ပတၢ်အိၣ်ဖှိၣ်ခိၣ်နၢ် ဟါရိၣ် (Harold) ဒီးအမါသးဘိ ပဲ(မ) (Pam) ကွဲမုာ်ယၤလၢ ဟါတၢ်အီၣ်အဂီၢ်န့ၣ် ယသူၣ်ခုယသးခု, ဘၣ်ဆၣ် ကဲထီၣ်တၢ်သူၣ်ကိၢ်သးဂီၤလၢယဂီၢ် စ့ၢ်ကီးန့ၣ်လီၤ. ယလဲၤထီၣ် ခီလ့ၣ်ကၠိ တၢ်မၤလိ လံာ်စီဆှံကရူၢ်ဖိ တကရူၢ် လၢအသိၣ်လိ တၢ်ထံၣ်တၢ်ဆိကမိၣ်တဖၣ်လၢ အထီဒါလိာ်သးဒီး လံာ်စီဆှံ အတၢ်သိၣ်လိသီလိတနီၤအဃိ ယဆိကမိၣ်လၢ ယသးပူၤ, “မ့ၢ်အဝဲသ့ၣ် ကသိၣ်သီယၤ လၢတၢ်ဂ့ၢ်အံၤအဃိဧါ”န့ၣ်လီၤ.

ဖဲပအီၣ်ကိၣ်ပံၣ်စၢ်အကတီၢ်န့ၣ်, အဝဲသ့ၣ် စံးကတိၤနီၤဟ့ၣ် အဟံၣ်ဖိဃီဖိတဖၣ် အဂ့ၢ်, ဒီးသံကွၢ်ယဂ့ၢ်ယကျိၤန့ၣ်လီၤ. ဖဲယစံးကတိၤပာ်ဖျါ လံာ်လၢယဘၣ်မၤလၢဟံၣ်အဂ့ၢ်, ယထွံၣ်ဖိ ဘူၣ်ခၠံၣ် (Buchi) အဂ့ၢ်, ဒီးပှၤပိာ်ခွါ လၢယအဲၣ်ခူသူၣ်ဘၣ်တဂၤအဂ့ၢ်န့ၣ်ဒီး အဝဲသ့ၣ် ခိးကနၣ်ဝဲဒၣ်န့ၣ်လီၤ. အကတၢၢ်န့ၣ်ဒီး, လၢတၢ်ကတိၤကပုာ်လုးအပူၤန့ၣ် အဝဲသ့ၣ် ဟ့ၣ်ပလီၢ်ယၤ ဘၣ်ထွဲဒီး ကရူၢ်လၢ ယလဲၤထီၣ်အဂ့ၢ်, ဒီးတဲနၢ်ပၢၢ် အတၢ်သိၣ်လိသီလိလၢ အကမၣ်တဖၣ်အဂ့ၢ်န့ၣ်လီၤ.

အဝဲသ့ၣ် အတၢ်ဟ့ၣ်ပလီၢ်န့ၣ် ထုးယံၤက့ၤယၤလၢ တၢ်သိၣ်ကမၣ်သီကမၣ်တဖၣ်, လၢအဘၣ်တၢ်ဟ့ၣ်လီၤ ဖဲတၢ်မၤလိလံာ်စီဆှံ, ဒီးတၢ်မၤဘူးထီၣ်က့ၤယၤဆူ ယွၤအကလုၢ်အကထါ အတၢ်မ့ၢ်တၢ်တီတဖၣ်န့ၣ်လီၤ. ယူဒၤ ၁:၃ အပူၤန့ၣ်, ပှၤကွဲးလံာ်စီၤယူဒၤ စူးကါတၢ်ကတိၤအဆူၣ်အကိၤ ဘၣ်ထွဲဒီး သရၣ်အဘျၣ်တဖၣ်အဂ့ၢ်, ဒီးဟ့ၣ်သဆၣ်ထီၣ် ပှၤစူၢ်က့ၤနာ်က့ၤတၢ်ဖိတဖၣ်လၢ “ကဂုာ်ကျဲးစၢးဒုးတၢ်လၢတၢ်နာ်” အဂီၢ်န့ၣ်လီၤ. အဆၢဖိ ၁၈-၁၉ န့ၣ် ဒုးသ့ၣ်နီၣ်ထီၣ်က့ၤ အပှၤဖးလံာ်တဖၣ်လၢ “ပှၤဒုၣ်ဒွဲၣ်တၢ်လၢ အလဲၤဒ် အတၢ်တယူးတယီၣ်ဘၣ် ယွၤအတၢ်ကလုာ်ကလိၤအသိးန့ၣ်, ကအိၣ်ဝဲလၢ အဆၢ အကတီၢ်ကတၢၢ်န့ၣ်လီၤ. ပှၤတဖၣ်န့ၣ် မ့ၢ်ပှၤလၢအမၤလီၤမုၢ်လီၤဖးတၢ်, … ပှၤတအိၣ်ဘၣ်ဒီးသးန့ၣ်ဘၣ်” န့ၣ်လီၤ. ဘၣ်ဆၣ်ဒီး ဖဲအလဲၤသဃဲၤတၢ်ဒီးအဝဲသ့ၣ်အကတီၢ်, အဆၢဖိ ၂၂ န့ၣ်, စီၤယူဒၤ သိၣ်လိသီလိစ့ၢ်ကီး ပှၤစူၢ်က့ၤနာ်က့ၤတၢ်တဖၣ်,လၢ “ပှၤတနီၤနီၤလၢ အသးဒ့ဒီဝဲန့ၣ် သးကညီၤအီၤတက့ၢ်,” ဒီးပာ်ဖျါတၢ်အဲၣ်တၢ်ကွံ, လၢတၢ်တထိၣ်ဃူမၤဖိးတၢ်မ့ၢ်တၢ်တီအပူၤန့ၣ်လီၤ.

ဟါရိၣ် ဒီး ပဲ(မ) သ့ၣ်ညါ ယတၢ်စူၢ်တၢ်နာ်အဂံၢ် တဂၢၢ်တကျၢၤဂ့ၤဂ့ၤဒံးဘၣ်န့ၣ်လီၤ. ဘၣ်ဆၣ် စံၣ်ညီၣ်တဲာ်တၢ်လၢယလိၤအလီၢ်န့ၣ်, အခီၣ်ထံး အဝဲသ့ၣ် ဒုးကဲထီၣ်ယၤ တၢ်ဒီတံၤဒီသကိး, ဒီးအန့ၣ်ဝံၤမး ဟ့ၣ်ယၤတၢ်ကူၣ်သ့န့ၣ်လီၤ. မ်ယွၤကဟ့ၣ်ပှၤ တၢ်အဲၣ်ဒီးတၢ်သူၣ်စူၤသးစူၤတမံၤဃီဒ်သိးအံၤ, ဒီးစူးကါ တၢ်ကူၣ်သ့ဒီးတၢ်သးကညီၤ ဖဲပရ့လိာ်ဘၣ်ထွဲလိာ်သးဒီး ပှၤတဖၣ်လၢ အအိၣ်ဒီးတၢ်သးဒ့ဒီန့ၣ်တက့ၢ်.