ဖဲပှၤဆိကမိၣ် တၢ်ဃ့ၢ်သဘျိၣ်မံထၢၣ် ၁၀၀ အဂ့ၢ်န့ၣ်ဒီး, တၢ်ကဟဲနုာ်ဆူပှၤအတၢ်ဆိကမိၣ်အပူၤန့ၣ် ကမ့ၢ်သ့ၣ်သ့ၣ် အူၣ်စ့ၣ် ဘိး (Usain Bolt), လၢအမ့ၢ် ပှၤပၢၤဃာ် ဟီၣ်ခိၣ် ဒီဘ့ၣ် တၢ်ကွဲးနီၣ် (World record holder) လၢခ့ခါခဲအံၤန့ၣ်လီၤ. ဘၣ်ဆၣ်ဒီး ပသးပ့ၤနီၣ် ကၠူလယၣ် “ဟၣ်ရံၣ်က့” ဟီးက့ၣ် (Julia “Hurricane” Hawkins) အဂ့ၢ်တသ့ဘၣ်. ဖဲ ၂၀၂၁ နံၣ်န့ၣ်, ကၠူလယၣ် ဃ့ၢ်သတြီၤ တၢ်ဃ့ၢ် အကတၢၢ်ပနိ လၢပှၤဃ့ၢ်တၢ်ဖိအဂုၤအဂၤခဲလၢာ်အမဲာ်ညါ, ဒီးမၤနၢၤတၢ်ဃ့ၢ်သဖှိ မံထၢၣ် ၁၀၀ ဖဲပှၤသးပှၢ်အတၢ်လိာ်ကွဲ (Louisiana Seniors Games) န့ၣ်လီၤ. ဃ့ၢ်တၢ်အဆၢကတီၢ်အါန့ၢ် ဘိး အတၢ်ဃ့ၢ် (၉.၅၈ စဲးကီး), စဲးကီး ၆၀ ဘျဲၣ်ဘျဲၣ်ဖိ (၁၀.၅၈ စဲးကီး) န့ၣ်လီၤ. ဘၣ်ဆၣ် အဝဲအသးအိၣ် ၁၀၅ နံၣ်လံန့ၣ်လီၤ.
ပိာ်မုၣ်တဂၤလၢ အသးအနံၣ်အလါအိၣ် ထဲသိးအံၤ ဃ့ၢ်ဒံးဝဲတၢ်ပ့ၢ်တၢ်ချ့ တၢ်ဃ့ၢ်ပြၢန့ၣ် မ့ၢ်တၢ်လီၤဘၣ်သူၣ်ဘၣ်သးဒိၣ်မးန့ၣ်လီၤ. ဒီးဧ့ၤဘြံၤ ၁၂:၁-၂ ပာ်ဖျါဝဲလၢ, ပှၤစူၢ်က့ၤနာ်က့ၤတၢ်တဖၣ် ဃ့ၢ်သကိးတၢ်ဒီးကစၢ်ယ့ၣ်ရှူး ဆူဖီတၢၣ်, ဒီးတဆိကတီၢ် အတၢ်ဃ့ၢ်နီတဘျီဘၣ်န့ၣ်, မ့ၢ်တၢ်လီၤဘၣ်သူၣ်ဘၣ်သးဒိၣ်မးန့ၣ်လီၤ. ဘၣ်ထွဲဒီး ပှၤတီပှၤလိၤတဖၣ် လၢအတၢ်အိၣ်မူအလီၢ်ခံအပတီၢ်အဂ့ၢ်န့ၣ်, ပှၤကွဲးထါစံးဝဲလၢ, ထါစံးထီၣ်ပတြၢၤ ၉၂:၁၂-၁၄ အပူၤ, “ပှၤတီပှၤလိၤဂ့ၤထီၣ် ဒ်သ့ၣ်စူၣ်ပလိၣ်အသိး, ……တုၤအသးပှၢ်ဒီးကသၣ်ထီၣ်ဒံးဒီး, ကအိၣ်ပှဲၤဒီးအထံ,… ဒီးအသံကစဲာ်” န့ၣ်လီၤ.
ပှၤစူၢ်က့ၤနာ်က့ၤတၢ်ဖိ လၢအသးပှၢ်, လၢအလူၤပိာ်နီၣ်ထိၣ်ဒ်သိးအံၤ တကလုာ်တဖၣ်န့ၣ် ခါဆူညါတၢ်အိၣ်မူအဂီၢ် ကထံၣ်န့ၢ်တၢ်နဲၣ်ကျဲလၢ တၢ်မၢဖိ စီၤပီလူး အလံာ်ပရၢဆူ စီၤတံတူးအအိၣ်န့ၣ်လီၤ. တံတူး ၂:၂ စံးဝဲလၢ သးပှၢ်ပိာ်ခွါတဖၣ်န့ၣ် ကဘၣ် “အိၣ်ဆူၣ်လၢတၢ်နာ်အပူၤ, လၢတၢ်အဲၣ်တၢ်ကွံအပူၤ, လၢတၢ်ဝံသးစူၤ အပူၤ,” ဒီးသးပှၢ်ပိာ်မုၣ်တဖၣ်န့ၣ် ကဘၣ် “သိၣ်တၢ်လၢအဂ့ၤ” န့ၣ်လီၤ.
ပှၤစူၢ်က့ၤနာ်က့ၤတၢ်လၢ အသးအနံၣ်အလါပှၢ်ထီၣ်တဖၣ်အဂီၢ်န့ၣ် တမ့ၢ်လၢ ကဘၣ်ဆိကတီၢ်တၢ်ဃ့ၢ်ဘၣ်. ဒ် ကၠူလယၣ် ဃ့ၢ်ဝဲကျိၤကျဲအသိးန့ၣ် တမ့ၢ်ဘၣ်. ဘၣ်သ့ၣ်သ့ၣ် ကမ့ၢ်တၢ်ဃ့ၢ်ကျိၤကျဲလၢအမၤလၤကပီၤယွၤ, ဒ်ယွၤကတဲာ်ကတီၤန့ၢ် တၢ်ဂံၢ်တၢ်ဘါလၢ အဝဲသ့ၣ်လိၣ်ဘၣ်ဝဲန့ၣ်လီၤ. မ်ပဝဲခဲလၢာ် ပကဃ့ၢ်သကိးတၢ်ဃ့ၢ် ဒ်သိးပကမၤ ယွၤအတၢ်မၤ, ဒီးပှၤဂၤအဂီၢ် ဂ့ၤဂ့ၤဘၣ်ဘၣ်န့ၣ်တက့ၢ်.
