ဒ် “ဒဲဘၢၣ် နါကဲးစ်” (Denver Nuggets) ၦၤလိၥ်ကွဲ ဖျၢၣ်သွ့ ချၢးဘ် အပှၤစံးကတိၤပာ်ဖျါရၤလီၤတၢ်ကစီၣ်တဂၤအသိး, အဝဲသ့ၣ်အတၢ်အိၣ်ဖှိၣ်သရၣ် ကဲလ် စပဲလၢၢ် (Kyle Speller) န့ၣ်, အါတက့ၢ် ပှၤသ့ၣ်ညါအီၤ ခီဖျိလၢတၢ်သူၣ်ပိၢ်သးဝးဖးဒိၣ်အပူၤ, အတၢ်ကိးသတြီပာ်ဖျါ တၢ်လိာ်ကွဲ ဖျၢၣ်သွ့အဂ့ၢ် ဆူကမျၢၢ်တဖၣ်အအိၣ်ဖဲ တၢ်သတြီၤ ဖျၢၣ်သွ့ချၢးဘ် စဲၣ်နီၤအတၢ်လိၥ်ကွဲတဖၣ်အကတီၢ်န့ၣ်လီၤ. တုၤအဝဲကိးထီၣ် ‘မ်ပကစးထီၣ်တၢ်လိာ်ကွဲလီၤ’ လၢမဲးခ် (ကလုၢ်ဒၢ) အပူၤန့ၣ်, ၦၤသးစဲတၢ်လိာ်ကွဲ ဖျၢၣ်သွ့ (NBA) လၢအကထိတဖၣ်လၢအအိၣ်ဖဲတၢ်လိၥ်ကွဲအလီၢ်ဃုၥ်ဒီးၦၤကွၢ်ခိးကနၢ်တၢ်လၢအကကွဲၢ်တဖၣ် ကိးဆၢက့ၤအကလုၢ်ဆူ စပဲလၢၢ် န့ၣ်လီၤ. လၢတၢ်အံၤ အဃိအဝဲဘၣ်တၢ်ဃုထၢထီၣ်အီၤဒ် ၂၀၂၂ နံၣ်, ပှၤစံးကတိၤပာ်ဖျါရၤလီၤတၢ်ကစီၣ်အဂ့ၤကတၢၢ်တဂၤ (All-Star Game PA Announcer) အသိးန့ၣ်လီၤ. စပဲလၢၢ်စံးဝဲဒၣ်လၢ “ယသ့ၣ်ညါကမျၢၢ်တဖၣ်အတၢ်အိၣ်သး, ဒီးဟံၣ်ကစၢ်အပှၤလိၥ်ကွဲတၢ်ဖိ, ဒီးကမျၢၢ်လၢအဟဲကွၢ်တၢ်တဖၣ်အဂီၢ်, ယကဘၣ်မၤတၢ်မနုၤလဲၣ်န့ၣ်ယသ့ၣ်ညါလီၤ.” တၢ်လၢအဂ့ၤဒိၣ်ဝဲတမံၤန့ၣ် အတၢ်သ့စံးကတိၤတၢ်ခဲလၢာ်, လၢအဘၣ်တၢ်ပၥ်ဖျါဝဲလၢ ကွဲၤထံၣ်ဟူ,ဒီးကွဲၤလ့လိၤတဖၣ်န့ၣ် မ့ၢ်တၢ်မၤလၤကပီၤကစၢ်ယွၤအဂီၢ်န့ၣ်လီၤ. စပဲလၢၢ် ပာ်ဖျါအါထီၣ်ဝဲလၢ “အဝဲမၤတၢ်ခဲလၢၥ် လၢကမျၢၢ်ထဲတဂၤဧိၤ ဒ်အမ့ၢ်ယွၤအဂီၢ်” န့ၣ်လီၤ.

တၢ်သကဲၥ်ပဝးတမံၤဃီဒ်သိးအံၤန့ၣ် စီၤပီလူး ကတိၤလီၤဝဲဆူ ကလီးစဲတၢ်အိၣ်ဖှိၣ်, မ့ၢ်လၢတၢ်အိၣ်ဖှိၣ်ဖိတဖၣ် အသးဒ့ဒီလၢ ကစၢ်ခရံၥ်မ့ၢ်ယွၤ, ဒီးအပၢဆှၢတၢ်အစိကမီၤအဖီခိၣ်, တုၤဒၣ်လဲၣ်အိၣ်ဖျါလၢ အဝဲသ့ၣ်အတၢ်အိၣ်မူအပူၤန့ၣ်လီၤ. စီၤပီလူးကွဲးပာ်ဖျါဝဲလၢ ကလီး ၃:၁၇ အပူၤ, “ကယဲၢ်သုမၤတၢ်န့ၣ်လၢတၢ်ကတိၤမ့ၢ်ဂ့ၤ, လၢတၢ်မၤမ့ၢ်ဂ့ၤ, မၤတၢ် ခဲလၢၥ်လၢကစၢ်ယ့ၣ်ၡူးအမံၤ, ဒီးစံးထီၣ်ပတြၢၤပၢ်ယွၤလၢအဝဲဒၣ်အဃိတက့ၢ်” န့ၣ်လီၤ.

အဆၢဖိ ၂၃ န့ၣ် စီၤပီလူးစံးကဒီးဝဲ “ဒီးကယဲၢ်သုမၤတၢ်တမံၤလၢ်လၢ်, မၤလၢ သူၣ်ကံၢ်သးလဲဒ်လၢကစၢ်အသိးႇ ဒီးတမ့ၢ်ဘၣ်ဒ်လၢၦၤကညီအသိးဘၣ်တက့ၢ်” န့ၣ်လီၤ. ကဲလ် စပဲလၢၢ် အဂီၢ် မူဒါန့ၣ် စံးဝဲလၢ “ၦၤလိၥ်ကွဲတၢ်ဖိအကရၢ အတၢ်အိၣ်ဖှိၣ်သရၣ်တဂၤ အတၢ်မၤအံၤ မ့ၢ်ယတၢ်ပညိၣ်လၢဟီၣ်ခိၣ်အံၤ… ဒီးတၢ်ဘိးဘၣ်ရၤလီၤအတၢ်မၤန့ၣ်မ့ၢ်တၢ်မၤလၢအဆံးအစှၤန့ၣ်လီၤ.” ပတၢ်မၤလၢ ကစၢ်ယွၤအဂီၢ်န့ၣ် ကဆၢစ့ၢ်ကီးဝဲဒၣ်လၢ ကမျၢၢ်ထဲတဂၤဧိၤအဂီၢ်န့ၣ်လီၤ.