ဖဲယတံၤသကိး အီ (AL) ဒီး က့ၣ်သံၣ် ရှံၤဖၣ် (Kathy Schiffer) ဟဲနီၣ် ကဘီယူၤလၢအမ့ၢ် ဟီၣ်ခိၣ်ဒီဘ့ၣ် တၢ်ဒုးဖးဒိၣ်ခံဘျီတဘျီအစိၤတခိၣ် ဆူတၢ်ဒုးနဲၣ်ကမျၢၢ် တၢ်ယူၤကဘီယူၤတဖၣ်အကတီၢ်, လၢအဝဲသ့ၣ်အဂီၢ်တၢ်အခီပညီအဒိၣ်ကတၢၢ် မ့ၢ်ဝဲ ပှၤသုးဖိလီၢ်လံၤသးပှၢ်တဖၣ် အတၢ်မၤဆၢက့ၤတၢ်တဖၣ်န့ၣ်လီၤ. အဝဲသ့ၣ် ဟဲဝဲဆူတၢ်ဒုးနဲၣ်အံၤ, ဒ်သိးကကတိၤသကိး တၢ်ဒုးတဖၣ်လၢ အဝဲသ့ၣ် ဘၣ်ဒုးတ့ၢ်ဝဲ, ဒီးကဘီယူၤတဖၣ် လၢအဝဲသ့ၣ်နီၣ်တ့ၢ်ဝဲအဂ့ၢ်န့ၣ်လီၤ. အါတက့ၢ်, တၢ်ဒုးတဖၣ်လၢအဝဲသ့ၣ်ဒုးတ့ၢ်ဝဲအဂ့ၢ်န့ၣ် ဘၣ်တၢ်စံးကတိၤက့ၤလၢမဲာ်ထံမဲာ်နိအပူၤန့ၣ်လီၤ. အဝဲသ့ၣ် အါဒံအါဂၤစံးဝဲ ဖဲလၢအဒုးတၢ်လၢအထံကီၢ်အဂီၢ် အဆၢကတီၢ်န့ၣ် တၢ်ကစီၣ်အဂ့ၤကတၢၢ် လၢအဝဲသ့ၣ် ဒိးန့ၢ်ဘၣ်ဝဲ မ့ၢ်တၢ်ကတိၤတဖၣ်လၢအစံး, “တၢ်ဒုးတၢ်ယၤဝံၤလံ. တၢ်ဆၢကတီၢ်ဘၣ်လံလၢ ပကက့ၤဆူဟံၣ်” န့ၣ်လီၤ.
တၢ်ဒုးတၢ်ယၤအတၢ်ကတိၤတဖၣ်အံၤ, အိၣ်ဟဲဝဲဒၣ်လၢ စိၤလၢအမဲာ်ညါတစိၤ ပှၤစူၢ်က့ၤနာ်က့ၤကစၢ်ခရံာ်တဖၣ်ဘၣ်ဒုးဝဲန့ၣ်, ဘၣ်ထွဲလိာ်အသးဒီး ပတၢ်စူၢ်တၢ်နာ်, ပတၢ်ဒုးဆၢက့ၤ ပနီၢ်သး အဒုၣ်အဒါ, မုၣ်ကီၤလံၢ်န့ၣ်လီၤ. ၁ ပ့းတရူး ၅:၈ အပူၤန့ၣ် ပှၤတၢ်မၢဖိ စီၤပ့းတရူး ဟ့ၣ်ပလီၢ်ပှၤလၢ, “ဒ်ခ့ယုၢ်ကညီၤရုၢ်ရုၢ်အသိးန့ၣ်, သုဒုၣ်သုဒါ မုၣ်ကီၤလံၢ် ဟးဝ့ၤဝီၤ ဃုပှၤလၢအကယူၢ်လီၤဝဲလီၤ.” မုၣ်ကီၤလံၢ် လ့ပစီပှၤလၢကျိၤကျဲအကလုာ်အကလုာ်, ဒီးစူးကါတၢ်သးဟးဂီၤလၢ တၢ်တူၢ်ဘၣ်ခီၣ်ဘၣ်အပူၤ, ဒီးစူးကါတၢ်မၤနးမၤဖှီၣ်ပှၤ, ဒ်သိးကဂုာ်ထုးယံၤပှၤလၢ ပတၢ်နာ်လၢခရံာ်အပူၤအဂီၢ်န့ၣ်လီၤ. ၁ ပ့း ၅:၈ အပူၤန့ၣ် စီၤပ့းတရူး တၤဝဲ အပှၤဖးလံာ်အဆိကတၢၢ်တဖၣ်ဃုာ်ဒီးပဝဲနၤ ယၤလၢ မုၢ်မဆါတနံၤအံၤတဖၣ်လၢ, “ကီၤသုသးတက့ၢ်. ဆိးသီတက့ၢ်” န့ၣ်လီၤ. ဒ်သိး ပသုတပျဲပဒုၣ်ပဒါ မၢပကဟ့ၣ်လီၤပသးလၢ တၢ်ဒုးတၢ်ယၤအပူၤ ဒီးဃၣ်ကွံာ်တၢ်အဂီၢ် ပကဘၣ်သန့ၤသးလၢ သးစီဆှံအလိၤန့ၣ်လီၤ.
မုၢ်တနံၤန့ၣ် ပသ့ၣ်ညါလၢ ကစၢ်ယ့ၣ်ရှူး ကဟဲက့ၤဝဲဒၣ်န့ၣ်လီၤ. အဝဲမ့ၢ်ဟဲက့ၤန့ၣ်ဒီး, အတၢ်ကတိၤ “တၢ်ဒုးတၢ်ယၤန့ၣ်ဝံၤလံ. ဖိသ့ၣ်ဧၢ, အကတီၢ်ဘၣ်လံလၢ တၢ်က့ၤဆူဟံၣ်လၢမူခိၣ်န့ၣ်လီၤ” အံၤန့ၣ် ဒ်သုးဖိတဖၣ် လၢတၢ်ဒုးတၢ်ယၤအကတီၢ်အသးကလၢၢ်ဘၣ်ဝဲအသိး, ဒီးပကအိၣ်ဒီးမဲာ်ထံမဲာ်နိ, ဒီးကဟဲစိာ်န့ၢ် တၢ်သးခုဆူ ပသူၣ်ပသးန့ၣ်လီၤ.
