နကစူးကွံာ်ညိကွံာ် တၢ်ကတိၤအၢသီ အရၢၢ်အစၢၢ်တဖၣ်ဒ်လဲၣ်. တီၤထီကၠိတဖၣ် ဃုထၢ ပာ်လီၤဝဲလၢ ကဒုးအိၣ်ထီၣ် သနိတမံၤ, ဒ်အမ့ၢ် တၢ်အၢၣ်လီၤအီလီၤလၢ အသုတစံးကတိၤ “တၢ်ကတိၤအၢသီ, အရၢၢ်အစၢၢ်” ဘၣ်န့ၣ်လီၤ. ကၠိဖိတဖၣ် ဆိၣ်လီၤအၢၣ်လီၤ, ဒီးဘၣ်စံးဝဲ “လၢတၢ်သညူးသပှၢ်အပူၤ ယအၢၣ်လီၤယဲလၢ ယတစံးကတိၤ ဒုၣ်ဒွဲၣ်စံးအၢစံးသီတၢ်တမံၤလၢ်လၢ်ဘၣ်လၢ ပကၠိကရၢၢ်ပူၤ, ဒီးတကွဲးဘၣ်အၢတၢ်လၢ ကၠိပီးလီတဖၣ်အလိၤ ဘၣ်န့ၣ်လီၤ”. တၢ်မၤအံၤ မ့ၢ်တၢ်ကျဲးစၢးလၢ အဂ့ၤ, ဒီးအပတီၢ်ထီတမံၤဘၣ်ဆၣ်, ကစၢ်ယ့ၣ်ရှူးစံးဝဲလၢ, တၢ်ကတိၤအၢသီအစိ, အတၢ်နၢတၢ်နွါန့ၣ် တၢ်မၤဘံၣ်မၤဘၢ, မၤဟါမၢ်လၢတၢ်သနိ မ့တမ့ၢ် တၢ်အၢၣ်လီၤလၢ အဖျါထဲလၢခိဧိၤ တသ့နီတဘျီဘၣ်န့ၣ်လီၤ.
တၢ်မၤပျီမၤစီကွံာ် ပထးခိၣ်အတၢ်ကတိၤ အတၢ်နၢတၢ်နွါတဖၣ်အစိန့ၣ် စးထီၣ်လၢ တၢ်မၤသီထီၣ်က့ၤ ပသူၣ်ပသးန့ၣ်လီၤ. လူၤ ၆:၄၃-၄၄ အပူၤန့ၣ် ကစၢ်ယ့ၣ်ရှူးစံးဝဲလၢ ဒ်ပှၤသ့ၣ်ညါသ့ၣ်တထံး ခီဖျိလၢအသၣ်ဒၣ်ဝဲအသိး, ပတၢ်ကတိၤတဖၣ် မ့ၢ်နီၣ်ထိၣ်လၢ ပနာ်န့ၢ်အီၤသ့, ဒီးပာ်ဖျါထီၣ်ဝဲ မ့ၢ်ပနီၢ်သးဘၣ်လိာ်ဖိးမံလိာ်သးဒီး ယွၤအကျဲတဖၣ်ဧါ, တဘၣ်လိာ်ဖိးမံလိာ်သးဘၣ်ဧါန့ၣ်လီၤ. အဆၢဖိ ၄၅ ပာ်ဖျါဝဲ “ဒ်တၢ်ပှဲၤပသးလုၣ်ကွံာ် အသိး, ပထးခိၣ်ကတိၤတၢ်” အဃိ, တၢ်အသူၤအသၣ်န့ၣ် ပာ်ဖျါထီၣ် ပှၤတဂၤအတၢ်စံးတၢ်ကတိၤန့ၣ်လီၤ. ကစၢ်ခရံာ် ဒုးနဲၣ်ဝဲဒၣ်လၢ ပမ့ၢ်အဲၣ်ဒိးဆီတလဲ တၢ်အိၣ်ဟဲထီၣ်လၢ ပထးခိၣ်နီၢ်နီၢ်န့ၣ်, ပကဘၣ်ဆီတလဲဆိပသူၣ်ပသး, ဒ်သိးလၢအမၤစၢၤပှၤအပူၤန့ၣ်လီၤ.
တၢ်ကပၢၤဃာ် တၢ်ကတိၤအၢသီ, အိၣ်ဟဲဟးထီၣ်, ခီဖျိလၢနီၢ်သးတၢ်ဆီတလဲသးတအိၣ်အဂီၢ် တၢ်အၢၣ်လီၤအဖျါလၢခိတဖၣ်န့ၣ် တၢ်မၤတကဲထီၣ်ဘၣ်. ပစူးကွံာ်ညိကွံာ် တၢ်ကတိၤအၢသီကသ့အဂီၢ်န့ၣ်, ဒ် ၁ ကရံၣ်သူး ၁၂:၃ စံးဝဲအသိး, တၢ်အခီၣ်ထံးန့ၣ် ပကဘၣ်စူၢ်က့ၤနာ်က့ၤဆိ ကစၢ်ယ့ၣ်ရှူး, ဒီးကဘၣ်ပိာ်ထွဲထီၣ်အခံ, ဒ် အ့းဖ့း ၅:၁၈ ပာ်ဖျါဝဲအသိး, ပကဘၣ်ကွဲမုာ် သးမုာ်စီဆှံကအိၣ်ပှဲၤလၢပပူၤန့ၣ်လီၤ. ဒ် အဆၢဖိ ၂၀ ပာ်ဖျါဝဲအသိး, ပကစံးဘျုးစံးဖှိၣ်ကစၢ်ယွၤတဘိယူၢ်ဃီအဂီၢ်, ဒီးဒ် အ့းဖ့း ၄:၁၅, ၁၉, ဒီး ကလီး ၄:၆ ပာ်ဖျါဝဲအသိး, ပကစံးကတိၤဟ့ၣ်ဂံၢ်ဟ့ၣ်ဘါ, ဒီးကမ့ၢ်တၢ်ကတိၤတဖၣ်လၢအကဲဘျုးပှၤဂၤအဂီၢ် ကစၢ်ယ့ၣ်ရှူး မၤတၢ်လၢပပူၤ, ဒ်သိးကထိၣ်ဟူးထိၣ်ဂဲၤထီၣ်ပှၤ, ဒီးကမၤစၢၤပှၤအဂီၢ်န့ၣ်လီၤ.
