ယဘၣ်မၤလိ ဝ့လယၢၣ် ရှ့းခ်စပံယါ အတၢ်ကွဲးတဖၣ်, ဖဲယထီၣ် ခီလ့ၣ် တၢ်မၤလိ နံၣ်တဝၥ်အကတီၢ်န့ၣ်လီၤ. တၢ်မၤလိအံၤ သိၣ်လိဝဲ လံာ်ဖးဒိၣ်တဘ့ၣ်လၢအိၣ်ဒီး ရှ့းခ်စပံယါ အတၢ်ကွဲးတဖၣ်ခဲလၢၥ်န့ၣ်လီၤ. လံၥ်တဘ့ၣ်အံၤ အတယၢၢ်အဃၢန့ၣ် ကအိၣ်လၢ အပီၣ်အါမးႇ ဒီးယဘၣ်စိၥ်လံာ်ဖးဒိၣ်အံၤလၢ အါနၣ်ရံၣ်အတီၢ်ပူၤန့ၣ်လီၤ. တၢ်ဟးစိၥ် လံာ်လၢအဃၢဒိၣ်မးတဘ့ၣ်အံၤ မၤဆါယပျိၢ်, ဒီးအကတၢၢ်န့ၣ်မၤကၢ်ကွံၥ်ဂာ်ထးလၢ ယလံၥ်ထၢၣ်အပျံၤလိၤန့ၣ်လီၤ.
ပိးလီတနီၤနီၤ ပကစိၥ်အီၤအဂီၢ်န့ၣ် ဃၢဝဲဒိၣ်မးန့ၣ်လီၤ. ခါလၢအပူၤကွံၥ် နီၢ်သးအတၢ်ဟူးဂဲၤ အတၢ်ဝံဃၢတဖၣ် မၤဘၣ်ဒိဆါၦၤ, အဒိ, တၢ်သးဆါ, ဒီးတၢ်သူၣ်ဟ့သးဟ့န့ၣ် ဆီၣ်သနံးပှၤ သ့ဝဲဒၣ်န့ၣ်လီၤ. ဘၣ်ဆၣ် ကလီး ၃:၁၃ န့ၣ်ပကထံၣ်ဘၣ် ကစၢ်ယွၤ အဲၣ်ဒိးဝဲလၢပကအိၣ်ဒီးတၢ်သဘျ့, ခီဖျိလၢပပျၢ်ၦၤဂၤအတၢ်ကမၣ်, မ့ၢ်သ့န့ၣ်ဒီး, မၤဃူမၤဖိးလိာ်သးဒီးအဝဲသ့ၣ်တဖၣ်န့ၣ်လီၤ. တၢ်ဘၣ်ဒိဆါ မ့ၢ်ဒိၣ်ဝဲယိၥ်ဝဲဒၣ်န့ၣ်ဒီး, တၢ်ပျၢ်ပှၤဂၤအတၢ်ကမၣ် ကယံၥ်ဝဲဒၣ်န့ၣ်လီၤ. အတွးတအိၣ်ဘၣ်. ၁မိၤ ၂၇:၃၆ ပာ်ဖျါဝဲလၢ ဒ်သိး စီၤဧ့ၡီၤ ကပျၢ်ဝဲ စီၤယၤကိၥ်ဟုၣ်န့ၢ် အဖိဝဲၢ်ကိအလီၢ်, ဒီးတၢ်ဆိၣ်ဂ့ၤအဂီၢ်န့ၣ်, ဘၣ်ဟံးန့ၢ်ဝဲ တၢ်ဆၢကတီၢ်ဖးယံၥ်ဖးထီန့ၣ်လီၤ.
၁မိၤ ၃၃:၄ န့ၣ် ပကထံၣ်ဘၣ် ဖဲလၢအဝဲသ့ၣ်ခံဂၤ အိၣ်ဃူအိၣ်ဖိးလိာ်က့ၤအသးန့ၣ်ဒီး, လၢတၢ်အဲၣ်တၢ်သူၣ်အိၣ်သးအိၣ်အပူၤ စီၤဧ့ၡီၤ ပျၢ်ဝဲအပုၢ်အတၢ်ကမၣ်, ဒီးဖိးဟုအီၤဒၣ်လဲၥ်န့ၣ်လီၤ. တချုးလၢအဝဲသ့ၣ်အမဲၥ်ထံလီၤဝံၤဒံးဘၣ်တစုန့ၣ် တၢ်ကတိၤလိၥ်သးတအိၣ်နီတထံၣ်ဘၣ်. ၁မိၤ ၂၇:၄၁ ပာ်ဖျါဝဲလၢ စီၤဧ့ၡီၤ ပျဲပျၢ်ကွံၥ် တၢ်သးထီၣ် လၢအပၢၤဃၥ်ဝဲအါနံၣ်အါလါ, သးလၢအအဲၣ်ဒိးမၤသံအပုၢ်န့ၣ်လီၤ. ဒီးတၢ်ဆၢကတီၢ်အါနံၣ်အါလါအံၤ ဒုးအိၣ်ထီၣ်ခွဲးယာ်လၢ စီၤယၤကိၥ်အဂီၢ်, ဒ်သိးဒီး ကထံၣ်န့ၢ်က့ၤတၢ်လၢအမၤဘၣ်ဒိဆါအဝဲၢ်ထဲလဲၣ်န့ၣ်လီၤ. ၁မိၤ ၃၃:၈-၁၁ ပာ်ဖျါဝဲ ဖဲတၢ်မၤဃူမၤဖိးလိၥ်က့ၤအသးဝံၤန့ၣ် စီၤယၤကိာ် အိၣ်ဒီးဆီၣ်လီၤအသး, ဒီးယူးယီၣ်ပာ်ကဲဝဲအဝဲၢ် စီၤဧ့ရှီၤန့ၣ်လီၤ.
အကတၢၢ်န့ၣ်, ၁မိၤ ၃၃:၉,၁၅ ပာ်ဖျါဝဲလၢ ဒီပုၢ်ဝဲၢ်ခံဂၤလိၥ် တုၤဃီၤဝဲဒၣ် အပတီၢ်, ဖဲလၢတဂၤဒီးတဂၤကဒဲကဒဲ တလိၣ်ဘၣ်တၢ်နီတမံၤလၢၤဘၣ်န့ၣ်လီၤ. တၢ်ပျၢ်လိာ်သးတၢ်ကမၣ်ကဒဲကဒဲ, ဒီးပာ်လီၤတဲာ်တ့ၢ်ခါလၢအပူၤကွံၥ်အတၢ်ဘိၣ်တၢ်စှၢၤအဃၢတဖၣ်, ဒီးလဲၤတၢ်ဆူညါ သ့ဝဲဒၣ်လံန့ၣ်လီၤ.
