ဖဲ ၂၀၁၆ နံၣ် လါယူၤ, တၢ်မၤအသး ဖဲတၢ်မၤလၤကပီၤ နီၢ်ပၤမုၣ် အဲလံၤစဘဲး (Elizabeth) အိၣ်ဖျဲၣ်ဆၢက့ၤအမူး (၉၀) ဝီတဝီ လၢပှၤဂီၢ်မုၢ်အမဲာ်ညါ အကတီၢ်န့ၣ်လီၤ. နီၢ်ပၤမုၣ် အိၣ်လၢအလ့ၣ်ကဟၣ်အပူၤ, ဒီးဝံၢ်ဝၢ်အစု ဆူပှၤဂီၢ်မုၢ်တဖၣ်အအိၣ်, ဖဲအလဲၤဃီဝဲ ပှၤသုးဖိကူသိးဃာ်ဆ့ကၤဖးထီအဂီၤတဖၣ်, ဒီးအိၣ်ဆၢထၢၣ် ခၢၣ်သနၢၣ်, လၢတၢ်ပာ်သးအလၢအပှဲၤအပူၤ, ဒီးရဲၣ်လီၤအသးအကျိၤဖးထီန့ၣ်လီၤ. လၢကီၢ်အ့ကလၢၢ် (England) န့ၣ် မ့ၢ်မုၢ်နံၤတနံၤလၢအကိၢ်လၢၤ, ဒီးပှၤခိးတၢ်ဖိ တဖၣ်န့ၣ် ဒ်အလုၢ်အလၢ်အိၣ်ဝဲအသိး, ဘၣ်ကူးသိး သိဆူၣ်ဖျီၣ်ခံထီအသူ, သိဆူၣ်ဆ့ကၤဖီခိၣ်စုထီ, လၢအထီဃာ်ဆ့ကၤက့ၤသၣ်တဖၣ်တုၤဆူအခၣ်, ဒီးတၤသူဆူၣ်ခိၣ်သလုးဖးဒိၣ်တဖၣ်န့ၣ်လီၤ. ပှၤသုးဖိတဖၣ် ဆၢထၢၣ်ရဲၣ်လီၤအသးတဂၤဘၣ်တဂၤလၢ မုၢ်အဖီလာ်အခါ, ပှၤခိးတၢ်သုးဖိအကျါတဂၤန့ၣ် သံတယူာ်ဘၣ်အသး ဒီးလီၤဃံၤဝဲဒၣ်ဆူအမဲာ်ညါန့ၣ်လီၤ. လီၤလီၤဆီဆီ, အဝဲပၢၤဃာ် အနီၢ်ကစၢ်ဃံးဃံး, အမဲာ်သၣ်န့ၣ်လီၤတဲာ်ဝဲဆူလၢၢ်ကမူၣ်အကျါ, ဒီးအနီၢ်ကစၢ်အိၣ်ဘျၢအသးလိၤလိၤ ဒ်သ့ၣ်ဘ့ၣ်ဘၣ် တဘ့ၣ်အသိးန့ၣ်လီၤ. အဝဲအိၣ်စူၣ်လီၤအသးဖဲန့ၣ်, လၢတၢ်ပာ်သးအပတီၢ်န့ၣ်လီၤ.

ပှၤခိးတၢ်သုးဖိတဂၤအံၤ, လၢတၢ်သံတယူာ်အပူၤ မ့ၢ်လီၤဃံၤဝဲဒၣ်လဲာ် ဒ်သိးကမၤလိန့ၢ် တၢ်ကီၤသူၣ်ကီၤသး, ဒီးတၢ်ပၢၤဃာ်အနီၢ်ခိလၢ အလီၢ်ဒၣ်ဝဲအဂီၢ်န့ၣ် ဘၣ်မၤလိန့ၢ်ဝဲ တၢ်သိၣ်တၢ်ဘျၢတဖၣ်လၢ အါနံၣ်အါလါအပူၤန့ၣ်လီၤ. ဖဲ ၁ ကရံၣ်သူး ၉:၂၇ န့ၣ် ပှၤတၢ်မၢဖိစီၤပီလူး ပာ်ဖျါထီၣ် တၢ်မၤလိန့ၢ်တၢ်ဒ်သိးအံၤ, ဒီးစံးဝဲ “ယမၤဆူၣ်မၤကိၤထီၣ်ယနီၢ်ခိ… ဒီးကတဲာ်ကတီၤအီၤ ဒ်သိးအကအိၣ်လၢတၢ်ပၢၤဃာ်အီၤဃံးဃံးအဖီလာ်အဂီၢ်” န့ၣ်လီၤ. အဆၢဖိ ၂၅ န့ၣ် အဝဲတူၢ်လိာ်ပာ်ပနီၣ်ဝဲဒၣ် “ကယဲၢ်ပှၤလၢအဂုာ်မၤသတြီၤတၢ်တဖၣ်န့ၣ်, ကီၤဒၣ်အသးလၢတၢ်ခဲလၢာ်” န့ၣ်လီၤ.

ယွၤအဘျုးအဖှိၣ် (တမ့ၢ်ပတၢ်ကျဲးစၢးဘၣ်) မၤဂၢၢ်မၤကျၢၤ ကယဲၢ်တၢ်လၢပမၤတဖၣ်ခဲလၢာ်, တကတီၢ်ဃီန့ၣ် ပနီၢ်သးအတၢ်အိၣ်မူန့ၣ် ကြၢးအိၣ်ဒီးတၢ်အိၣ်မူ မၤထွဲ တၢ်သိၣ်တၢ်ဘျၢဃံးဃံးန့ၣ်လီၤ. လၢပကသိၣ်နၢၤ, ပၢၤဃာ် ပတၢ်ဆိကမိၣ်, ပသူၣ်ပသး, ဒီးနီၢ်ခိအဂီၢ်, ဒ်ယွၤမၤစၢၤပှၤအသိး ပမၤလိန့ၢ်ဝဲ လၢတၢ်မၤကွၢ် မ့တမ့ၢ် တၢ်မၤတံာ်တာ်တဖၣ်အပူၤဒၣ်လဲာ်, ပကဆိကမိၣ်ပညိၣ်ထဲဒၣ်လၢ ကစၢ်ယွၤ န့ၣ်လီၤ.