တၢ်ထိၣ်ဒွးမူခိၣ်ကလံၤ အၦၤကူၣ်ဘၣ်ကူၣ်သ့တဂၤ အိၣ်ဝဲလၢ ကီၢ်စဲၣ် မ့းစ့းစပံၣ် န့ၣ် စံးကတိၤဖးဆိ မူခိၣ်ကလံၤတၢ်ကမၤအသးအဂ့ၢ်, ဖဲလါမၢ်ၡး ၂၄ သီႇ ၂၀၂၃နံၣ် အကတီၢ်, စံးကတိၤပာ်ဖျါဝဲအတၢ်ကတိၤဃုဖျၢၣ် (Dear Jesus, please help them. Amen.) န့ၣ် မ့ၢ်တၢ်ယိယိဖိဘၣ်ဆၣ် ဒိၣ်ယိၥ်ဝဲအဃိ, ရၤလီၤအသးချ့သဒံးဆူဟီၣ်ခိၣ်ဒီဘ့ၣ်န့ၣ်လီၤ. မဲး လီၣ်ဘၢၣ် (Matt Laubhan) လူၤပိၥ်ထွဲ ဃုသ့ၣ်ညါ ကလံၤမုၢ်ဖးဒိၣ်တဖျၢၣ်အဂ့ၢ်, ဒီးသ့ၣ်ညါထွဲဝဲလၢ ကလံၤမုၢ်သဝံးလၢအဂံၢ်ဆူၣ်ဒိၣ်မး တဖျၢၣ် ကဟဲလီၤဘၣ်ဖဲ ဝ့ၢ် အ့ၤမရံၣ် (Amory) န့ၣ်လီၤ. ဖဲ လီၣ်ဘၢၣ် ပာ်ဖျါဝဲ ကလံၤမုၢ်အံၤအဂ့ၢ် လၢကွဲၤဟူထံၣ်ဖျါအကတီၢ်, အိၣ်ပတုၥ်တစိၢ်ဖိ, ဒီးဃ့ထုကဖၣ်တၢ် “ကစၢ်ယ့ၣ်ၡူးသးဘိဧၢႇ ဝံသးစူၤ မၤစၢၤဘၣ်အဝဲသ့ၣ်တဖၣ်န့ၣ်တက့ၢ်. အၤမ့ၣ်” အံၤ, ၦၤနၢ်ဟူဘၣ်လၢဟီၣ်ခိၣ်ဒီဘ့ၣ်န့ၣ်လီၤ. ကလံၤမုၢ်လီၤဝံၤအလီၢ်ခံန့ၣ် ၦၤကွၢ်တၢ်ဖိတနီၤစံးဝဲလၢ တၢ်ထုကဖၣ်ဖိအံၤန့ၣ် ဒ်သိးပှၤကဃုထံၣ်ဆိ တၢ်လီၢ်အဘံၣ်အဘၢအဂီၢ် ထိၣ်ဂဲၤထီၣ်ဝဲဒၣ်န့ၣ်လီၤ. လၢအတၢ်သးအိၣ်ဒၣ်ဝဲ, ဒီးဃ့ထုကဖၣ်န့ၢ်တၢ်လၢသူၣ်ဒီဖျၢၣ်သးဒီဖျၢၣ်အံၤန့ၣ် ကမၤစၢၤသးသမူအါဖျၢၣ် ကပူၤဖျဲးလၢတၢ်ဟးဂီၤသ့ၣ်သ့ၣ်န့ၣ်လီၤ.

ပတၢ်ထုကဖၣ်စ့ၢ်ကီး ဒုးကဲထီၣ်တၢ်လီၤဆီသ့ဝဲဒၣ်န့ၣ်လီၤ. တလိၣ်လၢပကဘၣ်ဃ့ထုကဖၣ်တၢ် ဖးယံာ်ဖးထီန့ၣ်ဘၣ်. တၢ်ထုကဖၣ်လၢ အဖုၣ်, ဒီးပှၤဒိကနၣ်မုာ်ဝဲလၢ ပှၤနၢ်ဟူတၢ်ဖိတဖၣ်အဂီၢ်န့ၣ် ပဃ့ကိးဆၢကိးကတီၢ်သ့ဝဲဒၣ်န့ၣ်လီၤ. ဖဲပအိၣ်လၢတၢ်ဖံးတၢ်မၤလီၢ်, လၢတၢ်လဲၤထီၣ်က့ၤလီၤကျဲဖီခိၣ်, မ့တမ့ၢ် လၢတၢ်ဟးကသုၣ်ကသီအကတီၢ်မ့ၢ်ဂ့ၤန့ၣ်, ၁ သ့း ၅:၁၇ ပာ်ဖျါဝဲလၢ ပ‘ဃ့ထုကဖၣ်ထီဘိတဘိယူၢ်ဃီ’ သ့ဝဲဒၣ်န့ၣ်လီၤ.

ကစၢ်ယွၤအဲၣ်ဒိးနၢ်ဟူ ပတၢ်ထုကဖၣ် ဒီတနံၤကျၢၤန့ၣ်လီၤ. ၦၤတၢ်မၢဖိစီၤပီလူး ဒုးသ့ၣ်နီၣ်က့ၤၦၤလၢ ပတဘၣ်မ့ၢ် တၢ်ဘၣ်ယိၣ်ဘၣ်ဘီ, မ့တမ့ၢ် တၢ်ပျံၤတၢ်ဖုး အၦၤဃိၥ်ဖိဘၣ်. မ့မ့ၢ်ကယဲၢ်ပတၢ်ဘၣ်ယိၣ်, ဒီးပတၢ်သးစဲတဖၣ်န့ၣ် ပဟဲစိာ်ဆူယွၤအအိၣ်သ့ဝဲန့ၣ်လီၤ. ဖံလံး ၄:၆-၇ ပာ်ဖျါဝဲ “သုတဘၣ်ယိၣ်တၢ်နီတမံၤတဂ့ၤ. မ့မ့ၢ်လၢတၢ်ကိးမံၤဒဲးန့ၣ်လၢတၢ်ထုကဖၣ်, ဒီးလၢတၢ်ဃ့ကညးအိၣ်ဒီးတၢ်စံးထီၣ်ပတြၢၤတၢ်အဘျုးအဖှိၣ်အပူၤန့ၣ် ဘိးဘၣ်သ့ၣ်ညါယွၤလၢ သုတၢ်အဲၣ်ဒိးတဖၣ်န့ၣ်တက့ၢ်. ဒီးယွၤအတၢ်ဃူတၢ်ဖိးလၢ အဒိၣ်န့ၢ်ယိၥ်န့ၢ်ကယဲၢ်ပသ့ၣ်ညါနၢ်ပၢၢ်တၢ်န့ၣ် ကပၢၤသုသူၣ်သုသး ဒီးသု
ဆိကမိၣ်တၢ်လၢ ယ့ၣ်ၡူးခရံၥ်အပူၤလီၤ” န့ၣ်လီၤ.

ဖဲပအိၣ်ဘၣ်လၢမုၢ်နံၤအဂ့ၤအဝါမ့ၢ်ဂ့ၤႇ တၢ်ကွၢ်ဆၢၣ်မဲၥ်ကလံၤမုၢ်တွၤနီၢ်နီၢ်, မ့တမ့ၢ် သးသမူ အကလံၤမုၢ်မ့ၢ်ဂ့ၤႇ မ်ပသ့ၣ်နီၣ်အိၣ်ပတုၥ်တစိၤဖိ, ဒီးဃ့ထုကဖၣ်တၢ်န့ၣ်တက့ၢ်.