ်- လၢအလီၢ်န့ၣ်, အဆၢဖိ ၁၅-၁၉ စံးဘၣ်ပှၤ, အဝဲဟးထီၣ်လၢကဘီပူၤ ဖဲဒၣ်ယွၤမၢအီၤ အကတီၢ်န့ၣ်လီၤ. စီၤနိအၤ နာ်ဝဲလၢ ယွၤအိၣ်ဒီးအတၢ်ဂ့ၢ်တၢ်ကျိၤလၢအဂ့ၤ, လၢတၢ်ဘၣ်အိၣ်ခိး အါထီၣ်တၢ်ဆၢကတီၢ်န့ၣ်လီၤ. ဘၣ်သ့ၣ်သ့ၣ် ကမ့ၢ်လၢ ဟီၣ်ခိၣ်န့ၣ် တအိၣ်ဒံးဒီးတၢ်ဘံၣ်တၢ်ဘၢလၢလၢပှဲၤပှဲၤအဃိန့ၣ်လီၤ.
လၢပတၢ်အိၣ်မူအပူၤ တၢ်စံၣ်ညီၣ်တဲာ်တဖၣ်အဂီၢ်, ဒ်ပဃ့ထုကဖၣ်တၢ်, ဒီးစူးကါ ပတၢ်သ့တၢ်ဘၣ် လၢယွၤဟ့ၣ်ပှၤ, ဒီးအိၣ်ခိးကွၢ်အတၢ်နဲၣ်ဆှၢပှၤအကတီၢ်, ပကအိၣ်ဒီး တၢ်သ့ၣ်ညါလၢ, ယွၤတၢ်ဘၣ်တ့ကစၢ်, လၢအကူၣ်သ့ကူၣ်ဘၣ်တဂၤန့ၣ်, သ့ၣ်ညါဝဲ တၢ်အဂ့ၤကတၢၢ်လၢပဂီၢ်န့ၣ်ကမ့ၢ်တၢ်မနုၤလဲၣ်အဃိ, ပနာ်န့ၢ် ကစၢ်ယွၤအတၢ်သ့ၣ်ဆၢဖးကတီၢ်သ့ဝဲဒၣ်န့ၣ်လီၤ. စံး ၃၁:၁၄-၁၅ အပူၤန့ၣ် ပှၤကွဲးထါ ဘိးဘၣ်သ့ၣ်ညါဝဲဒၣ်လၢ, “ဒီးယဲဒၣ်အံၤ ယသန့ၤယသးလၢနၤ, ယွၤဧၢ. ယစံး, နဲဒၣ်အံၤ နမ့ၢ်ယကစၢ်လီၤ. ယဆၢကတီၢ်သ့ၣ်တဖၣ်အိၣ်ဝဲလၢ နစုပူၤလီၤ” န့ၣ်လီၤ.
