ဖဲ ၁၉၂၁ နံၣ်န့ၣ်, ၦၤသ့စိးပျၤတၢ် စဲၣ်မ် ရိဒံၢ်ယၣ် (Sam Rodia) စးထီၣ်ဘှီထီၣ်ဝဲ ဝးစ် တၢးထီ (Watts Towers) န့ၣ်လီၤ. သၢဆံသၢနံၣ်ပူၤကွံၥ်ဝံၤအလီၢ်ခံႇ က့ၢ်ဂီၤ စိးပျၤတဆံနွံထံၣ် အိၣ်ဆၢထၢၣ်ထီန့ၢ် Los Angeles မံထၢၣ်သၢဆံန့ၣ်လီၤ. ၦၤဒ့တၢ်အူတၢ်ဖိ ကၠဲရံၣ် ကၤစံၣ်ယၣ် (Jerry Garcia) ဆိကမိၣ်ဆံး ရိဒံၢ်ယၣ် အသးသမူဒီစိၤအတၢ်မၤအံၤန့ၣ်လီၤ. ကၤစံၣ်ယၣ် စံးဝဲဒၣ်လၢ ““တၢ်အကတၢၢ်အစၢ, လၢအဟဲအိၣ်ထီၣ်ဝဲ ဖဲနသံပူၤကွံၥ်ဝံၤအလီၢ်ခံ” န့ၣ်လီၤ. အဝဲစံးကဒီးဝဲလၢ “ဝိ .. တၢ်မၤဒ်သိးအံၤန့ၣ်တမ့ၢ်လၢယဂီၢ်ဘၣ်” န့ၣ်လီၤ.

မ့မ့ၢ် ကၤစံၣ်ယၣ် အဂီၢ် တၢ်အကတၢၢ်အစၢန့ၣ် ကမ့ၢ်တၢ်မနုၤလဲၣ်. ၦၤလၢအဒ့ သကိးတၢ်ဒီးအီၤ ဘီး ဝံၤယၤ (Bob Weir) ပၥ်ဖျါဖှိၣ်ထီၣ် အဝဲသ့ၣ်အတၢ်ထံၣ်- “တၢ်ကသ့ၣ်နီၣ်ထီၣ်နၤ ခါဆူညါလီၤထူလီၤယိာ်အဂီၢ်, တၢ်တအိၣ်နီၤတမံၤဘၣ်. လၢတၢ်န့ၣ်အဃိ, ပကမုၥ်လၤသးခုသကိး ပတၢ်အိၣ်မူ” န့ၣ်လီၤ.

ဘၣ်တဘျီန့ၣ်, ၦၤကဲဒိၣ်, ၦၤကူၣ်သ့တဂၤ ကျဲးစၢးဃုထံၣ်ဝဲ “တၢ်အကတၢၢ်အစၢ,” ခီဖျိမၤဝဲ တၢ်လၢအမၤဝဲသ့တဖၣ်ခဲလၢၥ်န့ၣ်လီၤ. အဝဲကွဲးပာ်ဖျါလၢ စံၣ်တဲၤတဲ ၂:၁ အပူၤ, “ယစံးလၢယသးကံၢ်ပူၤ, ဟဲ, ယကမၤကွၢ်နၤလၢတၢ်နံၤတၢ်အ့လီၤ. မၤသးဒ်န့ၣ်ဒီးမုၥ်လၤတၢ်လၢတၢ်ဂ့ၤတက့ၢ်,” ဘၣ်ဆၣ်, အဆၢဖိ ၁၆ န့ၣ် အဝဲကွဲးနီၣ်ဝဲလၢ “အဂ့ၢ်ဒ်အံၤတၢ်သ့ၣ်နီၣ်ထီၣ်က့ၤၦၤကူၣ်တၢ်သ့အါန့ၢ်ၦၤဟးဂီၤဖိႇ တအိၣ်ဘၣ်လီၤထူလီၤယိၥ်ဘၣ်” န့ၣ်လီၤ. ဒဒီးအဆၢဖိ ၁၇ န့ၣ် မၤကတၢၢ်က့ၤဝဲလၢ “ကယဲၢ်တၢ်မၤလၢအမၤအသးလၢမုၢ်အဖီလၥ်မ့ၢ်တၢ်အၢလၢယမဲၥ်ညါ” န့ၣ်လီၤ.

ကစၢ်ယ့ၣ်ၡူး အတၢ်အိၣ်မူ, ဒီးအတၢ်ကစီၣ်တဖၣ်န့ၣ် ထီဒါလိာ်အသးဒီးၦၤအိၣ်မူအိၣ်ဂဲၤ လၢတၢ်ထံၣ်အဖုၣ်တဖၣ်န့ၣ်လီၤ. ယိၤ ၁၀:၁၀ စံးဘၣ်ပှၤလၢ ကစၢ်ယ့ၣ်ၡူးဟဲဝဲ ဒ်သိးကဟ့ၣ်ၦၤ “တၢ်မူ, ဒီးကန့ၢ်ဘၣ်အါအါကလဲၥ်,” ဒီးသိၣ်လိၦၤ ဒ်သိးပကအိၣ်မူ တၢ်အိၣ်မူခ့ခါခဲအံၤ လၢအအိၣ်ဒီးတၢ်ထံၣ်ခါဆူညါအဂီၢ်န့ၣ်လီၤ. မး ၆:၁၉-၂၀ အပူၤန့ၣ် ကစၢ်ယ့ၣ်ရှူး စံးဝဲလၢ “သုတပၥ်ဖှိၣ် သုတၢ်လုၢ်ဒိၣ်ၦ့ၤဒိၣ်လၢဟီၣ်ခိၣ်……..တဂ့ၤ, ပၥ်ဖှိၣ်သုတၢ်လုၢ်ဒိၣ်ၦ့ၤဒိၣ်လၢမူခိၣ်” န့ၣ်လီၤ. အကတၢၢ်, ဖဲအဆၢဖိ ၃၃ န့ၣ် ကစၢ်ယ့ၣ်ရှူး ကတိၤကျၢၢ်တံၢ်ဝဲလၢ “ဃုဆိယွၤအဘီအမုၢ်ဒီးအတၢ်တီတၢ်လိၤ, ဒီးတၢ်ကပၥ်ဖှိၣ်တၢ်န့ၣ်တဖၣ် ခဲလၢၥ်လၢသုလီၤ” န့ၣ်လီၤ.

တၢ်အံၤန့ၣ်, မ့ၢ်တၢ်အကတၢၢ်အစၢ- တၢ်အိၣ်မူ လၢမုၢ်အဖီလၥ်, ဒီးတၢ်အိၣ်မူလၢ အလဲၤပူၤကွံၥ်ဟီၣ်ခိၣ်, ခံမံၤလၢၥ်အဂီၢ်န့ၣ်လီၤ.