ကၠဲရမံၣ် (Jeremy) ကထီၣ်ဝဲ ‘သၢနံၣ် တၢ်မၤလိ’ အဂီၢ်, လဲၤတုၤဆူ ဖၠၣ်စိမိၤ, ဒီးဃ့န့ၢ်ဝဲ ၦၤမၤလိတၢ်ဖိအိၣ်ဆိးဒၢးလၢအၦ့ၤစှၤကတၢၢ် အကတီၢ်, ကဘၣ်ကွၢ်ဆၢၣ်မဲာ်ဒီးတၢ်မနုၤလဲၣ်န့ၣ် တသ့ၣ်ညါဝဲဘၣ်န့ၣ်လီၤ. လၢခံန့ၣ်အဝဲပာ်ဖျါက့ၤဝဲလၢ, “တၢ်အိၣ်အသးတဖၣ် လီၤသးဟးဂီၤ, ဒၢးဒီးတၢ်လုၣ်ထံဒၢးတဖၣ်န့ၣ် နးဒိၣ်မးန့ၣ်လီၤ.” ဘၣ်ဆၣ်အကျိၣ်စ့အိၣ်ဒီးအီၤန့ၣ်စှၤ, ဒီးကဃုထၢတၢ်အဂၤစ့ၢ်ကီး တအိၣ်ကဲၢ်ဆိးဘၣ်. ဒီးစံးဝဲဒၣ်လၢ, “တၢ်လၢယမၤသ့ခဲလၢၥ်န့ၣ် မ့ၢ်ဒၣ်ယကဘၣ်ဆိကမိၣ်ယဲလၢ, တၢ်မၤလိ သၢနံၣ် မ့ၢ်ဝံၤဒီး, ယကက့ၤအိၣ်ဘၣ် ဟံၣ်အဂ့ၤတဖျၢၣ် အိၣ်ဝဲအဃိ, ယကဝံသးစူၤအိၣ်ဆိး, ဒီးမၤလၢာ် ယတၢ်ဆၢကတီၢ်အဂ့ၢ်ကတၢၢ်န့ၣ်လီၤ.”

ကၠဲရမံၣ် အဂ့ၢ်အံၤဒုးထံၣ်က့ၤပှၤ, တၢ်လၢအတၤပှၤ ကိးမုၢ်နံၤ, လၢပတၢ်အိၣ်မူအိၣ်ဂဲၤအပူၤ, ဒ် ၂ ကရံၣ် ၅:၁ စံးဘၣ်ပှၤအသိး, လၢ ‘ဟီၣ်ခိၣ်အဒဲ’- နီၢ်ခိလၢကဘၣ်သံဝဲအပူၤ, ဒီး ၁ ယိၤ ၂:၁၇ ပာ်ဖျါဝဲ နီၢ်ခိလၢ အမူ, ဒီးမၤတၢ်လၢဟီၣ်ခိၣ်အံၤ ကဒံကွံၥ်ဝဲဒၣ်န့ၣ်လီၤ. လၢတၢ်န့ၣ်အဃိ, ဖဲပဂုၢ်ကျဲးစၢးဘှါဆှဲ ပတၢ်အိၣ်မူအတၢ်ကီတၢ်ခဲတဖၣ်ဒိၣ်ဒိၣ်မုၢ်မုၢ်အကတီၢ်, ၂ကရံၣ် ၅:၄ စံးဘၣ်ပှၤ, ပ ‘ဘၣ်ဝံတၢ်ဃၢဒီးပကအုကစွါတၢ်’ န့ၣ်လီၤ.

တၢ်လၢအဒုးလဲၤၦၤဆူညါန့ၣ် မ့ၢ်တၢ်မုၢ်လၢ်လၢအလီၤတံၢ်, တၢ်မုၢ်လၢ်လၢအမ့ၢ် မုၢ်တနံၤန့ၣ်, ပကအိၣ်ဒီးတၢ်မူအထူအယိာ်, နီၢ်ခိလၢအဂဲၤထၢၣ်သမူထီၣ်က့ၤ- ၂ကရံၣ် ၅:၄ ပာ်ဖျါဝဲလၢ “မူခိၣ်အတၢ်အိၣ်ဆိးလီၢ်,” ဒီး ရိမ့ၤ ၈:၁၉-၂၂ ပာ်ဖျါဝဲ, ပကအိၣ်ဆိး လၢဟီၣ်ခိၣ်တဘ့ၣ်လၢ တၢ်ကအုကစွါ, ဒီးတၢ်သးတံၥ်တၥ်တအိၣ်ဘၣ် အလီၢ်န့ၣ်လီၤ. လၢတၢ်အဲၣ်တၢ်သးအိၣ်အပူၤ ကစၢ်ယွၤဟ့ၣ်သါၦၤ ပတၢ်အိၣ်မူလၢ အကတီၢ်ခဲအံၤန့ၣ် ပကအိၣ်မူအိၣ်ဂဲၤအဂ့ၤကတၢၢ်အဂီၢ်, တၢ်မုၢ်လၢ်အံၤ ဟ့ၣ်သဆၣ်ထီၣ်ၦၤန့ၣ်လီၤ. တၢ်စုလီၢ်ခီၣ်ခိၣ်, ဒီးတၤလၣ်တဖၣ်လၢ အဝဲဟ့ၣ်လီၤပာ်ပှၤတဖၣ် ပကစူးကါအီၤအဂီၢ်န့ၣ် ကစၢ်ယွၤကမၤစၢၤစ့ၢ်ကီးပှၤ, ဒ်သိးဒီးပကမၤတၢ်လၢယွၤအဂီၢ်, ဃုၥ်ဒီးၦၤဂၤအဂီၢ်န့ၣ်လီၤ. လၢတၢ်န့ၣ်အဃိႇ ၂ ကရံၣ် ၅:၉ စံးဘၣ်ပှၤလၢ “ပအိၣ်ဒီးကစၢ်မ့ၢ်ဂ့ၤႇ ပအိၣ်ယံၤမ့ၢ်ဂ့ၤႇ ဒ်သိးကဘၣ် အသးလၢၦၤဒီး, ပမၤတၢ်သၦၢ်ၦၢ်လီၤ” န့ၣ်လီၤ.