နကထံၣ် မ့တမ့ၢ် နကနၢ်ဟူတ့ၢ်သ့ၣ်သ့ၣ် တၢ်ကတိၤတဖၣ် လၢအခီပညီ ဒ်သိးလိာ်သးဒီးတၢ်ကတိၤဒိတထံၣ် လၢအစံး, “နမ့ၢ်အဲၣ်ဒိးလဲၤတၢ်ချ့ချ့န့ၣ်, လဲၤထဲတဂၤဧိၤတက့ၢ်. ဘၣ်ဆၣ်, နမ့ၢ်အဲၣ်ဒိးလဲၤတၢ်ယံၤယံၤန့ၣ်ဒီး, လဲၤတပူၤဃီတက့ၢ်” န့ၣ်လီၤ. တၢ်အံၤမ့ၢ်တၢ်ဆိကမိၣ်တထံၣ်လၢ အလီၤအဲၣ်တမ့ၢ်ဘၣ်ဧါ. ဘၣ်ဆၣ်, တၢ်ဃုထံလၢပနာ်အီၤသ့, လၢအကမၤမုာ်, မၤဂၢၢ်မၤကျၢၤပသး လၢတၢ်ကတိၤတဖၣ်အံၤန့ၣ်, တမ့ၢ်ထဲလၢအလီၤအဲၣ်ဧိၤန့ၣ်ဘၣ်, မ့မ့ၢ် မ့ၢ်ဝဲတီဝဲဒၣ်န့ၣ် မ့ၢ်အိၣ်တမံၤမံၤဧါ.

အိၣ်ဝဲလီၤ. နီၢ်နီၢ်န့ၣ်, ပှၤကိၤလၤဝါဖိ, ဒီးပှၤအမဲရကၤဖိလၢ အဃုထံတၢ်တဖၣ်န့ၣ် ဒုးနဲၣ်ဖျါဝဲဒၣ်, ဖဲလၢပှၤအိၣ်ဆၢထၢၣ်, ဒီးပှၤအဂၤ တဂၤဂၤန့ၣ်, အဝဲသ့ၣ် ဒွးတယာ်ဝဲလၢ ကစၢၢ်တဖၣ် ဒ်အမ့ၢ်တၢ်အဆံးဖျိဖျိဖျါဖျါန့ၣ်လီၤ. ဘၣ်ဆၣ်, ဖဲအဆၢထၢၣ်ဒၣ်ထဲတဂၤဧိၤအကတီၢ်, အတၢ်ဒွးတယာ်ကစၢၢ်န့ၣ် တဒ်သိးလိာ်အသးလၢၤဘၣ်န့ၣ်လီၤ. ပမ့ၢ်စံးလၢတၢ်ကတိၤအဂၤန့ၣ်ဒီး, “ပှၤတဝၢအတၢ်ဆီၣ်ထွဲမၤစၢၤ” န့ၣ် အကါဒိၣ်ဝဲ, တုၤဒၣ်လဲာ် လၢပသးပူၤန့ၣ် ကစၢၢ်တဖၣ်ဒၣ်လဲာ် ဆံးလီၤဝဲဒၣ်န့ၣ်လီၤ.

လၢအတၢ်ရ့တံၤရ့သကိးလိာ်သးဒီးစီၤယိၤနၤသၣ်န့ၣ်, စီၤဒၤဝံး ဃုထံၣ်န့ၢ်ဝဲ တၢ်ဟ့ၣ်ဂံၢ်ဟ့ၣ်ဘါ ဒ်သိးအံၤတကလုာ် လၢအလီၤအဲၣ်, ဒီးမ့ၢ်ဝဲတီဝဲန့ၣ်လီၤ. စီၤပၤစီၤစီလူး အတၢ်သူၣ်က့ၣ်သးကါ, ဒီးအတၢ်သူၣ်ဒိၣ်သးဖျိ လၢစီၤဒၤဝံးအဂီၢ်န့ၣ်, လီၤဂာ်ဒ်ကစၢၢ်လၢတၢ်မၤနၢၤအီၤတသ့, ဒီးကဲထီၣ်တၢ်လီၤဘၣ်ယိၣ် လၢအသးသမူအဂီၢ်န့ၣ်လီၤ (ကွၢ်ဖဲ ၁ ရှမူၤ ၁၉:၉-၁၈). တၢ်ဆီၣ်ထွဲမၤစၢၤမ့တမ့ၢ်လၢ အတံၤသကိး အဘူးကတၢၢ်တဂၤအဃိဘၣ်န့ၣ်ဒီး, စီၤဒၤဝံးအပူ ကဆီတလဲသးဒိၣ်ဒိၣ်မုၢ်မုၢ် န့ၣ်လီၤ. ဘၣ်ဆၣ်, ၁ ရှမူၤ ၂၀:၃၄ ပာ်ဖျါဝဲ, စီၤယိၤနၤသၣ် “အသးတမုာ်ဘၣ်လၢ စီၤဒၤဝံအဃိလီၤ. အဂ့ၢ်ဒ်အံၤ, အပၢ်ဒုးမဲာ်ဆှးအီၤလီၤ,” ဒီးအိၣ်ဆၢထၢၣ်ဝဲလၢ အတံၤသကိးအဂီၢ်န့ၣ်လီၤ. အဆၢဖိ ၃၂ န့ၣ် စီၤယိၤနၤသၣ် သံကွၢ်ဝဲဒၣ်, “ဘၣ်မနုၤအဃိ အဝဲကဘၣ်သံန့ၣ်လဲၣ်” န့ၣ်လီၤ. အဝဲသ့ၣ် အတၢ်ဒီတံၤဒီသကိး လၢယွၤဆိၣ်ဂ့ၤပာ်ဝဲန့ၣ် မၤစၢၤ စီၤဒၤဝံး, ဒ်သိးဒီးကကဲထီၣ် အံၣ်စရ့လးအစီၤပၤန့ၣ်လီၤ.

ပတၢ်ရ့လိာ်ဘၣ်ထွဲလိာ်သးတဖၣ်န့ၣ် မ့ၢ်တၢ်လၢအကါဒိၣ်န့ၣ်လီၤ. ဒီး ယွၤမ့ၢ်အိၣ်ဆိးလၢ ပတၢ်ရ့တံၤရ့သကိးတဖၣ် အသးကံၢ်ပူၤန့ၣ်ဒီး, ဒ်သိးပကမၤ တၢ်လၢအဒိၣ်န့ၢ် တၢ်လၢပဆိကမိၣ်မှံသ့တဖၣ်အဂီၢ်, ပဟ့ၣ်သဆၣ် ထိၣ်ဟူးထိၣ်ဂဲၤထီၣ် တဂၤဒီးတဂၤသ့ဝဲဒၣ်န့ၣ်လီၤ.