ယအိးထီၣ်တၢ်သ့ၣ်နီၣ်အတလါ, ဒီးထုးထီၣ် စ့နီၣ်ဆဲး ဆ့ကိာ်လၣ်ဆံးဖိန့ၣ်လီၤ. နီၣ်ဆဲးဖိအံၤ အဒိၣ်အဆံးဒီးအက့ၢ်အဂီၤန့ၣ် ဘၣ်တီတီဒီးဖိသၣ်အိၣ် အနွံ တဆံလၢအတအိၣ်ဖျဲၣ်ထီၣ်ဒံးဘၣ်တဂၤအခီၣ်လၣ်န့ၣ်လီၤ. ယဖူးလဲးဖူးသွံ အခီၣ်ဘိဆံးဆံးဖိ အဘိတဆံ, ဒီးသ့ၣ်နီၣ်ထီၣ်က့ၤယဲလၢ ယဟုးယသးအဆိကတၢၢ်အဘျီ လီၤမၢ်ကွံာ်အဂ့ၢ်, ဒီးပှၤတနီၤစံးဝဲလၢ “ယဘူၣ်ယတီၢ်ဂ့ၤ” ဘၣ်ဆၣ်, ဒ်အဝဲသ့ၣ်စံးဝဲအသိး ယဘူၣ်ယတီၢ်တဂ့ၤဘၣ်. ယသူၣ်အုးသးအုး, ဒီးသ့ၣ်ညါလၢယဖိအခီၣ်လၣ်ဖိတဖၣ်န့ၣ် မ့ၢ်တၢ်နီၢ်နီၢ် ဒ်သးဖိတဖျၢၣ်လၢ တဘျီန့ၣ်စံၣ်ဝဲဒၣ်လၢ ယဒၢလီၢ်အပူၤအသိးန့ၣ်လီၤ. ယစံးဘျုးကစၢ်ယွၤလၢ အမၤပူၤဖျဲးယၤလၢ တၢ်သးလီၤအတၢ်ဆါ, ဒီးစူးကါယတၢ်လဲၤခီဖျိ ဒ်သိးယကမၤမုာ်ထီၣ်က့ၤ ပှၤဂၤလၢအသူၣ်အုးသးအုး, ခီဖျိလၢအဖိလီၤမၢ်ကွံာ်ဝဲတဖၣ်အဂီၢ်န့ၣ်လီၤ. ဖဲယဟုးယသး ဟးဂီၤဝံၤ, အါန့ၢ်အနံၣ်ခံဆံအလီၢ်ခံ, ယဝၤသးဘိဒီးယၤ ပယုၢ်န့ၢ်ပဖိလၢ အလီၤမၢ်တဂၤအံၤ အမံၤလၢ ခဲၣ် (Kai), ကျိာ်တၢ်ကတိၤတနီၤအပူၤ အခီပညီန့ၣ် မ့ၢ်ဝဲ “တၢ်သူၣ်ဖှံသးညီ” န့ၣ်လီၤ. လၢယတၢ်လီၤမၢ်အဂီၢ် ယသးဘၣ်ဒိဆါဒံးဝဲအဖၢမုာ်ဘၣ်ဆၣ်, ယစံးဘျုးယွၤလၢ အမၤဘျါက့ၤယသး, ဒီးစူးကါယတၢ်လဲၤခီဖျိလၢ ကမၤစၢၤပှၤဂၤအဂီၢ်အဃိန့ၣ်လီၤ.
ပှၤကွဲးထါစံးထီၣ်ပတြၢၤ ၁၀၇ သူၣ်ခုသးခုဝဲဒၣ်လၢ ယွၤအသူးသ့ၣ်ကံၢ်စီလၢ အဒိၣ်အထီ, ဒီးဖဲအဆၢဖိ ၁ န့ၣ် သးဝံၣ်ထီၣ်ဝဲလၢ “စံးထီၣ်ပတြၢၤယွၤတက့ၢ်. အဂ့ၢ်ဒ်အံၤ, ဂ့ၤဝဲလီၤ. မ့ၢ်အဘျုးအဖှိၣ်အိၣ်ဝဲလီၤထူလီၤယိာ်အဂ့ၢ်လီၤ.” အဆၢဖိ ၂ န့ၣ် ဟ့ၣ်သဆၣ်ထီၣ်ဝဲ “ပှၤလၢယွၤပှ့ၤက့ၤအီၤ” တဖၣ် က “စံးဒ်န့ၣ်,” ဒီးအဆၢဖိ ၈ န့ၣ် “စံးထီၣ်ပတြၢၤယွၤလၢအဘျုးအဖှိၣ်အဃိ, ဒီးအတၢ်မၤလီၤလးလၢပှၤကညီဖိအဂီၢ်အဃိ” န့ၣ်လီၤ. ဖဲအဆၢဖိ (၉)န့ၣ်, အဝဲဟ့ၣ်ပှၤတၢ်မုၢ်လၢ်, ခီဖျိတၢ်အၢၣ်လီၤအီလီၤလၢအမ့ၢ်, “ပှၤလၢတၢ်သူအသးလၢထံ, ဒီးပှၤလၢတၢ်သၣ်ဝံၤအသးတဖၣ်န့ၣ် ထဲယွၤတဂၤဧိၤ ဒုးဘျဲးအီၣ်ဘျဲးအီ လၢတၢ်ဂ့ၤ” သ့ဝဲဒၣ်န့ၣ်လီၤ.
ပှၤလၢအပူၤဖျဲးဒီးတၢ်သူၣ်အုးသးအုး မ့တမ့ၢ် တၢ်မၤအၢမၤနးန့ၣ် တအိၣ်ဝဲ နီတဂၤဘၣ်. ပှၤသ့ၣ်တဖၣ်လၢအဘၣ်တၢ်ပှ့ၤက့ၤအီၤ ခီဖျိကစၢ်ခရံာ်အတၢ်ဟ့ၣ်လီၤ အသးလၢထူၣ်စုညါအလိၤဒၣ်လဲာ် တပူၤဘၣ်. ဘၣ်ဆၣ်, ဖဲယွၤစူးကါပဂ့ၢ်ပကျိၤတဖၣ် လၢတၢ်နဲၣ်ဆှၢပှၤဂၤတဖၣ်ဆူ အတၢ်အဲၣ်လၢအပှ့ၤက့ၤတၢ်အအိၣ်န့ၣ်ဒီး, ပကလၢၢ်ဘၣ် ယွၤအတၢ်သးကညီၤသ့ဝဲဒၣ်န့ၣ်လီၤ.
