လၢတၢ်ယီၤခါ, မုၢ်အတၢ်ကိၢ်အဖီလာ်န့ၣ် ကၠီး (George) မၤတၢ် လၢတၢ်တ့ထီၣ် ဘှီထီၣ်တၢ်မၤ, ဖဲကီၢ်စဲၣ် ကဲၣ်ရိၣ်လဲနါ (Carolina) န့ၣ်လီၤ. ပှၤအိၣ်ဆိးဖဲတၢ်အခိၣ်အဃၢၤတဂၤ ဟဲနုာ်လီၤဆူ အဝဲမၤတၢ်အလီၢ် ကရၢၢ်ပူၤန့ၣ်လီၤ. ပှၤတဂၤအံၤ ဖျါလၢအသူၣ်ဒိၣ်သးဖျိး, ဒီးစးထီၣ်ဆိၣ်တၢ်, ဒီးစံးကတိၤအၢ ကယဲၢ်တၢ်ဘှီထီၣ် အတၢ်ရဲၣ်တၢ်ကျဲၤခဲလၢာ်, ဒီးတၢ်မၤအီၤဒ်လဲၣ်အဂ့ၢ်တဖၣ်န့ၣ်လီၤ. တုၤပှၤလၢအသးကဲၤဒိၣ် တဂၤအံၤ ဆိကတီၢ်အတၢ်ကိးပသူကိးပသီတၢ်တစုန့ၣ်, ကၠီး ခိးကနၣ်ဝဲ တၢ်ကတိၤ အဆူၣ်အအၢတဖၣ်အံၤ, တစံးဆၢမၤဆၢက့ၤတၢ်နီတမံၤဘၣ်န့ၣ်လီၤ. ဝံၤန့ၣ်ဒီး, ကၠီးကတိၤဆၢက့ၤအီၤ လၢတၢ်ကတိၤ ကပုာ်လုးဖိ, ဒီးစံးဝဲ “မုၢ်တနံၤအံၤ နလဲၤခီဖျိဘၣ်တ့ၢ်ဝဲလၢ တၢ်ကီတၢ်ခဲနီၢ်နီၢ်အပူၤ တမ့ၢ်ဘၣ်ဧါ” န့ၣ်လီၤ.သတူၢ်ကလာ်န့ၣ်, ပှၤအသးဒိၣ်ကဲၤထီၣ်တဂၤအံၤ အမဲာ်သၣ်ကပုာ်လီၤ, ဆုးလီၤအခိၣ်, ဒီးစံးဝဲ “ဝံသးစူၤဘၣ်ယၤလၢ ယစံးကတိၤဘၣ်နၤ ဒ်သိးအံၤအဃိန့ၢ်တက့ၢ်” န့ၣ်လီၤ. ကၠီး အတၢ်သူၣ်ဂ့ၤသးဝါန့ၣ် မၤစၢ်လီၤ ပှၤခိၣ်ဃၢၤတဂၤအံၤ အတၢ်သူၣ်ဒိၣ်သးဖျိးန့ၣ်လီၤ.

အကတီၢ်တဖၣ်ကအိၣ်ဝဲလၢ ပကအဲၣ်ဒိးစံးဆၢမၤဆၢက့ၤတၢ် ဆူၣ်ဆူၣ်ကိၤကိၤန့ၣ်လီၤ. ပအဲၣ်ဒိးမၤဆၢက့ၤ တၢ်မၤဆါပှၤအဂီၢ် လၢတၢ်မၤဆါက့ၤပှၤဂၤ, ဒီးတၢ်ကတိၤတရီတပါပှၤအဂီၢ် လၢတၢ်ကတိၤတရီတပါဆၢက့ၤပှၤဂၤန့ၣ်လီၤ. လၢတၢ်ကမၤဆၢက့ၤတၢ် ဒ်သိးအံၤအလီၢ်န့ၣ်, တၢ်လၢ ကၠီး အိၣ်မူဟ့ၣ်ဒိဝဲန့ၣ် မ့ၢ်တၢ်အဲၣ်သူၣ်ကညီၤ သးကညီၤအတၢ်မၤ, ပာ်ဖျါထီၣ် ကျိၤကျဲအဂ့ၤကတၢၢ် လၢကစၢ်ယ့ၣ်ရှူးမၤဝဲ, ဒ်အမ့ၢ် အတၢ်တူၢ်ဘၣ်ခီၣ်ဘၣ် ပတၢ်ဒဲးဘး အဘူးအလဲတဖၣ်- ဒီး ၁ ပ့း ၂:၂၃ ပာ်ဖျါဝဲလၢ “ဘၣ်တၢ်ဒုၣ်ဒွဲၣ်, ဒီးတဒုၣ်ဒွဲၣ်ဆၢဘၣ်ဝဲဘၣ်, ဒိးတၢ်, ဒီးတကတိၤပျံၤဘၣ်တၢ်ဘၣ်, မ့ၢ်အအးလီၤအသးလၢ ပှၤစံၣ်ညီၣ်တီတၢ်တဂၤအစုပူၤလီၤ” န့ၣ်လီၤ.

ဖဲလၢပှၤဂၤအတၢ်နၢ်ပၢၢ်ကမၣ်ပှၤ, ပှၤတသ့ၣ်ညါ ပတၢ်မ့ၢ်တၢ် အမ့ၢ်အတီ, မ့တမ့ၢ် တၢ်မၤဒၢၣ်မၤဆါပှၤ အကတီၢ်တဖၣ်န့ၣ် ပဝဲကိးဂၤဒဲး ပကဘၣ်ကွၢ်ဆၢၣ်မဲာ်ဝဲဒၣ် န့ၣ်လီၤ. ဒ်ပတူၢ်ဘၣ်ခီၣ်ဘၣ်အသိး ပအဲၣ်ဒီးမၤဆၢက့ၤတၢ်ဘၣ်ဆၣ်, ကစၢ်ယ့ၣ်ရှူးအသး ကွဲမုာ်ပှၤလၢ ပကအိၣ်ဒီးတၢ်သူၣ်ကညီၤသးကညီၤ, တၢ်မၤဃူမၤဖိးတၢ်, ဒီးပာ်ဖျါထီၣ် တၢ်နၢ်ပၢၢ်လိာ်သးတဖၣ်န့ၣ်လီၤ. မုၢ်တနံၤအံၤ, ဒ်သိးပကဆိၣ်ဂ့ၤပှၤတဂၤဂၤ လၢအဘၣ်လဲၤခီဖျိမုၢ်နံၤအကီအခဲတနံၤတဖၣ်အဂီၢ်, လၢကစၢ်ယ့ၣ်ရှူးအတၢ်မၤစၢၤပှၤအပူၤ, ကစၢ်ယွၤစူးကါပှၤကသ့ဝဲသ့ၣ်သ့ၣ်န့ၣ်လီၤ.