ဖဲယမိၢ်ဘၣ်ထီၣ် တၢ်ဆါဟံၣ် လၢပှၤဆိးက့အါနံၣ်အါလါတဖၣ်အဂီၢ်, ဒီးဘူးထီၣ်လၢအမုၢ်နံၤလၢခံကတၢၢ်လၢဟီၣ်ခိၣ်ချၢအကတီၢ်န့ၣ်, ပှၤမၤ တၢ်အံးထွဲကွၢ်ထွဲပှၤသးပှၢ် အတၢ်မၤတဂၤန့ၣ်, ဖံးတၢ်မၤတၢ် လၢတၢ်သူၣ်အိၣ်သးအိၣ်နီၢ်နီၢ်အဃိ, ထိးဘၣ်ယသးန့ၣ်လီၤ. ယမိၢ်လၢ အနီၢ်ခိဂံၢ်စၢ်ဘါစၢ်န့ၣ် စိာ်ထီၣ်ဝဲလၢ အလီၢ်ဆ့ၣ်နီၤ, ဒီးပာ်မံလီၤအီၤ ကယီကယီဖိလၢ လီၢ်မံခး ဝံၤအလီၢ်ခံန့ၣ်, ပှၤကွၢ်ထွဲမၤစၢၤတၢ်တဂၤအံၤ ဖူးလဲးဖူးသွံ ယမိၢ်အခိၣ်, ဒီးဖဲအတန့ၤလီၤအသးန့ၣ် စံးဘၣ်ယမိၢ်လၢ, “နလီၤအဲၣ်လီၤကွံဒိၣ်မး” န့ၣ်လီၤ. ဒီးသံကွၢ်ယၤလၢ မ့ၢ်ယအိၣ်မၤသးဒ်လဲၣ်န့ၣ်လီၤ. အဝဲအတၢ်မၤဂ့ၤတၢ်န့ၣ် ယသးဘၣ်ဒိ တုၤယမဲာ်ထံယွၤလီၤဝဲဖဲန့ၣ်, ဒီးတုၤမုၢ်မဆါတနံၤအံၤန့ၣ်လီၤ.
ပှၤကွၢ်ထွဲပှၤသးပှၢ်တဂၤအံၤ မၤတၢ်န့ၣ် မ့ၢ်တၢ်သူၣ်ကညီၤသးကညီၤအတၢ်မၤ ကဆှီဒီဖိတမံၤဘၣ်ဆၣ်, တၢ်မၤဖိအံၤ မ့ၢ်တၢ်လၢယလိၣ်ဘၣ် ဖဲအကတီၢ်ဖိအံၤန့ၣ်လီၤ. ယသ့ၣ်ညါယဲလၢ ပိာ်မုၣ်တဂၤအံၤ ထံၣ်ဝဲယမိၢ်န့ၣ် တမ့ၢ်ဘၣ် ဒ်ပှၤဆူးပှၤဆါတဂၤ အသိးအဃိ, အတၢ်မၤအံၤ ကဲထီၣ်တၢ်မၤစၢၤလၢ ယဘၣ်ကွၢ်ဆၢၣ်မဲာ်တၢ်အဂီၢ်န့ၣ်လီၤ. အဝဲကဟုကယာ်ယမိၢ်, ဒီးထံၣ်ဝဲယမိၢ် ဒ်ပှၤတဂၤလၢအိၣ်ဒီးအလုၢ်အပှ့ၤဖးဒိၣ်န့ၣ်လီၤ.
ဖဲနီၢ်နၤဧမံဒီးနီၢ်ရူၤသး အဝၤတဖၣ်လီၤမၢ်ဝံၤန့ၣ်, တၢ်နီတမံၤ တအိၣ်လၢၤဘၣ်အကတီၢ်, စီၤဘိၤဧး ဒုးနဲၣ်တၢ်သးအိၣ်မၤဂ့ၤတၢ်, ခီဖျိဟ့ၣ်ဝဲ တၢ်ပျဲလၢ နီၢ်ရူၤသး ကထၢ ဘုအစဲၤ လၢအလီၤတဲာ်တဖၣ်, လၢပှၤကူးဘုဖိတဖၣ်အလီၢ်ခံန့ၣ်လီၤ. ရူၤသး ၂:၈-၉ ပာ်ဖျါဝဲလၢ စီၤဘိၤဧး မၤလိာ် ပိာ်ခွါလၢအကူးဘုတဖၣ်ဒၣ်လဲာ် အသုတထိးအီၤတဂ့ၤန့ၣ်လီၤ. အတၢ်မၤဂ့ၤတၢ်န့ၣ် ဘၣ်တၢ်ထိၣ်ဂဲၤထီၣ်အီၤ, ခီဖျိလၢ နီၢ်ရူၤသး အံးထွဲကွၢ်ထွဲ နီၢ်နၤဧမံၤ- အဆၢဖိ ၁၁ န့ၣ် စီၤဘိၤဧး စံးဝဲ “လၢနဝၤသံအလီၢ်ခံန့ၣ် တၢ်လၢနမၤနမံၤပှၢ်ပိာ်မုၣ်ခဲလၢာ်န့ၣ်, … ပှၤဒုးနဲၣ်ယၤလီၤတံၢ်လီၤဆဲးလီၤ” န့ၣ်လီၤ. စီၤဘိၤဧး တထံၣ်အီၤ ဒ်ပှၤတခီဘီမုၢ်ဖိ တဂၤအသိးမ့ၢ်ဂ့ၤ, မုၣ်ကမဲတဂၤအသိးမ့ၢ်ဂ့ၤန့ၣ်ဘၣ်. မ့မ့ၢ်ထံၣ်ဝဲ ဒ်ပိာ်မုၣ်တဂၤလၢအအိၣ်ဒီး တၢ်လိၣ်တဂၤအသိးန့ၣ်လီၤ.
ကလီး ၃:၁၂ ပာ်ဖျါဝဲ, ယွၤအဲၣ်ဒိးလၢ ပက “ကူထီၣ်သိးထီၣ် တၢ်သးကညီၤ, တၢ်မၤဂ့ၤတၢ်, တၢ်ဆီၣ်လီၤသး, တၢ်သးစူၤ, တၢ်ဝံသးစူၤသ့ၣ်တဖၣ်” န့ၣ်လီၤ. ခီဖျိလၢယွၤအတၢ်မၤစၢၤပှၤအပူၤ, ပတၢ်သူၣ်ကညီၤသးကညီၤ အတၢ်မၤ ကဆှီဒီဖိတဖၣ်န့ၣ် ကမၤဖှံထီၣ်ပှၤအသး, ကဟဲစိာ်န့ၢ်တၢ်မုၢ်လၢ်, ဒ်သိးဒီးပှၤဂၤတဖၣ်ကသးအိၣ်မၤဂ့ၤတၢ်အဂီၢ်, ကဲထီၣ်တၢ်ထိၣ်ဟူးထိၣ်ဂဲၤသ့ဝဲဒၣ်န့ၣ်လီၤ.
