ဘၣ်တဟါ, ယပာ်သူၣ်ပာ်သးလၢ ယဟံၣ်ကပၤ ဟီၣ်ခိၣ်ကဝီၤအိၣ်လီၤဟိအလီၢ်န့ၣ်, ဟီၣ်ခိၣ်အကျိၤတဖၣ် ဖျါဘၣ်လီၢ်ဘၣ်ကျဲန့ၣ်လီၤ. တၢ်အကျိၤကိးကျိၤဒဲးန့ၣ် အိၣ်ဒီး တၢ်အလၣ်လါဟ့ဖိတဖၣ်, ဒီးဖီအဘိၣ်ဆံးဖိတဖၣ် ဟဲဖးထီၣ်ဝဲဒၣ်န့ၣ်လီၤ. လၢခံ တဂီၤန့ၣ်, ယအိၣ်လၢ ယဟံၣ်အကျဲကျိၤန့ၣ် ယထံၣ်ဘၣ် ခၠူလံးဖီ (Tulips)ဂီၤဂီၤ ဃံလၤဖိတဖၣ် မဲထီၣ်အိၣ်ပှဲၤလၢ ဟီၣ်ခိၣ်ကဝီၤန့ၣ်လီၤ.

အပူၤကွံာ် တၢ်ဂိၢ်ထီၣ်သီအကတီၢ်န့ၣ်, ပှၤတဖုသူၣ်လီၤ ဖီအတံၢ် ၁၀၀,၀၀၀, လၢဝ့ၢ် ခၠံၣ်ကၣ်ကိၣ် (Chicago) ကလံၤထံးတကပၤ, ဖဲကယဲၢ်ဟီၣ်ခိၣ်ကဝီၤလီၤဟိတဖၣ်န့ၣ်လီၤ. တၢ်ဃုထၢ ဖီအလွဲၢ်ဂီၤ, ဒ်အမ့ၢ်တၢ်ပာ်ပနီၣ် လၢတၢ်ထီဒါ တၢ်တဟ့ၣ်လိၢ်လီၤစ့ (redlining) လၢတၢ်ကဘှီဟံၣ်အဂီၢ် (စ့တၢးတဖၣ် မၤတရီတပါတၢ်ဟ့ၣ်ဒုးလိၢ်လီၤစ့) န့ၣ် ကဲထီၣ်တၢ်ဘၣ်ဒိဘၣ်ထံး ဆူကလုာ်ဒူၣ်အနီၢ်ဂံၢ်စှၤတဖၣ်လၢ အအိၣ်ဆိးတ့ၢ်ဝဲ အခီၣ်ထံးလံၤလံၤ ဖဲတၢ်လီၢ်ခိၣ်ဃၢၤတဖၣ်အံၤန့ၣ်လီၤ. ဖီခၠူလံးတဖၣ် ကဲထီၣ်တၢ်ပနီၣ်လၢ ဟံၣ်တဖၣ်လၢအကဘၣ်အိၣ်ဝဲ ဖဲလီၢ်ကဝီၤအံၤအဂီၢ်န့ၣ်လီၤ.

ယွၤအပှၤဂီၢ်မုၢ်တဖၣ် တူၢ်ဘၣ် တၢ်တၤအါမးလီၤ. အဝဲသ့ၣ် ဘၣ်တၢ်စိာ်မၢကဲကုၢ်ယံၤဒီး အထံအကီၢ်, ဒီးဘၣ်တၢ်ကွၢ်တလီၤအီၤ ဒ်စ့တၢးအတၢ်သမၢလၢ ကလိၢ်လီၤစ့အဂီၢ်အသိးန့ၣ်လီၤ. ဘၣ်ဆၣ်ပဃုထံၣ်န့ၢ်တၢ်မုၢ်လၢ် သ့ဝဲဒၣ်ဒံးန့ၣ်လီၤ. ဖဲတၢ်စိာ်မၢကဲကုၢ်အကတီၢ်, ယွၤတစူးကွံာ်ညိကွံာ်အပှၤဂီၢ်မုၢ်ဘၣ်အဂ့ၢ်န့ၣ် ဝံယရှါယၤ ဒုးသ့ၣ်နီၣ်ထီၣ်က့ၤ ပှၤအံၣ်စရ့လးဖိတဖၣ်န့ၣ်လီၤ. ယရှါ ၆၁:၁ ပာ်ဖျါဝဲလၢ “ယွၤကဟ့ၣ်လီၤ တၢ်ဃံတၢ်လၤအခိၣ်သလုးလၢဖၣ်ဆါအလီၢ်” န့ၣ်လီၤ. ပှၤဖှီၣ်ဖိယာ်ဖိတဖၣ်ဒၣ်လဲာ်ကဒိးန့ၢ် “တၢ်သးခုအကစီၣ်” န့ၣ်လီၤ. လၢတၢ်သူၣ်ဟးဂီၤသးဟးဂီၤအလီၢ်န့ၣ် ကစၢ်ယွၤအၢၣ်လီၤဝဲဒၣ်လၢ ကဆီတလဲက့ၤ “တၢ်စံးထီၣ်ပတြၢၤအဆ့”န့ၣ်လီၤ. တၢ်အက့ၢ်အဂီၤတဖၣ်ခဲလၢာ်အံၤ လီၣ်ဖျါထီၣ် ယွၤအတၢ်လီၤဘီလီၤမုာ်, ဒီးကဟဲစိာ်န့ၢ် တၢ်သးခုဆူ ပှၤဂီၢ်မုၢ်တဖၣ်အအိၣ်, ဒီးခဲကနံၣ်အံၤ, အဆၢဖိ ၃ (ခ့ခါ) ပာ်ဖျါဝဲ, ပှၤဘၣ်တၢ်စိာ်မၢကဲကုၢ် လၢအသူၣ်အုးသးအုး တဖၣ်အလီၢ်န့ၣ် “အဝဲသ့ၣ်ကလီၤဂာ်ဒီးသ့ၣ်တဖၣ်လၢ ယွၤအကစၢ်ဒၣ်ဝဲသူၣ်လီၤဖျးလီၤဝဲ” န့ၣ်လီၤ.

ယွၤဒုးအိၣ်ထီၣ် တၢ်လီၤဘီလီၤမုၢ်လၢ ဖၣ်ကမုၣ်, ဒီးတၢ်မၤတရီတပါတဖၣ်အကျါ သ့ဝဲလီၤန့ၣ် ခၠူလံးဖီဖိတဖၣ်စ့ၢ်ကီး ပာ်ဖျါထီၣ်ဝဲဒၣ်န့ၣ်လီၤ. ယခိးကွၢ်လၢ် ဖီခၠူးဖိလံး တဖၣ်ကဖီထီၣ် ဖဲတၢ်ကိၢ်ထီၣ်သီအကတီၢ်ကိးကတီၢ်ဒဲး, ဒီးတၢ်အကါဒိၣ်ကတၢၢ်န့ၣ် ကမၤသီထီၣ်တၢ်မုၢ်လၢ် လၢယခိၣ်ယဃၢၤ, ဒီးပပှၤတဝၢအဂၤတဖၣ်န့ၣ်လီၤ.