လၢကီၢ်စဲၣ် မံးခၠံၣ်ကၣ် (Michigan) အပူၤန့ၣ်, သ့ၣ်ထူၣ်အိၣ်ဝဲ အကကွဲၢ်တဆံလွံၢ်ကထိ (fourteen billion), ဒီးလၢနီၣ်ထိၣ်နီၣ်ဒွးအါမံၤအဖီခိၣ်န့ၣ် သ့ၣ်ထူၣ်အါတက့ၢ်န့ၣ် မ့ၢ်ဒၣ်သ့ၣ်ပတီၢ်မုၢ်တဖၣ်န့ၣ်လီၤ. ဘၣ်ဆၣ်, ကီၢ်စဲၣ်ကရၢကရိထီၣ် တၢ်ပြၢ လၢအမ့ၢ် “တၢ်ဃုထံၣ်သ့ၣ်ဖးဒိၣ်” (Big Tree Hunt) ကိးနံၣ်ဒဲး, ဒ်သိးဒီးတၢ်ကဃုထံၣ်န့ၢ် သ့ၣ်ထူၣ်တဖၣ်လၢအသးပှၢ်ကတၢၢ်, ဒီးအဒိၣ်ကတၢၢ်- သ့ၣ်ထူၣ်တဖၣ်လၢ တၢ်မၤလၤကပီၤအီၤသ့ ဒ်လီၢ်ကဝီၤအတၢ်ပနီၣ်လၢအမူတမံၤအသိး န့ၣ်လီၤ. တၢ်ပြၢအံၤ မၤထီထီၣ် သ့ၣ်ထူၣ်ပတီၢ်မုၢ်တဖၣ်အပတီၢ်ဆူ တီၤအထီတတီၤန့ၣ်လီၤ. သ့ၣ်ပှၢ်တခါဂ့ၤတခါဂ့ၤအပူၤန့ၣ်, သ့ၣ်ထူၣ်လၢအဒိးန့ၢ်ခိၣ်ဖးသ့ဝဲတထူၣ်ထူၣ်န့ၣ်, ဒ်သိးအကဘၣ်တၢ်ပာ်သူၣ်ပာ်သးအီၤအဂီၢ် အိၣ်ခိးပာ်အသးန့ၣ်လီၤ.

ယွၤတမ့ၢ်ဘၣ်ဒ်ပှၤအါဂၤအသိးဘၣ်. ထီဘိန့ၣ် ကစၢ်ယွၤပာ်သူၣ်ပာ်သးဝဲ ပှၤပတီၢ်မုၢ်တဖၣ်န့ၣ်လီၤ. “တၢ်တမံၤမံၤ” ဒီး “ပှၤတဂၤဂၤ” လၢပှၤအါဂၤ လဲၤကပာ်, ကွၢ်ကပာ်ဝဲန့ၣ်, ယွၤသူၣ်အိၣ်သးအိၣ်ဝဲဒၣ်န့ၣ်လီၤ. ဖဲစီၤပၤ စီၤယၤရၤဘၣ် ပၢတၢ်အစိၤန့ၣ် ယွၤဆှၢလီၤပှၤပတီၢ်မုၢ် စီၤဧၤမိၣ်, ဆူအံၣ်စရ့လး-ကလံၤထံးအထံကီၢ် န့ၣ်လီၤ. ဒ်သိးပှၤဂီၢ်မုၢ်တဖၣ် ကဃၣ်ကွံာ်အသးလၢတၢ်အၢ, ဒီးကဃုထံၣ်န့ၢ်တၢ်တီတၢ်လိၤအဂီၢ်, ဝံဧၤမိၣ် သဆၣ်ထီၣ်ဝဲဘၣ်ဆၣ်, အဝဲဘၣ်တၢ်လဲၤကပာ်အီၤ, ဒီးတဲအီၤလၢ ကအိၣ်ဘှ့ၣ်အိၣ်ဘှီၣ်န့ၣ်လီၤ. ဧၤမိၣ် ၇:၁၂ ပာ်ဖျါဝဲလၢ အဝဲသ့ၣ်ထံၣ်ဆံးအီၤဒီးစံးဝဲ, “ဟးထီၣ်ကွံာ်, ပှၤလၢအထံၣ်တၢ်လၢညါခီတဂၤဧၢ, ဃ့ၢ်ထီၣ်ကွံာ်ဆူကီၢ်ယူဒၤ,. ဒီးကတိၤတၢ်လၢဝံကျိာ်ဖဲန့ၣ်တက့ၢ်” န့ၣ်လီၤ. အဆၢဖိ ၁၄-၁၅ န့ၣ် ဝံဧၤမိၣ် စံးဆၢဝဲ “ယတမ့ၢ်ဘၣ်ဝံဘၣ်, ယတမ့ၢ်ဘၣ်ဝံအဖိဘၣ်. ယမ့ၢ်ပှၤကွၢ်ဂီၤဖံး, ဒီးပှၤမၤသိးဝံာ်ဒၢအလီၢ်လီၤ. ဒီးလၢယပိာ်သိ, ဒီးမဲာ်တဲးလဲးအခံန့ၣ် ယွၤဟံးန့ၢ်ယၤ, ဒီးယွၤစံးဘၣ်ယၤ, လဲၤကတိၤတၢ်လၢဝံကျိာ် ထီဒါယပှၤဂီၢ်မုၢ်အံၣ်စရ့လးတက့ၢ်” န့ၣ်လီၤ.

ယွၤသ့ၣ်ညါဒီးပာ်သူၣ်ပာ်သးဝဲလၢ စီၤဧၤမိၣ် မ့ၢ်ဒၣ်ပှၤကွၢ်သိ, ပှၤပတီၢ်မုၢ်တဂၤ လၢအကွၢ်ထွဲ ဆၣ်ဖိကီၢ်ဖိ, ဒီးတၢ်မုၢ်တၢ်ဘိတဖၣ်န့ၣ်လီၤ. နံၣ်လၢအကယၤတဖၣ် ပူၤကွံာ်ဝံၤအလီၢ်ခံ, ကစၢ်ယ့ၣ်ရှူး ပာ်သူၣ်ပာ်သး, ဒီးကိးဝဲပှၤပတီၢ်မုၢ် စီၤနၤသန့လး (ယိၤ ၁:၄၈), ဒီးစီၤစးဃဲ (လူၤကၣ် ၁၉:၄-၅) လၢချၢၣ်ဒၢ, ဒီးသိးဝံာ်ဒၢ အကပၤ န့ၣ်လီၤ. ပသးမ့ၢ်ကလၢၢ်ဘၣ်ဝဲလၢ တၢ်တထံၣ်ပှၤထဲလဲၣ်ဘၣ်ဆၣ်, ယွၤထံၣ်ပှၤ, အဲၣ်ပှၤ, ဒီးစူးကါပှၤလၢအတၢ်တိာ်တဖၣ်အဂီၢ်န့ၣ်လီၤ.