တၢ်သးခုကစီၣ်အတၢ်လဲၤဖုၣ်ကိာ် ဆူအံးသံၣ်ယိပံယၤအကီၢ်န့ၣ်, ပပှၤလဲၤတၢ်တဖု ပဘၣ်လဲၤသကိးတၢ်ဒီး လီၢ်ကဝီၤ တၢ်သးခုကစီၣ်အဂၤတဖု, လၢအတုၤဃီၤမၤစၢၤ ပှၤသးစၢ်တဖုလၢ အဘၣ်ကီဘၣ်ခဲ, ဒီးဘၣ်အိၣ်ဆိးဝဲလၢ ဒဲပစီၢ်ဖိတဖၣ် လၢပှၤလဲၤ တၢၤကွံာ်စူးကွံာ် တၢ်ဖိတၢ်လံၤတဖၣ်အလီၢ်န့ၣ်လီၤ. ပထံၣ်လိာ်သးဒီးအဝဲသ့ၣ် မ့ၢ်တၢ်လၢ အလီၤသးမုာ်သးခုဒိၣ်မးန့ၣ်လီၤ. ပဟ့ၣ်ခီဟ့ၣ်နီၤသကိး တၢ်အုၣ်သးတဖၣ်, တၢ်ကတိၤဟ့ၣ်ဂံၢ်ဟ့ၣ်ဘါတဖၣ်, ဒီးဃ့ထုကဖၣ်သကိးတၢ်ဆူကစၢ်ယွၤန့ၣ်လီၤ. မုၢ်ဟါအကတီၢ်ဖိလၢ အဘၣ်ယသးဒိၣ်မးန့ၣ် ဖဲလီၢ်ကဝီၤတၢ်သးခုကစီၣ်ကရူၢ်ဖိတဂၤ ဒ့ဝဲ အကံၢ်ထါ ဒီးပဘူၣ်သကိးဘါသကိးယွၤဒီးပတံၤသကိးအသီတဖၣ်အံၤ လၢလါအတၢ်ကပီၤ အဖီလာ်န့ၣ်လီၤ. မ့ၢ်တၢ်ဆၢကတီၢ်ဖိလၢ အစီဝဲဆှံဝဲဒိၣ်မးန့ၣ်လီၤ. အဝဲသ့ၣ်အတၢ်အိၣ်အသး တၢ်ဘၣ်ယိၣ်မ့ၢ်အိၣ်ဒၣ်လဲာ်န့ၣ်, ပှၤတဖၣ်အံၤအိၣ်ဒီး တၢ်မုၢ်လၢ်, ဒီးတၢ်သးခု, တၢ်လၢပထံၣ်န့ၢ်အီၤ သ့ဒၣ်ထဲ ကစၢ်ယ့ၣ်ရှူးအပူၤန့ၣ်လီၤ.

လံာ်မၤတၢ် ၁၆ အပူၤန့ၣ်, ပကဖးဘၣ် တၢ်စံးထီၣ်ပတြၢၤ သတူၢ်ကလာ်အဂၤတမံၤလၢအမ့ၢ် တၢ်ဂ့ၢ်ကဲထီၣ်အသး လၢဝ့ၢ်ဖံလံးပံၤအဃိာ်ပူၤန့ၣ်လီၤ. စီၤပီလူးဒီးစီၤစံလၤ ဖဲအမၤကစၢ်ယ့ၣ်ရှူးအတၢ်မၤအဆၢကတီၢ် ဘၣ်တၢ်ဖီၣ်, ဘၣ်တၢ်ဒိတီၢ်, ဘၣ်တၢ်ဖျ့လၢ နီၣ်ဖျ့, ဒီးဘၣ်တၢ်တ့ၢ်နုာ်လီၤဆူဃိာ်ပူၤန့ၣ်လီၤ. လၢတၢ်ဟ့ၣ်လီၤအသးဆူ တၢ်သးဟးဂီၤအလီၢ်န့ၣ် အဝဲသ့ၣ် ဘူၣ်ထီၣ်ဘါထီၣ်ယွၤ ခီဖျိတၢ် “ဃ့ထုကဖၣ်ဒီးသးဝံၣ်သးဆၢယွၤ” လၢအဝဲသ့ၣ်အဃိာ်ဒၢးအပူၤန့ၣ်လီၤ. အဆၢဖိ ၂၅-၂၆ ပာ်ဖျါဝဲလၢ “ဒီးဟီၣ်ခိၣ်ဟူးဝးဝဲ သတူၢ်ကလာ်ဒိၣ်မး တုၤဃိာ်အခီၣ်ထံးဟူးဝးဝဲ, ဒီးတြဲၤခဲလၢာ် အိးထီၣ်အသးတကီၢ်ခါ, ဒီးပှၤခဲလၢာ်အပျံၤလီၤဃ့ၣ်ဝဲလီၤ” န့ၣ်လီၤ.

အဆၢဖိ ၂၇-၃၄ ပာ်ဖျါဝဲ ပှၤဃိာ်ဒိၣ် အတၢ်ဆိကမိၣ် အဆိကတၢၢ်န့ၣ် မ့ၢ်ဒၣ် ကမၤသံလီၤအသးဘၣ်ဆၣ် ဖဲအဝဲသ့ၣ်ညါထွဲလၢ ပှၤလီၤဃိာ်ဖိတဖၣ် တဃ့ၢ်ပူၤဖျဲးအသးဒံးဘၣ်န့ၣ်, ကဲထီၣ်တၢ်ကမၢကမၣ် လၢကစၢ်ယွၤအဖီခိၣ်, ဒီးတၢ်အုၣ်က့ၤခီၣ်က့ၤ ဟဲတုၤဃီၤဆူ အဟံၣ်ဖိဃီဖိအအိၣ်န့ၣ်လီၤ.

ဖဲကစၢ်ယွၤနၢ်ဟူ ပတၢ်စံးထီၣ်ပတြၢၤအီၤန့ၣ်ဒီး အဝဲမုာ်လၤသးခုဝဲဒၣ်န့ၣ်လီၤ. လၢပတၢ်အိၣ်မူအကတီၢ်, လၢအမုာ်ဒီးအတမုာ် ခံကတီၢ်လၢာ်အပူၤ, မ်ပကဘူၣ်ထီၣ်ဘါထီၣ်လိာ်သကိးအီၤန့ၣ်တက့ၢ်.