“မ့ၢ်ယပီၢ်ယၢ်လီၤက့ၤယသးလၢ တၢ်မနုၤအဂီၢ်လဲၣ်.” တၢ်အံၤ မ့ၢ်တၢ်သံကွၢ်တထံၣ်လၢ New York Times တၢ်ကစီၣ်အလံာ်ပရၢ အပှၤကွဲးလံာ်လၢ အဆါဘၣ်အအါကတၢၢ် ကၠီး စီဒၢၣ် (George Saunders) စံးဆၢဝဲ, ဖဲအတၢ်ကတိၤလီၤတၢ်ဆူ ၂၀၂၃ နံၣ် ပှၤဖျိကၠိတဖၣ် ဖဲစံၣ်ရၣ်ကၠူး (Syracuse) ဖၠၣ်စိမိၤန့ၣ်လီၤ. အတၢ်ကတိၤကျိၤကျဲမ့ၢ်ဝဲ ခီဖျိလၢပှၤသးပှၢ် စီဒၢၣ် တဂၤ ဟ့ၣ်ခီဟ့ၣ်နီၤလီၤ အတၢ်ပီၢ်ယၢ်လီၤသး တမံၤ ခံမံၤလၢအတၢ်အိၣ်မူအပူၤ ဆူပှၤသးစၢ်တဖၣ် (ဖျိကၠိတဖၣ်) ဒ်သိးအကမၤလိန့ၢ် တၢ်တမံၤမံၤ, ခီဖျိလၢ အတၢ်ဟ့ၣ်ဒိတဖၣ်အပူၤ ကသ့အဂီၢ်န့ၣ်လီၤ. အဝဲရဲၣ်လီၤတၢ်ဂ့ၢ်စှၤထံၣ်, လၢအမ့ၢ် တၢ်ဘၣ်ဖှီၣ်ဘၣ်ယာ်, ဒီးဘၣ်မၤတၢ်မၤကီခဲတမုာ်တလၤတဖၣ် ဘၣ်သ့ၣ်သ့ၣ် ပှၤကဆိကမိၣ် တၢ်လၢအပီၢ်ယၢ်လီၤက့ၤအသးတဖၣ်န့ၣ်လီၤ. ဘၣ်ဆၣ် စီဒၢၣ် စံးဝဲ လၢတၢ်ဂ့ၢ်တဖၣ်အံၤအဃိ အဝဲတပီၢ်ယၢ်လီၤက့ၤအသးနီတစဲးဘၣ်န့ၣ်လီၤ. မ့မ့ၢ် တၢ်လၢအပီၢ်ယၢ်လီၤက့ၤအသး, ဒီးအသူၣ်တမုာ်သးတမုာ်က့ၤတၢ်တဖၣ်န့ၣ် မ့ၢ်အတၢ်လီၤတိၢ်ဝဲလၢ ကမၤဂ့ၤမၤဘျုးတၢ်အဂီၢ်- အဝဲဒုးလဲၤပူၤကွံာ် တၢ်အခွဲးအယာ်တဖၣ်လၢ အကဘၣ်မၤဂ့ၤမၤဘျုးတၢ်အဂီၢ်န့ၣ်လီၤ.

တၢ်မၢဖိ စီၤပီလူး ကွဲးလီၤလံာ် ဆူပှၤစူၢ်က့ၤနာ်က့ၤတၢ်ဖိတဖၣ်လၢ အ့းဖ့းစူး အဝ့ၢ်, ဒီးစံးဆၢတၢ်သံကွၢ်, “ခရံာ်ဖိတၢ်အိၣ်မူမ့ၢ်တၢ်ဒ်လဲၣ်” အဂ့ၢ်န့ၣ်လီၤ. တၢ်အံၤကဲထီၣ် တၢ်လ့ပစီသ့လၢ ပကဟ့ၣ်ထီၣ်တၢ်စံးဆၢတဖၣ်ချ့ချ့, ဒ်အမ့ၢ် တၢ်အိၣ်ဒီးထံဂ့ၢ်ကီၢ်ဂ့ၢ် အတၢ်ထံၣ်လီၤဆီ, တၢ်ဟးဆှဲး လံာ်လဲၢ် မ့တမ့ၢ် တၢ်ဂီၤမူတနီၤ, တၢ်ဘူၣ်ထီၣ်ဘါထီၣ် ကစၢ်ယွၤလၢကျိၤကျဲလီၤဆီန့ၣ်လီၤ. ဘၣ်ဆၣ် စီၤပီလူး တပာ်တၢ်အဆၢထဲ ခ့ခါတၢ်ဂ့ၢ်တၢ်ကျိၤတဖၣ်ဧိၤဘၣ်. အ့းဖ့း ၄:၂၉ အပူၤန့ၣ် စီၤပီလူး ယၢၤထီၣ်ပာ်ဖျါဝဲ တၢ်ဟးဆှဲး “တၢ်ကတိၤအအၢအသီ,” ဒီးအဆၢဖိ ၃၁ န့ၣ် ပာ်ဖျါဝဲ တၢ်ထုးထီၣ်ကွံာ် တၢ်အခၣ်, ဒီးတၢ်သးထီၣ်တဖၣ်လၢပပူၤန့ၣ်လီၤ. ဝံၤန့ၣ်ဒီး, အဆၢဖိ ၃၂ န့ၣ် စီၤပီလူး မၤကတၢၢ်အတၢ်ကတိၤဆူ ပှၤအ့းဖ့းစူးဖိတဖၣ်, ဃုာ်ဒီးပဝဲနၤယၤအအိၣ်, ဒီးစံးဝဲ “သူၣ်ကညီၤသးကညီၤလိာ်သုသး” န့ၣ်လီၤ. တၢ်ဂ့ၢ်အခီၣ်ထံးခီၣ်ဘိန့ၣ်, ခီဖျိလၢယွၤအိၣ်လၢခရံာ်အပူၤ သူၣ်ကညီၤသးကညီၤပှၤအဃိန့ၣ်လီၤ.

တၢ်အိၣ်မူလၢ ကစၢ်ယ့ၣ်ရှူးအပူၤ အခီပညီအါမံၤလၢ ပနာ်အီၤအကျါတမံၤန့ၣ် မ့ၢ်တၢ်အဲၣ်သူၣ်ကညီၤသးကညီၤတၢ်န့ၣ်လီၤ.