ဖဲလါယူၤ ၂၀၂၃ အနံၣ်န့ၣ် တၢ်ထံၣ်န့ၢ်က့ၤ ၦၤဒီပုၢ်ဝဲၢ်ဖိလွံၢ်ဂၤလၢ အသးအိၣ်တနံၣ်ဒီးတုၤတဆံသၢနံၣ်တဖၣ် အိၣ်မူအိၣ်ဂဲၤဒံး လၢ ကီၢ် ကိၣ်လၤဘံၣ်ယၢၤ (Colombia) အမ့ၣ်စိၣ် (Amazon) သ့ၣ်ၦၢ်ဖးဒိၣ်အပူၤအဃိ, ဟီၣ်ခိၣ်ဒီဘ့ၣ်ကမၢကမၣ်ဘၣ်အသးန့ၣ်လီၤ. ဖဲကဘီယူၤလီၤတဲၥ်ဒီးအမိၢ် သံဝံၤအလီၢ်ခံန့ၣ်, ဒီပုၢ်ဝဲၢ်ဖိလွံၢ်ဂၤအံၤ ဘၣ်အိၣ်မူအိၣ်ဂဲၤဝဲလၢ သ့ၣ်ၦၢ်ဖးဒိၣ်အပူၤ အနံၤအသီလွံၢ်ဆံန့ၣ်လီၤ. ဖိသၣ်သ့ၣ်တဖၣ်အံၤ, မ့ၢ်လၢအညီနုၢ်အိၣ်မူအိၣ်ဂဲၤလၢၦၢ်လၢ်ကျါ အဟီၣ်ခိၣ်လီၢ်ကဝီၤဒ်သိးအံၤအဃိႇ ဒ်သိးဒီးဆၣ်ဖိကီၢ်ဖိအမံၤ တဖၣ်အသုတအီၣ်အဝဲသ့ၣ်အဂီၢ်, ဘၣ်အိၣ်ခူသူၣ်လၢ သ့ၣ်အထူၣ်မိၢ်ၦၢ်လိၤ, ဘၣ်ပၥ်ဖှိၣ်ထံကျိဖိအထံႇ ဒီးမူခိၣ်ထံတဖၣ် လၢပလီဖိတဖၣ်အပူၤႇ ဒီးလူၤဃုအီၣ်အီ တၢ်အီၣ်လၢ ကဘီယူၤဟးဂီၤအကူၥ်အက့တဖၣ်အကျါန့ၣ်လီၤ. သ့ၣ်သၣ်, ဒီးတၢ်အချံလၢ ပှၢ်လၢ်ကျါတဖၣ်, ပှၤအီၣ်ဝဲ သ့, တသ့န့ၣ် အဝဲသ့ၣ်တဖၣ်သ့ၣ်ညါဝဲစ့ၢ်ကီးန့ၣ်လီၤ.

ကစၢ်ယွၤစိၥ်မူစိၥ်ဂဲၤၦၤဒီပုၢ်ဝဲၢ်ဖိတဖၣ်အံၤန့ၣ်လီၤ.

အဝဲသ့ၣ်အဂ့ၢ်အကျိၤဖိ လၢအလီၤကမၢကမၣ်အံၤ ဒုးသ့ၣ်နီၣ်ထီၣ်က့ၤယၤလၢတၢ်လီၤလိၢ်လီၤလးအပူၤ, ကစၢ်ယွၤ စိၥ်မူစိာ်ဂဲၤ ၦၤအံၣ်စရ့လးဖိတဖၣ်လၢၦၢ်မုၢ်ကနၢ အနံၣ် ၄၀ အဂ့ၢ်န့ၣ် ဘၣ်တၢ်ကွဲးနီၣ် ဖဲလံၥ် ၂မိၤရှ့ တုၤ ၄ မိၤရှ့အပူၤ, ဒီးဘၣ်တၢ်ပၥ်ဖျါလၢလံၥ်စီဆှံဒီတဘ့ၣ်အပူၤန့ၣ်လီၤ. ယွၤပၥ်မူပၥ်ဂဲၤ ၦၤအံၣ်စရ့လးဖိတဖၣ် ဒ်သိးအပှၤဂီၢ်မုၢ်ကသ့ၣ်ညါဝဲလၢ အဝဲမ့ၢ်အဝဲသ့ၣ်အကစၢ်ယွၤန့ၣ်လီၤ.

ကစၢ်ယွၤ ဆီတလဲ ထံအခၣ်, ဒီးဒုးကဲထီၣ်ဝဲထံလၢၦၤအီသ့ႇ ဟ့ၣ်လီၤထံလၢလၢၢ်ပူၤခံဘျီႇ ဒီးနဲၣ်ဆှၢအၦၤဂီၢ်မုၢ် ခီဖျိလၢတၢ်အၢၣ်အထူၣ်လၢနံၤအဂီၢ်, ဒီးမ့ၣ်အူအထူၣ်လၢနၤအဂီၢ်န့ၣ်လီၤ. အပှၤဂီၢ်မုၢ်ကအီၣ်တၢ်အဂီၢ် ယွၤဟ့ၣ်လီၤဝဲကိၣ်မၤနၤစ့ၢ်ကီးန့ၣ်လီၤ. ၂ မိၤရှ့ ၁၆:၁၅-၁၆ အပူၤန့ၣ် စီၤမိၤရှ့စံးဘၣ် ပှၤဂီၢ်မုၢ်လၢ “အဝဲအံၤမ့ၢ်ကိၣ်လၢယွၤဟ့ၣ်လီၤလၢ သုအီၣ်တၢ်အဂီၢ်လီၤ. ဒီးအအံၤမ့ၢ်တၢ်လၢ ယွၤမၤလိၥ်ႇ ထၢထီၣ်န့ၢ်ကိးဂၤဒဲးဒ်အအီၣ်လၢအီၣ်တၢ်အသိးႇ …” န့ၣ်လီၤ.

မး ၆:၁၁ ပာ်ဖျါဝဲလၢ ယွၤတဂၤဃီအံၤ ဟ့ၣ်လီၤၦၤ “ကိၣ်လၢတနံၤဘၣ်တနံၤအဂီၢ်” န့ၣ်လီၤ. တၢ်လၢပလိၣ်တဖၣ်ယွၤကကတဲာ်ကတီၤန့ၢ်ၦၤလီၤန့ၣ် ပနၥ်န့ၢ်အီၤသ့ဝဲဒၣ်, ဒီးဖံ ၄:၁၉ စံးဘၣ်ပှၤ, “ဒ်အလၤကပီၤအတၢ်ထူးတၢ်တီၤအသိး…ယကစၢ်ကဟ့ၣ်လီၤသု လၢယ့ၣ်ၡူးခရံၥ်အပူၤလီၤ” န့ၣ်လီၤ. ကစၢ်လၢပမၤအတၢ်တဂၤအံၤ မ့ၢ်ယွၤသ့တၢ်လၢၥ်တဂၤန့ၣ်လီၤ.