ဘၣ်တဂီၤ ဖဲယဟးကျဲအကတီၢ်, ယပာ်သူၣ်ပာ်သး သိလ့ၣ်တဆိ အိၣ်ကတီၢ်လၢကျဲခိၣ်, ဒီးအခိၣ်လိၤဝဲဆူ ကျဲအကမၣ်တခီန့ၣ်လီၤ. ပိာ်မုၣ်လၢအနီၣ်သိလ့ၣ် တဂၤန့ၣ် ဖျါလၢ အအီသံးမူၤ, ဒီးမံဘၣ်အသးအဃိ, အနီၢ်ကစၢ်, ဃုာ်ဒီးပှၤဂၤအဂီၢ်, တၢ်ဘၣ်ယိၣ်အလီၢ်အိၣ်ဝဲဒၣ်န့ၣ် တပာ်သူၣ်ပာ်သးဝဲဒၣ်ဘၣ်န့ၣ်လီၤ. တၢ်မၤအသးတမံၤအံၤ လီၤဘၣ်ယိၣ်အဃိဒီး, ယကဘၣ်မၤတၢ်တမံၤမံၤန့ၣ်လီၤ. ဒ်သိးယနုာ်လီၤလၢပှၤနီၣ်တၢ်အလီၢ်ဆ့ၣ်နီၤ ကသ့အဂီၢ်, ယကိးပၢၢ်ထီၣ်အီၤ ဒီးယမၢသုးအသးဆူ ပှၤဒိးတၢ်ဖိအလီၢ်ဆ့ၣ်နီၤတကပၤဝံၤ, ယနီၣ်ဆှၢအသိလ့ၣ်ဆူ တၢ်လီၢ်လၢအပူၤဒီး တၢ်ဘၣ်ဒိဘၣ်ထံးန့ၣ်လီၤ.
နီၢ်ခိအတၢ်လီၤဘၣ်ယိၣ်န့ၣ် တမ့ၢ်ထဲလၢ ပဘၣ်ကွၢ်ဆၢၣ်မဲာ်, ဒီးမၤဘၣ်ဒိပှၤန့ၣ်ဘၣ်. ဖဲစီၤပီလူး ထံၣ်ပှၤအၤသ့ၣ်ဖိတဖၣ်လၢ အကူၣ်သ့ကူၣ်ဘၣ် လၢဟီၣ်ခိၣ်တကပၤန့ၣ် အိၣ်မူအိၣ်ဂဲၤဝဲဒၣ်လၢနီၢ်သးအတၢ်လီၤဘၣ်ယိၣ်အပူၤအဃိ, မၤတၢ် ၁၇:၁၆ အပူၤန့ၣ် ကွဲးပာ်ဖျါဝဲလၢ, “ဝ့ၢ်န့ၣ် ပှဲၤဝဲဒီးတၢ်ဂီၤ, ဒီးအသးကိၢ်ထီၣ်ဝဲလီၤ.” အဆၢဖိ ၁၈, ၃၀-၃၁ ပာ်ဖျါဝဲဒၣ် ပှၤလၢ အသးတစဲတူၢ်လိာ် ကစၢ်ခရံာ်တဖၣ်အဂီၢ်, တၢ်မၢဖိအတၢ်မၤဆၢတၢ်န့ၣ် မ့ၢ်တၢ်ဟ့ၣ်ခီဟ့ၣ်နီၤ ယွၤအတၢ်တိာ်တဖၣ် ခီဖျိလၢကစၢ်ယ့ၣ်ရှူးအပူၤ, ဒီးခီဖျိလၢကစၢ်ယ့ၣ်ရှူးအဂ့ၢ်န့ၣ်လီၤ. ဒီးအဆၢဖိ ၃၄ ပာ်ဖျါဝဲ, ပှၤတနီၤလၢအနၢ်ဟူဘၣ်တဖၣ်န့ၣ် စူၢ်က့ၤနာ်က့ၤကစၢ်ယ့ၣ်ရှူးန့ၣ်လီၤ.
မ့တမ့ၢ်ဘၣ်လၢ တၢ်စူၢ်က့ၤနာ်က့ၤ ကစၢ်ယ့ၣ်ရှူးဘၣ်န့ၣ်ဒီး, တၢ်ဃုထံၣ်န့ၢ် တၢ်အခီပညီ အဒိၣ်အထီကတၢၢ်န့ၣ် မ့ၢ်တၢ်လၢအလီၤဘၣ်ယိၣ်န့ၣ်လီၤ. ပှၤလၢ အထံၣ်န့ၢ်တ့ၢ်လံ တၢ်ပျၢ်တၢ်ဒဲးဘး, ဒီးတၢ်လၢတၢ်ပှဲၤနီၢ်နီၢ်လၢ ကစၢ်ယ့ၣ်ရှူးအပူၤ တဖၣ်န့ၣ်, ဘၣ်တၢ်ပှ့ၤက့ၤလံလၢ တၢ်ဂုာ်ကျဲးစၢးတဖၣ်လၢ အနဲၣ်ဆှၢအဝဲသ့ၣ်ဆူတၢ်နီတမံၤ, ဒီးဘၣ်တၢ်ဟ့ၣ်အဝဲသ့ၣ်လၢ တၢ်မၤဃူမၤဖိးက့ၤအတၢ်ကစီၣ်န့ၣ်လီၤ (ကွၢ်ဖဲ ၂ ကရံၣ်သူး ၅:၁၈-၂၁). တၢ်နီၤဟ့ၣ်ခီ ကစၢ်ယ့ၣ်ရှူးအတၢ်သးခုကစီၣ်ဆူ ပှၤဟီၣ်ခိၣ်ဖိတဖၣ်အတၢ်အိၣ်မူအိၣ်ဂဲၤ လၢအအိၣ်ပှဲၤဒီးအစုၣ်အပျၢ် အတၢ်လုၢ်ဘၢအဖီလာ်န့ၣ်, မ့ၢ်ကျိၤကျဲတဘိလၢယွၤစူးကါဝဲ ဒ်သိးကထုးထီၣ်န့ၢ် ပှၤအိၣ်မူအိၣ်ဂဲၤလၢတၢ်ဘၣ်ယိၣ်အကျဲအကပူၤအဂီၢ်န့ၣ်လီၤ.
