ဘၣ်ဖဲမုၢ်တဂီၤန့ၣ်, ခါဆူညါ နံၣ်လၢအကဟဲအဂီၢ်, ယဆိကမိၣ်ထံ, ဒီးထုကဖၣ်တၢ် အကတီၢ်, တၢ်ကတိၤဖိ “လဲၤတၢ်လၢတၢ်သးခုအတၢ်ချ့အပူၤတက့ၢ်” အံၤဟဲနုၥ်လီၤဆူ ယသးပူၤ, ဒီးတၢ်ကတိၤအံၤ, ဖျါကြၢးဝဲဘၣ်ဝဲလၢယဂီၢ်န့ၣ်လီၤ. ယသးဆူၣ်ဖံးတၢ်မၤတၢ် အါတလၢန့ၣ် ဟံးထီၣ်ကွံာ်ယတၢ်သးခုတလီၢ်လီၢ်န့ၣ်လီၤ. လၢတၢ်န့ၣ်အဃိ, ဒ်တၢ်ပိၥ်ထွဲတၢ်ကတိၤနဲၣ်ကျဲအံၤအသိးႇ နံၣ်လၢအကဟဲန့ၣ် ယပၥ်လီၤယသး, ဒ်သိးယကမၤတၢ်လၢတၢ်သူၣ်ခုသးခုအပူၤႇ ဒီးဟ့ၣ်တၢ်ဆၢကတီၢ်လၢ တံၤသကိးတဖၣ်, ဒီးဟူးဂဲၤ ဖံးမၤတၢ်လၢအလီၤသးခုတဖၣ်အဂီၢ်န့ၣ်လီၤ.
တၢ်ရဲၣ်တၢ်ကျဲၤအံၤကဲဘျုးဝဲ တုၤလါမၢ်ၡးတစုန့ၣ်လီၤ. ဒီးယမၤသကိးတၢ်ဒီး ဖၠၣ်စိမိၤ တဖျၢၣ် လၢတၢ်သိၣ်လိကွၢ်ထွဲ တၢ်မၤလိအဂ့ၢ်မိၢ်ပှၢ်တခါ လၢယသုးကျဲၤ ဒုးအိၣ်ထီၣ်န့ၣ်လီၤ. တယံၥ်ဘၣ်န့ၣ် လၢတၢ်တူၢ်လိၥ်ကွဲးနုၥ် ၦၤမၤလိတၢ်ဖိအမံၤႇ ဒီးတၢ်ကတဲာ်ကတီၤဟ့ၣ်တၢ်သိၣ်လိသီလိအဂီၢ်, ယဘၣ်မၤတၢ်လၢ တၢ်ဆၢကတီၢ်ဖးယံာ်ဖးထီအပူၤန့ၣ်လီၤ. ခဲကနံၣ်အံၤ, ယကလဲၤတၢ်လၢ တၢ်သူၣ်ခုသးခုအတၢ်ချ့အပူၤ ကသ့ဒ်လဲၣ်.
ယိၤ ၁၅:၉ ပာ်ဖျါထီၣ်ဝဲ, ၦၤလၢအစူၢ်နၥ်အီၤတဖၣ်အဂီၢ်, တၢ်သးခုလၢ ကစၢ်ယ့ၣ်ၡူး အၢၣ်လီၤဝဲန့ၣ် မ့ၢ်တၢ်အိၣ်ဆိးလၢအတၢ်အဲၣ်အပူၤ, ဒီးယိၤ ၁၆:၂၄ ပာ်ဖျါဝဲ, တၢ်လၢပလိၣ်တဖၣ်န့ၣ် ပကဘၣ်ဃ့လၢ ယွၤအအိၣ် ခီဖျိလၢတၢ်ထုကဖၣ်န့ၣ်လီၤ. ယိၤ ၁၅:၁၁ အပူၤန့ၣ် ကစၢ်ယ့ၣ်ၡူးစံးဝဲလၢ “ဒ်သိးယတၢ်သးခုကအိၣ်ကဆိးလၢသုပူၤ, ဒီးသုတၢ်သးခုကလၢထီၣ်ၦဲၤထီၣ် ဒီးယစံးဘၣ်တဲဘၣ်လံသုလၢတၢ်န့ၣ် တဖၣ်လံ” န့ၣ်လီၤ. ကလၤ ၅:၂၂-၂၅ ပာ်ဖျါဝဲ, တၢ်သးခုအံၤ မ့ၢ်သးစီဆှံအတၢ်ဟ့ၣ်တမံၤ, ဒီးပကဘၣ်လူၤပိာ်သးစီဆှံကစၢ်အခံန့ၣ်လီၤ. ဖဲယတၢ်ဖံးတၢ်မၤအါ အကတီၢ်, ဒ်သိးယကအိၣ်မူအိၣ်ဂဲၤဘၣ်လၢတၢ်သးခုအပူၤအဂီၢ်, ယသ့ၣ်ညါဝဲန့ၣ်မ့ၢ်အကတီၢ်, ဖဲလၢယဃ့ထုကဖၣ် ကိးမုၢ်နၤဒဲး လၢတၢ်နၥ်သန့ၤသးဒီးယွၤန့ၣ်လီၤ.
တၢ်သးခုန့ၣ် မ့ၢ်တၢ်လၢအကါဒိၣ်နီၢ်နီၢ်အဃိႇ လၢပတၢ်ဆၢကတီၢ်အတၢ်ရဲၣ်တၢ်ကျဲၤအပူၤန့ၣ် ကြၢးလၢပပၥ်အီၤနီၣ်ဂံၢ်တၢန့ၣ်လီၤ. ဘၣ်ဆၣ်မ့ၢ်လၢတၢ်အိၣ်မူန့ၣ်တအိၣ်လၢပတၢ်ပၢဆှၢနဲၣ်ကျဲၤတၢ်အဖီလၥ်အလၢအၦဲၤအဃိ, ယသးခုဘၣ်ယဲလၢတၢ်သးခုအဂၤတမံၤ, လၢအမ့ၢ်- သးစီဆှံကစၢ်- အိၣ်ဒီးပှၤအဃိန့ၣ်လီၤ. လၢယဂီၢ်, ခဲကနံၣ်အံၤ, တၢ်လဲၤတၢ်လၢတၢ်သးခုအတၢ်ချ့ အပူၤစံးတၢ်န့ၣ် မ့ၢ်တၢ်လဲၤတၢ်လၢတၢ်ထုကဖၣ်အတၢ်ချ့အပူၤ- ဒ်သိးကဒိးန့ၢ်တၢ်သးခုလၢ ကစၢ်လၢအဟ့ၣ်တၢ်သးခုတဂၤအအိၣ်အဂီၢ်မ့ၢ်တၢ်ဟ့ၣ်တၢ်ဆၢကတီၢ်န့ၣ်လီၤ.
