စးထီၣ်လၢဟီၣ်ခိၣ်ဒီဘ့ၣ် တၢ်ဒုးဖးဒိၣ် ခံဘျီတဘျီဝံၤအလီၢ်ခံ, မ့ၣ်အူအီၣ် ပှၤကညီ အိၣ်ဆိးလီၢ် အနးကတၢၢ် လၢယူၣ်ခ့ၣ် (UK) န့ၣ်, မၤဟးဂီၤ ကရဲဖဲ တၢးဖးထီ (Grenfell Tower) လၢ ဝဲးစ် လၣ်ဒၢ် (West London) ပှၤအဂၤ နွံဆံ သံဝဲဒၣ်န့ၣ်လီၤ. တၢ်ဃိထံသ့ၣ်ညါက့ၤ တၢ်ဂ့ၢ်လၢမ့ၣ်အူအီၣ်ခီဂာ်တၢ်ချ့သဒံးအဂ့ၢ်, ဒီးပၥ်ဖျါဝဲတၢ်ဂ့ၢ်ကဲထီၣ်သး အခီၣ်ထံးခီၣ်ဘိန့ၣ် မ့ၢ်ပီးလီလၢအကျၢၢ်ဘၢကးဘၢဃၥ် တၢ်သူၣ်ထီၣ်အချၢအဃိ န့ၣ်လီၤ. တၢ်စူးကါပိးလီလၢတၢ်ချၢတဖၣ်န့ၣ် မ့ၢ်တိၢ်ထးအလူၣ်မံၣ်နံၣ်ယၢၣ်ဘၣ်ဆၣ်, တၢ်အိၣ်လၢအကိပူၤ မ့ၢ်ပလးစ်တ့းလၢမ့ၣ်အူအီၣ်ညီဒိၣ်နီၢ်မးတဖၣ်န့ၣ်လီၤ.

ဘၣ်မနုၤအဃိ, တၢ်ပျဲလၢ ၦၤကဆါ, ဒီးၦၤကတ့ထီၣ် ပိးလီလၢအလီၤဘၣ်ယိၣ် ဒ်သိးအံၤတဖၣ်န့ၣ်လဲၣ်. မ့ၢ်လၢပှၤတ့ဆါ ပိးလီတဖၣ်အံၤ တပာ်ဖျါထီၣ် တၢ်မၤကွၢ်အစၢ ဘၣ်ထွဲဒီးတၢ်ဒီတဒၢမ့ၣ်အူ အတၢ်ဘံၣ်တၢ်ဘၢအဃိန့ၣ်လီၤ. ပီးလီတဖၣ် အပှ့ၤကလံၤဆံးစှၤန့ၣ်, ထုးန့ၢ်ၦၤၦ့ၤဒီးစူးကါတၢ်တဖၣ်အဃိ, ဒ်သိးကပလီၢ်အသးလၢတၢ်ဟ့ၣ်ပလီၢ်အပနီၣ်အဂီၢ် လီၤတိၢ်ဝဲဒၣ်န့ၣ်လီၤ. တၢ်ကျၢၢ်ဘၢကပြုၢ်ကပြီၤလၢခိန့ၣ် ဖျါဂ့ၤဝဲန့ၣ်လီၤ.

ကစၢ်ယ့ၣ်ၡူး စံးကတိၤတၢ်အဆူၣ်ကတၢၢ်တနီၤန့ၣ်, ပညိၣ်ဝဲဆူ တၢ်ဘူၣ်တၢ်ဘါခိၣ်နၢ်သရၣ်တဖၣ်, မ့ၢ်လၢတၢ်သံၣ်သူမီၤကျာ် လၢအဝဲသ့ၣ်အတၢ်အိၣ်မူအပူၤ, ဒီးလၢခိတၢ်ချၢန့ၣ်ကးဘၢဝဲလၢ တၢ်ဂ့ၤတၢ်ဝါအဃိ, ပာ်ဒ့ၣ်ပာ်ကမၣ်ဝဲဒၣ် န့ၣ်လီၤ. မး ၂၃:၂၇ အပူၤန့ၣ် ကစၢ်ယ့ၣ်ၡူးစံးလၢ “သုလီၤဂၥ်တၢ်သွၣ်ခိၣ်လၢအဖှူဝါအသး”- “အချၢအလိၤန့ၣ် ဖျါဝဲဒီးအဃံအလၤလီၤ, မ့မ့ၢ်အပူၤန့ၣ်ၦဲၤဝဲဒီးၦၤသံ အဃံအကွဲ” န့ၣ်လီၤ. အဆၢဖိ ၂၃, စံးဘၣ်ပှၤလၢ, အဝဲသ့ၣ်ကဘၣ်အိၣ်မူပိၥ်ထွဲ “တၢ်စံၣ်ညီၣ်တီ, ဒီးတၢ်သးကညီၤႇ ဒီးတၢ်သူၣ်တီသးတီ” အလီၢ်န့ၣ်, အဆၢဖိ ၂၅ ပာ်ဖျါဝဲလၢ အဝဲသ့ၣ်အသးစၢၢ်ဆၢထဲဒၣ်လၢ တၢ်ဖျါဂ့ၤလၢခိ- တၢ်မၤကဆှီ “လီခီအချၢ”- ဘၣ်ဆၣ်, တမၤကဆှီ “တၢ်သးကွံ, ဒီးတၢ်လူၤပိာ်ထွဲတၢ်ဘၣ်အသး” တဖၣ် လၢအကိပူၤဘၣ်န့ၣ်လီၤ.

တၢ်ဟဲစိၥ်ပတၢ်ဒဲးဘး, ဒီးပတၢ်ဘၣ်ဒိဘၣ်ထံးတဖၣ် ဆူယွၤအအိၣ် လၢတၢ်သးတီအလီၢ်န့ၣ် ပပၥ်ဖှိၣ်ပတၢ်သးစၢၢ်ဆၢလၢ တၢ်ဖျါဃံလၤလၢခိအလိၤန့ၣ် ညီဒိၣ်မး လၢပဂီၢ်န့ၢ်လီၤ. ဘၣ်ဆၣ်တၢ်ဖျါဃံလၤလၢခိန့ၣ် တမၤဆံးလီၤစှၤလီၤ တၢ်လီၤဘၣ်ယိၣ်လၢသးအတတီတတြၢ်တဖျၢၣ်အဂီၢ်ဘၣ်. ၁ ယိၤ ၁:၉ န့ၣ် ကစၢ်ယွၤ ကွဲမုၥ်ၦၤ, ဒ်သိး ပဝဲခဲလၢာ်, ပကပျဲအဝဲ ဆီတလဲတၢ်အၢတၢ်သီလၢပသးကံၢ်ပူၤန့ၣ်လီၤ.