အဲၣ်ဒြူ (Andrew) အ Volkswagen သိလ့ၣ် အိၣ်ကတီၢ်, ဒီးပှၤခိးတၢ်ဖိတဖၣ် ဟဲဆူအသိလ့ၣ်န့ၣ်လီၤ. ဒ်အပူၤကွံာ် အဝဲဃ့ထုကဖၣ်တ့ၢ်လံတလီၢ်လီၢ်အသိး ဃ့ထုကဖၣ်ဝဲ- “ယွၤဧၢ, ဖဲနအိၣ်မူအိၣ်ဂဲၤလၢဟီၣ်ခိၣ်ချၢအကတီၢ်, နဒုးထံၣ်ပှၤမဲာ်ဘျီၣ်တဖၣ် န့ၣ်လီၤ. ခဲအံၤ, မဲာ်ချံလၢ အထံၣ်တၢ်တဖၣ်န့ၣ် ဝံသးစူၤမၤဘျီၣ်လၢ်ဘၣ်အီၤတက့ၢ်” န့ၣ်လီၤ. ပှၤခိးတၢ်တဖၣ် ဃုကွၢ်ထံသိလ့ၣ်, ဒီးလံာ်စီဆှံတဖၣ်လၢတၢ်ဘိၣ်တၢ်စှၢၤ အပူၤအဂ့ၢ်န့ၣ်, တစံးကတိၤတၢ်နီတမံၤဘၣ်. အဲၣ်ဒြူ လဲၤခီဂာ်ဝဲကီၢ်ဆၢ, ဒီးစိာ်ဆှၢ အတၢ်ဖိတၢ်လံၤတဖၣ်ဆူ ပှၤလၢအလံာ်စီဆှံ တအိၣ်ဒံးဘၣ်တဖၣ်အဂီၢ်န့ၣ်လီၤ.

အဲၣ်ဒြူ ဘဲန် ဒၣ် ဘဲလ် (Andrew van der Bijl), မ့တမ့ၢ် သီခါ အဲၣ်ဒြူ (Brother Andrew) န့ၣ် သန့ၤအသးလၢ ယွၤအစိအကမီၤ, ဖဲယွၤကိးအီၤလၢကမၤဝဲ တၢ်မၤလၢအဖျါကဲထီၣ်တသ့ဘၣ်အဂီၢ်န့ၣ်လီၤ. တၢ်မၤအံၤ မ့ၢ်တၢ်စိာ်ဆှၢလံာ်စီဆှံတဖၣ်ဆူ ထံကီၢ်လၢ တတူၢ်လိာ် ပှၤခရံာ်ဖိအတၢ်စူၢ်တၢ်နာ်တဖၣ်န့ၣ်လီၤ. လၢတၢ်ပာ်သူၣ်ပာ်သး အတၢ်ကူၣ်ဘၣ်ကူၣ်သ့ တထီၣ်ဘး, ဒီးကျိာ်စ့အတၢ်ဆီၣ်ထွဲမၤစၢၤ ဆံးစှၤအဂ့ၢ် ဒိၣ်ဒိၣ်အါအါအပူၤန့ၣ်, အဲၣ်ဒြူ စံးဝဲလၢ, “ယမ့ၢ်ပှၤပတီၢ်မုၢ်တဂၤလီၤ. တၢ်လၢယမၤန့ၣ်, ပှၤကိးဂၤဒဲးမၤသ့ဝဲဒၣ်န့ၣ်လီၤ.” တနံၤအံၤ အတၢ်ကရၢကရိ လၢအမ့ၢ် Open Doors International န့ၣ် မၤတၢ်လၢ ပှၤလၢအစူၢ်က့ၤနာ်က့ၤ ကစၢ်ယ့ၣ်ရှူး, ဒီးပှၤလၢအဘၣ်တၢ်မၤနးမၤဖှီၣ် လၢဟီၣ်ခိၣ်ဒီဘ့ၣ်တဖၣ်အဂီၢ်န့ၣ်လီၤ.

ပှၤအံၣ်စရ့လးဖိတဖၣ် ဟဲက့ၤကဒါက့ၤလၢ တၢ်စိာ်မၢကဲကုၢ်ဝံၤအလီၢ်ခံ, ဒီးလၢတၢ်သူၣ်ထီၣ်ဘှီထီၣ်က့ၤ ယွၤအတၢ်လုၢ်ဟ့ၣ်အကတီၢ်, ကီၢ်ယူဒၤအပဒိၣ် စီၤစရူၤဘၤဘ့လးန့ၣ် ဘၣ်ကွၢ်ဆၢၣ်မဲာ်ဒီး တၢ်မၤလၢအဖျါကဲထီၣ် တသ့ဘၣ်တမံၤအဃိ, အသးဟးဂီၤဝဲဒၣ်န့ၣ်လီၤ. ဘၣ်ဆၣ်, စကၤ ၄:၆ ပာ်ဖျါဝဲလၢ ယွၤမၤသ့ၣ်နီၣ်ထီၣ်က့ၤအီၤလၢ အသုတသန့ၤလီၤအသးလၢ ပှၤကညီအစိအကမီၤ, မ့တမ့ၢ် အဂံၢ်အဘါတဂ့ၤ, မ့မ့ၢ်ကသန့ၤအသးလၢယွၤအသးန့ၣ်လီၤ. အဆၢဖိ ၂-၃ န့ၣ် ကစၢ်ယွၤဟ့ၣ်ဂံၢ်ဟ့ၣ်ဘါအီၤ ဟ့ၣ်လီၤခီဖျိလၢဝံစကၤရယၤ အတၢ်ထံၣ်လၢညါခီတထံၣ်, လၢအမ့ၢ် မ့ၣ်အူဒၢတဖၣ် ဘၣ်တၢ်မၤပှဲၤအီၤဒီးသိ, အိၣ်ဟဲလၢတၢ်အဃၢၤသ့ၣ်စၤယံးအထူၣ်တဖၣ်န့ၣ်လီၤ. မ့ၢ်လၢမ့ၣ်အူဒၢတဖၣ် ဒိးန့ၢ်ဘၣ်သိ တပယူာ်ဃီအဃိဒီး ကဲၤဝဲသ့အသိးန့ၣ်, ခီဖျိတၢ်သန့ၤလီၤသးလၢ ယွၤအစိအကမီၤ, ဒီးဒိးန့ၢ်ဘၣ်ဝဲ တပယူာ်ဃီအဃိ စီၤစရူၤဘၤဘ့လးဒီးပှၤအံၣ်စရ့လးဖိတဖၣ် မၤယွၤအတၢ်မၤကသ့ဝဲဒၣ်န့ၣ်လီၤ.

ဒ်ပသန့ၤလီၤသးလၢယွၤအလိၤအသိး, မ်ပကနာ်န့ၢ်အီၤ, ဒီးပကမၤတၢ်လၢယွၤအဲၣ်ဒိးဝဲလၢ ပကဘၣ်မၤန့ၣ်တက့ၢ်.