ပှၤအဲကလံးဖိ, လၢအတ့ခဲၣ်တၢ်ဂီၤလီၤကမၢကမၣ် “ကၠီ မၣ်တ့ၣ်” (John Martin, ၁၇၈၉-၁၈၅၄) တဂၤအံၤ ဘၣ်တၢ်သ့ၣ်ညါအီၤလၢ အတၢ်ဂီၤခဲၣ်, လၢအပာ်ဖျါထီၣ်ပှၤဟီၣ်ခိၣ်ဖိတဖၣ် အလုၢ်လၢ်ဆဲးလၤ, ဒီးတၢ်အိၣ်မူကျိၤကျဲတဖၣ်ဟးဂီၤအဂ့ၢ်န့ၣ်လီၤ. လၢတၢ်ဂီၤလီၤကမၢကမၣ်တဖၣ်အံၤအပူၤ, ပှၤဟီၣ်ခိၣ်ဖိတဖၣ် အသးလီၤဘှံးလီၤဘှါ လၢတၢ်ဟးဂီၤဖးခိၣ်, ဒီးလၢတၢ်ကမၤပတုာ်တၢ်နးတၢ်ဖှီၣ်ဖးဒိၣ်လၢကဟဲဝဲအဂီၢ်န့ၣ် အဝဲသ့ၣ် အစိအကမီၤ တအိၣ်လၢၤဘၣ်န့ၣ်လီၤ. အတၢ်ဂီၤခဲၣ်တဖၣ်အကျါတမံၤန့ၣ်, “ဝ့ၢ်နံၤနဝ့ အတၢ်ဟးဂီၤ” (The Fall of Nineveh), ဒီးပာ်ဖျါဝဲဒၣ် ပှၤဟီၣ်ခိၣ်ဖိတဖၣ် လၢတၢ်အၢၣ်ခံးသူအဖီလာ်န့ၣ် ဃ့ၢ်ပူၤဖျဲးအသးလၢ လပီဖးဒိၣ်တဖၣ် လၢအကဟဲမၤဟးဂီၤအဝဲသ့ၣ်တဖၣ်န့ၣ်လီၤ.

တချုး မၣ်တ့ၣ် တ့ခဲၣ်တၢ်ဂီၤအံၤ လၢအနံၣ် ခံကထိဘျဲၣ်န့ၣ်, ဝံနၤဃူာ်စံးကတိၤဆိပာ်ဝဲလၢ ဝ့ၢ်နံၤနဝ့ ကဘၣ်တၢ်စံၣ်ညီၣ်အီၤအဂ့ၢ်န့ၣ်လီၤ. နၤဃူၣ် ၁:၅ န့ၣ် ဝံ ဟ့ၣ်ဒိဝဲလၢ ကစၢၢ်ကလိဟူးဝး, တၢ်စိခိၣ်ပှံၢ်ထီၣ်ကွံာ်, ဒီးဟီၣ်ခိၣ်ကဆှဲးကဆှိးဝဲ ဒ်သိးကပာ်ဖျါထီၣ် ယွၤအသးထီၣ်အသးဒိၣ် ပှၤလၢအဆီၣ်သနံးပှၤဂၤပှၤဂုၤ, လၢအနီၢ်ကစၢ် တၢ်ကဲဘျုးအဂီၢ်န့ၣ်လီၤ. ဘၣ်ဆၣ်, လၢတၢ်ဒဲးဘးအဂီၢ် ကစၢ်ယွၤဟ့ၣ်ကၣ်တၢ်န့ၣ်, တမ့ၢ်လၢ ယွၤအတၢ်သူၣ်ကညီၤတၢ်သးကညီတအိၣ်အဃိဘၣ်. ဖဲလၢ ဝံနၤဃူၣ် ဟ့ၣ်ပလီၢ်ဝဲ ပှၤဒိကနၣ်တၢ်ဖိတဖၣ်လၢ ယွၤအစိကမီၤ, တကတီၢ်ဃီ, အဆၢဖိ ၃ န့ၣ် ဝံ ပာ်ဖျါဝဲလၢ ကစၢ်ယွၤန့ၣ် “အသးထီၣ်ကီ,” ဒီးအဆၢဖိ ၇ န့ၣ် ယွၤ “သ့ၣ်ညါပှၤလၢ အသန့ၤအသးလၢအီၤ” န့ၣ်လီၤ.

ပကဘၣ်ဖး ယွၤအတၢ်စံၣ်ညီၣ်အတၢ်ပာ်ဖျါတဖၣ်န့ၣ် မ့ၢ်တၢ်ကီတၢ်ခဲလၢပဂီၢ်ဘၣ်ဆၣ်, ဟီၣ်ခိၣ်လၢ အတထီဒါကွၢ်ဆၢၣ်မဲာ်က့ၤ တၢ်အၢတၢ်သီန့ၣ် ကမ့ၢ်တၢ်လီၢ်တၢ်ကျဲ လၢအလီၤပျံၤလီၤဖုးဒိၣ်မးန့ၣ်လီၤ. ပကဘၣ်စံးဘျုးလၢ ဝံတမၤကတၢၢ်ဝဲ အတၢ်ကတိၤဖဲအံၤအဃိန့ၣ်လီၤ. အဆၢဖိ ၁၅ န့ၣ် ဝံမၤသ့ၣ်နီၣ်ပှၤ “ကွၢ်ကွၢ်, ပှၤအခီၣ်လၢအစံၣ်တဲၤတဲလီၤ တၢ်သးခုအကစီၣ်, လၢအစံၣ်တဲၤတဲလီၤတၢ်ဃူတၢ်ဖိးန့ၣ် အိၣ်ဝဲလီၤ,” ဒ်အမ့ၢ် ကစၢ်ယွၤအဲၣ်ဒိးဟီၣ်ခိၣ်အံၤကအိၣ်ပှဲၤဒီးတၢ်ဂ့ၤတၢ်ဝါ, ဒီးတၢ်တီတၢ်လိၤ န့ၣ်လီၤ. ရိမ့ၤ ၅:၁,၆ ပာ်ဖျါဝဲ တၢ်သးခုကစီၣ်အံၤ မ့ၢ်ဝဲကစၢ်ယ့ၣ်ရှူး, တူၢ်သံအသးလၢပတၢ်ဒဲးဘးအဘူးအလဲ, ဒ်သိး ပကအိၣ်ဃူအိၣ်ဖိးက့ၤဒီးယွၤအဂီၢ်န့ၣ်လီၤ.