“ထူၣ်စူညါစီဆှံ တၢ်ဘါသရိၥ်” (Chapel of the Holy Cross) ဖိန့ၣ် ဆၢထၢၣ် အိၣ်ဂၢၢ်ဆိးကျၢၤလၢ စံၣ်ဒိနါ (Sedona) ကစၢၢ်ဖါဂီၤ, လၢကီၢ်စဲၣ် အရံၣ်စိနါ (Arizona) န့ၣ်လီၤ. ဖဲယလဲၤနုၥ်လီၤဆူသရိၥ်ဆံးဖိအပူၤ, ဒီးတကီၢ်ခါန့ၣ်, ယထံၣ် တၢ်ဂီၤစိးပျၤလၢအမ့ၢ် တၢ်ပျၤထီ ကစၢ်ယ့ၣ်ၡူးလၢထူၣ်စုညါလီၤလီၤဆီဆီန့ၣ်လီၤ. ဒ်ညီနုာ်ထူၣ်စုညါအလီၢ်န့ၣ် ဘၣ်တၢ်ပျၤထီကစၢ်ယ့ၣ်ၡူးလၢ သ့ၣ်တထံးလၢအအိၣ်ဒီး သ့ၣ်ထူၣ်မိၢ်ၦၢ် ခံမုၢ်အဒ့လိၤန့ၣ်လီၤ. သ့ၣ်ထူၣ်မိၢ်ၦၢ်ဃ့ထီကၠီး လၢအဒါလီၤသးဘျၢဘျၢန့ၣ်, ပာ်ဖျါထီၣ် တၢ်အဒိ ဘၣ်ထွဲဒီးၦၤအံၣ်စရ့လးဖိအဒူၣ် လၢအတတူၢ်လိၥ် ကစၢ်ယ့ၣ်ၡူး လၢလံၥ်စီဆှံလီၢ်လံၤတကတြူၢ်အပူၤန့ၣ်လီၤ. သ့ၣ်ထူၣ်မိၢ်ၦၢ်အဂၤတမုၢ်လၢအမူ, ဒီးအဒ့အတြၢ်တဖၣ်, ဒီးအိၣ်ဆၢထၢၣ်ဘျၢဘျၢန့ၣ် ဟ့ၣ်ထီၣ်တၢ်အပနီၣ်လၢအမ့ၢ် ယူဒၤအဒူၣ်, ဒီးစီၤပၤဒၤဝံး အတၢ်လီၤစၢၤ အတၢ်ဒိၣ်ထီၣ်ထီထီၣ်အဂ့ၢ်န့ၣ်လီၤ.

တၢ်ဂီၤစိးပျၤ ဟ့ၣ်ဒိအံၤ အိၣ်ဒီးအခီပညီလီၤဆီ လၢအပၥ်ဖျါဒုးနဲၣ်ဝဲလၢလံၥ်စီဆှံ အလီၢ်လံၤအပူၤ ဝံစံးကတိၤဆိပၥ်တၢ်, တၢ်လၢအကါဒိၣ်, တၢ်လၢအဘၣ်ထွဲဒီးကစၢ်ယ့ၣ်ၡူးအဂ့ၢ်န့ၣ်လီၤ. ယူဒၤအဒူၣ်ဖိထၢဖိတဖၣ် ဘၣ်တၢ်စိၥ်မၢကဲကုၢ်ဘၣ်ဆၣ်, ဒ်သိးပှၤဂီၢ်မုၢ် ကအိၣ်ဒီးတၢ်မုၢ်လၢ်အဂီၢ်, ဝံယံးရမံယၤ စံးကတိၤလီၤ တၢ်ကစီၣ်အိၣ်ဟဲလၢယွၤ- “ယကမၤတၢ်ဂ့ၤတမံၤလၢယစံးပၥ် ၦၤအံၣ်စရ့လးဖိ, ဒီးၦၤယူဒၤဖိလီၤ” (ယံး ၃၃:၁၄) န့ၣ်လီၤ. ဒီးအဆၢဖိ ၁၅ န့ၣ်, “ယကဒုးမဲထီၣ်တၢ်တီအဒ့တဒ့ (ၦၤအုၣ်ခီၣ်တၢ်တဂၤ) လၢစီၤဒၤဝံး, ဒီးကမၤတၢ်စံၣ်ညီၣ်, ဒီးတၢ်တီတၢ်လိၤလၢဟီၣ်ခိၣ်ချၢလီၤ” န့ၣ်လီၤ. ကျိၤကျဲတဘိလၢၦၤဂီၢ်မုၢ်တဖၣ် ကသ့ၣ်ညါၦၤအုၣ်ခီၣ်တၢ်တဂၤအံၤ အတၢ်မ့ၢ်တၢ်န့ၣ် အဝဲ “ကမဲထီၣ်တၢ်အဒ့တဒ့လၢ စီၤဒၤဝံးအစၢၤအသွဲၣ်,” အခီပညီန့ၣ် ၦၤအုၣ်ခီၣ်တၢ်တဂၤအံၤ ကမ့ၢ်ဝဲ စီၤပၤဒၤဝံးအနီၢ်ခိအနီၢ်ကစၢ် အစၢၤအသွဲၣ်န့ၣ်လီၤ.

တၢ်မ့ၢ်တၢ်တီ လၢအကါဒိၣ်တမံၤန့ၣ် တၢ်ဂီၤစိးပျၤအံၤ ပာ်ဖျါထီၣ်ဝဲ လၢကစၢ်ယ့ၣ်ၡူးအတၢ်လီၤစၢၤလီၤသွဲၣ်အပူၤ, ကစၢ်ယွၤန့ၣ်တီဝဲလိၤဝဲ, ဒီးကမၤတၢ်ခဲလၢၥ်လၢ အအၢၣ်လီၤပၥ်ဝဲတဖၣ်လီၤ. တကးဒံးဘၣ်န့ၣ်, ခါလၢပူၤအကွံၥ် ယွၤအတၢ်တီတၢ်လိၤန့ၣ် မ့ၢ်တၢ်မၤဂၢၢ်မၤကျၢၤက့ၤပှၤလၢ ခါဆူညါတၢ်မၤလၢၦဲၤ အတၢ်အၢၣ်လီၤအီလီၤတဖၣ်အဂီၢ်, ကတီဝဲ လိၤဝဲစ့ၢ်ကီးလီၤန့ၣ် မ့ၢ်တၢ်ဒုးသ့ၣ်နီၣ်က့ၤပှၤန့ၣ်လီၤ.