ယတံၤသကိးလၢခီလ့ၣ်ကၠိ ဘ့ ထိၣ်ဘၢယဲး (Bill Tobias) န့ၣ် မၤတၢ်ဒ်မံးရှၢၣ်နရံၣ်သရၣ်တဂၤအသိး, ဖဲကီးတဘ့ၣ်လၢ ပစံးဖ့း ပီၣ်လဲၣ်မိၢ်ပှၢ် Pacific အပူၤ အါနံၣ်အါလါန့ၣ်လီၤ. အဝဲပာ်ဖျါထီၣ် ပှၤသးစၢ်တဂၤ, ဟးထီၣ်လၢ အအိၣ်ဖျဲၣ်ထီၣ်အဝ့ၢ် ဒ်သိးကဃုန့ၢ် ကျိၣ်စ့အါအါဂီၢ်ဂီၢ်အဂ့ၢ်န့ၣ်လီၤ. ဘၣ်ဆၣ် သးစၢ်ဖိအံၤ အတံၤသကိးတဂၤ လဲၤကိးအီၤဆူတၢ်ဘါသရိာ်, ဒီးဖဲန့ၣ်နၢ်ဟူဘၣ် တၢ်သးခုကစီၣ်လၢကစၢ်ယ့ၣ်ရှူးဟ့ၣ်ဝဲ, ဒီးစူၢ်က့ၤနာ်က့ၤခရံာ် ဒ်တၢ်အုၣ်က့ၤခီၣ်က့ၤကစၢ်တဂၤအသိးန့ၣ်လီၤ.
ပှၤသးစၢ်အံၤ အဲၣ်ဒိးစိာ်တၢ်သးခုကစီၣ်ဆူ အပှၤကလုာ် လၢနာ်တၢ်အူတၢ်သမူ ဒိၣ်ဒိၣ်အါအါတဖၣ်အအိၣ်န့ၣ်လီၤ. လၢတၢ်န့ၣ်အဃိ အဝဲဃု မံးရှၢၣ်နရံၣ်သရၣ်တဂၤ လၢကတုၤဃီၤဆူ ပှၤတဖၣ်အံၤအအိၣ်အဂီၢ်န့ၣ်လီၤ. ဘၣ်ဆၣ် မံးရှၢၣ်နရံၣ် သရၣ်န့ၣ်စံးဘၣ်အီၤလၢ, “ဖဲဒၣ်ကစၢ်မၤနၤန့ၣ်, စံးဘၣ်တဲဘၣ်အဝဲသ့ၣ်တက့ၢ်” (ကွၢ်မၢ်ကူး ၅:၁၉) န့ၣ်လီၤ. ဒ်မံးရှၢၣ်နရံၣ် သရၣ်န့ၣ်စံးဘၣ်အီၤအသိး ပှၤသးစၢ်အံၤမၤဝဲန့ၣ်လီၤ. အဝဲအိၣ်ဖျဲၣ်ထီၣ်အဝ့ၢ်န့ၣ် ပှၤအါဂၤတူၢ်လိာ် ကစၢ်ယ့ၣ်ရှူးဘၣ်ဆၣ်, တၢ်ဆီတလဲအဒိၣ်ကတၢၢ်တမံၤမ့ၢ်ဝဲ ဖဲဝ့ၢ်အဝံတဂၤ, လၢအသမူပယၢ်ယါဘျါတၢ် (witch doctor)န့ၣ် သ့ၣ်ညါနၢ်ပၢၢ်ဝဲ ကစၢ်ခရံာ်န့ၣ် မ့ၢ် “ကျဲ, ဒီးတၢ်မ့ၢ်တၢ်တီ, ဒီးတၢ်မူ” ဒ် ယိၤ ၁၄:၆ ပာ်ဖျါဝဲအသိးန့ၣ်လီၤ. အဝဲစူၢ်က့ၤနာ်က့ၤကစၢ်ယ့ၣ်ရှူးဝံၤ န့ၣ်ဒီး, ဘိးဘၣ်သ့ၣ်ညါ ဝ့ၢ်ဒီတဝ့ၢ်လၢ ကစၢ်ယ့ၣ်ရှူးအဂ့ၢ်န့ၣ်လီၤ. ပှၤသးစၢ်တဂၤ, အတၢ်အုၣ်အသးလၢ လွံၢ်နံၣ်အတီၢ်ပူၤန့ၣ် တုၤဃီၤဆူ တၢ်သူၣ်ထီၣ်တၢ်အိၣ်ဖှိၣ်နွံဖှိၣ် ဖဲလီၢ်ကဝီၤအံၤန့ၣ်လီၤ.
၂ ကရံၣ်သူးအပူၤန့ၣ်, လၢတၢ်ဒုးသ့ၣ်ညါတၢ်သးခုကစီၣ် ဆူပှၤလၢ တသ့ၣ်ညါဒံး ကစၢ်ခရံာ်တဖၣ်အဂီၢ်, စီၤပီလူး ပာ်လီၤဝဲအတၢ်ရဲၣ်တၢ်ကျဲၤဆှဲဆှဲဖိန့ၣ်, လီၤဂာ်လိာ်သးဒီး တၢ်လၢ မံးရှၢၣ်နရံၣ်သရၣ် စံးဘၣ် ပှၤသးစၢ်လၢ အစူၢ်က့ၤနာ်က့ၤ ခရံာ်တဂၤအံၤန့ၣ်လီၤ. ဒ် ၂ ကရံၣ်သူး ၅:၂၀ ပာ်ဖျါဝဲအသိး ပကဘၣ်မ့ၢ် “ကလူးလၢခရံာ်အဂီၢ်,” ပှၤအခၢၣ်စးလၢခရံာ်အဂီၢ်, “ဒ်ယွၤဃ့ကညးတၢ်လၢပစုပူၤအသိး” န့ၣ်လီၤ. ပှၤစူၢ်က့ၤနာ်က့ၤတၢ်ဖိကိးဂၤဒဲး အိၣ်ဒီး အတၢ်တဲပူလီၤဆီဒၣ်ဝဲ, ဒ်အဆၢဖိ ၁၇-၁၈ စံးဘၣ်ပှၤအသိး, ကစၢ်ခရံာ်ဒုးကဲထီၣ် အဝဲသ့ၣ်လၢ “တၢ်ဘၣ်တ့အသီ…. တၢ်မၤဘၣ်လိာ်က့ၤ” ဒီးကစၢ်ယွၤ ဒ်လဲၣ်အဂ့ၢ်န့ၣ်လီၤ. မ်ပကစံးကတိၤပာ်ဖျါ တၢ်လၢယွၤမၤတ့ၢ်တၢ်လၢပဂီၢ် ဆူပှၤဂၤအအိၣ်န့ၣ်တက့ၢ်.
