ဘၣ်ထွဲဒီး တၢ်ဃုသ့ၣ်ညါနၢ်ပၢၢ် သ့ၣ်ဂီၤ အမုၢ် (Red Wood Tree) အတၢ်ဂီၤမူ (Video) အိၣ်ဝဲတခါန့ၣ်လီၤ. တၢ်ဒိတၢ်ဂီၤမူ အတၢ်သ့တၢ်ဘၣ်န့ၣ် ဂ့ၤဒိၣ်မး, လၢတၢ်အကလုၢ် တကပၤန့ၣ် ပာ်ဖျါထီၣ် တၢ်ဂ့ၢ်တၢ်ကျိၤ, ဒီးအိၣ်ဂၢၢ်အိၣ်ကျၢၤ, တၢ်ဂ့ၢ်တၢ်ကျိၤတဖၣ်န့ၣ် ထုးန့ၢ်သူၣ်န့ၢ်သး, ဒီးဘၣ်ဂ့ၢ်ဘၣ်ဝီၤဝဲဒၣ်န့ၣ်လီၤ. တၢ်ဂီၤမူအံၤ ဒုးနဲၣ်ဝဲ တၢ်ဆဲးနုာ်လီၤ တၢ်အသံးအကာ်, လၢအမၤဆူၣ်ထီၣ်တၢ်ဂံၢ်တၢ်ဘါတမံၤ, ဒ်သိးဒီးကတြီ သ့ၣ်ဂီၤအမုၢ်တဖၣ် အတၢ်ဒိၣ်ထီၣ်တအိၣ်ကတီၢ်အဂီၢ်န့ၣ်လီၤ. မ့ၢ်လၢ သ့ၣ်ဂီၤအမုၢ်တဖၣ်လၢတၢ်ဆဲးနုာ်လီၤ တၢ်အသံးအကာ်တဖၣ်အံၤန့ၣ် တူၢ်ဝဲခီၣ်ဝဲဒၣ် န့ဆၢၣ် အတၢ်လဲၤတရံးအသး လၢတၢ်ဂိၢ်အကတီၢ် တန့ၢ်အဃိ, သံကွၢ်ဝဲဒၣ်န့ၣ်လီၤ.

တၢ်ကစီၣ်လၢ တၢ်ဂီၤမူ အဲၣ်ဒိးဟ့ၣ်ဝဲန့ၣ်, ပတၢ်မၤမ့ၢ်အါထီဘိ, ဒီးပမ့ၢ် တအိၣ်ဘှံးဘၣ်န့ၣ်ဒီး, လၢပဂီၢ် တၢ်ကဲထီၣ်အသးဒ်သိးအံၤ သ့ဝဲစ့ၢ်ကီးန့ၣ်လီၤ. တၢ်အံၤကဘၣ်ဝဲသ့ၣ်သ့ၣ်န့ၣ်လီၤ. ဘၣ်ဆၣ် တၢ်ဂီၢ်မူအံၤ တမ့ၢ်တၢ်လၢအလီၤတံၢ်ဘၣ်. တၢ်ဃုသ့ၣ်ညါနၢ်ပၢၢ်တၢ်ဒ်သိးအံၤန့ၣ်, တအိၣ်နီတဘျီဘၣ်. သ့ၣ်ဂီၤ အမုၢ်တဖၣ်အံၤ အလၣ်လါဟ့ထီဘိ, ဒီးအတၢ်ဒိၣ်ထီၣ်န့ၣ်တအိၣ်ကတီၢ်နီတဘျီဘၣ်. ဒီးသ့ၣ်အမုၢ်တဖၣ်လၢ တၢ်ဂီၤမူပာ်ဖျါဝဲဒၣ်န့ၣ် မ့ၢ် “စံၣ်ကွဲယၢး” သ့ၣ်ဖးဒိၣ် (Sequoias), ဒီးတမ့ၢ် သ့ၣ်ဂီၤအမုၢ် မဲထီၣ်လၢ ပီၣ်လဲၣ်ကၢၢ်နံၤ (Coastal Red woods) တဖၣ်န့ၣ်ဘၣ်. ဒ်တၢ်ဂီၤမူ ပာ်ဖျါဝဲအသိး, ပမ့ၢ်ကွၢ်ထံဆိကမိၣ်န့ၣ်ဒီး, တၢ်ဂ့ၢ်တဖၣ်န့ၣ် ဘၣ်တၢ်သန့ၤအသးလၢ တၢ်ဂ့ၢ်အကမၣ်တဖၣ်အလိၤန့ၣ်လီၤ.

ပထံၣ်လီၤက့ၤပသးလၢ ပအိၣ်မူဘၣ် စိၤဆၢကတီၢ်လၢ, တၢ်မၤဒိၣ်ထီၣ်အါထီၣ် တၢ်လီၤတၢ်ဝ့ၤတဖၣ် ခီဖျိလၢစဲအ့ၣ်အတၢ်သ့တၢ်ဘၣ်တဖၣ်, ဒ်သိးဒီး ပကနာ်တၢ်လီတၢ်ဝ့ၤတဖၣ် ဒ်တၢ်အဘၣ်န့ၣ်လီၤ. တၢ်မ့ၢ်တၢ်တီဒီးတၢ်လီတၢ်ဝ့ၤ အတၢ်လီၤဆီလိာ်သးအဂ့ၢ်န့ၣ် လံာ်တၢ်ကတိၤဒိ ဒ်အမ့ၢ်ယွၤအတၢ်ကူၣ်သ့ပာ်ဖှိၣ် ပာ်ဖျါဝဲတလီၢ်လီၢ်န့ၣ်လီၤ. ကတိၤ ၁၂:၁၉ ပာ်ဖျါဝဲလၢ “တၢ်မ့ၢ်တၢ်တီအပျုၤန့ၣ် ကအိၣ်ဂၢၢ်ဆိးကျၢၤလီၤထူလီၤယိာ်လီၤ, မ့မ့ၢ် တၢ်ကဘျံးကဘျၣ်အပျ့ၤန့ၣ် အိၣ်ထဲ တပနာ်ဧိၤလီၤ” န့ၣ်လီၤ. ဒီးအဆၢဖိ ၂၀ န့ၣ်, “တၢ်လီၤတၢ်ဝ့ၤ အိၣ်ဝဲလၢ ပှၤလၢအကူၣ်တၢ်အၢအသးကံၢ်ပူၤလီၤ. မ့မ့ၢ် တၢ်သးခုအိၣ်ဝဲဒီးပှၤလၢအဒုးကူၣ်တၢ်ဃူတၢ်ဖိး” န့ၣ်လီၤ. တၢ်တီတၢ်လိၤန့ၣ်, ဘၣ်ထွဲဒီးတၢ်ခဲလၢာ်, စးထီၣ်လၢယွၤအတၢ်မၤလိာ်တဖၣ် တုၤတၢ်ဂီၤမူလၢအပာ်ဖျါ တၢ်ဂိၢ်အကတီၢ်အဂ့ၢ်ဒၣ်လဲာ် န့ၣ်လီၤ. တၢ်မ့ၢ်တၢ်တီ “အိၣ်ဂၢၢ်ဆိးကျၢၤလီၤထူလီၤယိာ်” န့ၣ်လီၤ.