ဖဲ ကၠ့ၣ် အၣ် အၣ် ထိၣ်လ်က့ၣ် (J.R.R Tolkien) အလံၥ် The Fellowship of the Rings အပူၤန့ၣ် ဘံၣ်လ်ဘိၣ် ဘးက့ၣ် (Bilbo Baggins) စးထီၣ်ဒုးနဲၣ် တၢ်လၢအဟဲမၤဘၣ်ဒိအီၤ ခီဖျိလၢတၢ်စိၥ်ဒိးဃာ် တၢ်မၤကဒါမဲၥ်ပသံးတဘိ, လၢအအိၣ်ဒီးတၢ်ခံးအစိကမီၤ, လၢအနံၣ်ဃုဆံအတီၢ်ပူၤန့ၣ်လီၤ. ခီဖျိအန့ဆၢၣ်လၢ တၢ်ထီၣ်အ့ၣ် ကယီကယီ, ဒီးထုးလီၤတယၢၢ်အီၤအဃိ, အဝဲစံးဘၣ် ကါန်ဒး (Gandalf), ပှၤအူသမူသယၢ်တၢ်တဂၤလၢ “ဘၣ်မနုၤလၢတၢ်မၤအသးဒီးယၤဘူသလါဒီဂၤႇ တၢ်ထုးယူၥ်သးဒ်သိးအံၤတကလုၥ်ႇ တၢ်လၢယအဲၣ်ဒိးစံးမနုၤလဲၣ်န့ၣ် မ့ၢ်နသ့ၣ်ညါဧါ- တၢ်မၤသးဒ်ဝံၣ်သိစီ (ထီဘး) ဘၣ်တၢ်ကွးစီကွံၥ်လၢကိၣ်လိၤအသိးန့ၣ်လီၤ.” အဝဲပၥ်လီၤအသးလၢ ကပၥ်တ့ၢ်ဟံၣ်ဃီ, ဒ်သိးကလူၤဃုန့ၢ် တၢ်အိၣ်ဘှံးအိၣ်သါအလီၢ် တတီၤတီၤ, တၢ်လီၢ်လၢ “အမုၥ်အပၢၤ, ဒီးတၢ်အိၣ်ဘှ့ၣ်အိၣ်ဘှီၣ်, တအိၣ်ဒီးဘူးတံၢ်အါမး လၢအဃုသ့ၣ်ညါ တၢ်လၢတဘၣ်ဃးဒီးအီၤတဖၣ်အိၣ်ဝးတရံးဘၣ် အလီၢ်အကျဲ” န့ၣ်လီၤ.

ဒ် ထိၣ်လ်က့ၣ် အဂ့ၢ်အကျိၤအသိးအံၤ မၤသ့ၣ်နီၣ်ယၤ, လၢလံၥ်စီဆှံအလီၢ်လံၤပူၤ ဝံတဂၤ အတၢ်လဲၤခီဖျိန့ၣ်လီၤ. ဝံအ့ၤလံယၤ လီၤဘှံးလီၤတီၤ ခီဖျိလၢတၢ်တၤလိၥ်သးဒီး ဘဧၤလးအဝံတဖၣ်ဝံၤအလီၢ်ခံန့ၣ်ဒီး, ဘၣ်ဃ့ၢ်ပူၤဖျဲးအသးသမူ လၢနီၢ်အံၤစ့ဘ့ၤလး အတၢ်လူၤမၤသံအီၤအကတီၢ်, အဝဲလိၣ်ဘၣ်ဝဲတၢ်အိၣ်ဘှံးအိၣ်သါဒိၣ်ဒိၣ်မုၢ်မုၢ်န့ၣ်လီၤ. ဝံတူၢ်ဘၣ်ဝဲလၢ ကယဲၢ်နီၢ်ခိနီၢ်သးဂံၢ်ဘါတဖၣ်လၢၥ်ကွံၥ်ဝဲခဲလၢာ်အဃိ, အကသံဝဲအဂီၢ်, ဃ့ဝဲကစၢ်ယွၤ, ဒီး ၁ စီၤပၤ ၁၉:၄ အပူၤန့ၣ် စံးဝဲ, ‘အါလံႇ ခဲကနံၣ်အံၤယွၤဧၢႇ ဟံးထီၣ်ယသးတက့ၢ်’ န့ၣ်လီၤ.. ဖဲအမံသပ့ၤဘၣ်အသးန့ၣ်, ယွၤအကလူး ထိးဘၣ်အီၤ, ဒီးစံးဘၣ်အီၤ ဂဲၤဆၢထၢၣ်အီၣ်တၢ်တက့ၢ်န့ၣ်လီၤ. အဝဲမံကဒီးတဘျီႇ ဒီးအီၣ်အါထီၣ်ဝဲ တၢ်အီၣ်လၢ ကလူးဟ့ၣ်အီၤန့ၣ်လီၤ. ဒ်သိးကလဲၤဝဲ ‘အသီလွံၢ်ဆံအတၢ်လဲၤ’ ဆူကစၢ်ယွၤအကစၢၢ်အဂီၢ်ဂံၢ်ဘါၦဲၤထီၣ်ကဒါက့ၤဝဲဒၣ်န့ၣ်လီၤ.

ဖဲလၢပဘၣ်တၢ်ကွးတြူၤကွံၥ်ၦၤဘူသလါ, ဒီးလီၤဘှံးလီၤဘှါ, ဂံၢ်ဘါလၢာ်လီၤစၢ်ဝဲအကတီၢ်, လၢတၢ်ကမၤသီထီၣ်က့ၤပှၤနီၣ်နီၢ်အဂီၢ် ပကွၢ်ထီၣ်ဆူယွၤအအိၣ် သ့ဝဲစ့ၢ်ကီး န့ၣ်လီၤ. ဖဲလၢပဃ့ကစၢ်ယွၤ ဒ်သိးကမၤၦဲၤၦၤ လၢအတၢ်မုၢ်လၢ်, အတၢ်ဃူတၢ်ဖိးႇ ဒီးအတၢ်အိၣ်ဘှံးအကတီၢ်န့ၣ်, ပကလိၣ်ဘၣ်သ့ၣ်သ့ၣ်လၢ တၢ်ကွၢ်ထွဲပနီၢ်ခိနီၢ်ကစၢ်တဖၣ် စ့ၢ်ကီးန့ၣ်လီၤ. ဒ်ယွၤအကလူး ကွၢ်ထွဲ ဝံအ့ၤလံယၤအသိးႇ မး ၁၁:၂၈ စံးဘၣ်ပှၤလၢကစၢ်ယွၤကသုးကျဲၤန့ၢ်ပှၤ တၢ်အိၣ်ဘှံးလၢပဂီၢ်န့ၣ်လီၤ.