လၢတၢ်တဲဟ့ၣ်ဒိအဖုၣ် ‘ပိာ်မုၣ်လၢအကူၣ်သ့’ (The Wise Woman) အပူၤန့ၣ်, ကၠီး မဲးဒီၣ်နဲၣ် (George MacDonald) ပာ်ဖျါဝဲ ပူတယုၢ်, ဘၣ်ထွဲဒီး ဖိသၣ်ပိာ်မုၣ်ဖိခံဂၤ , လၢအသ့ၣ်ညါဒၣ်ထဲလၢ အနီၢ်ကစၢ်ဒၣ်ဝဲအဂီၢ်, ဒီးဟဲစိာ်န့ၢ် တၢ်သူၣ်တမုာ်သးတမုာ်လၢပှၤခဲလၢာ်,ဃုာ်ဒီး အဝဲသ့ၣ်အနီၢ်ကစၢ်အဂီၢ်, တုၤပိာ်မုၣ်လၢ အကူၣ်သ့တဂၤ ဒုးလဲၤခီဖျိ အဝဲသ့ၣ် တၢ်မၤကွၢ်တမံၤဘၣ်တမံၤ, ဒ်သိးကမၤစၢၤအဝဲသ့ၣ် ကကဲထီၣ်က့ၤပှၤလၢ “အလီၤအဲၣ်လီၤကွံ” အဂီၢ်န့ၣ်လီၤ.
ဖိသၣ်ပိာ်မုၣ်ဖိတဖၣ် မ့ၢ်တမၤနၢၤဝဲ တၢ်မၤကွၢ် တမံၤဘၣ်တမံၤအဖီခိၣ်န့ၣ်ဒီး, တူၢ်ဘၣ် တၢ်မဲာ်ဆှးဒီးသးအတၢ်အိၣ်သယုၢ်သညိန့ၣ်လီၤ. ပိာ်မုၣ်ဖိခံဂၤအကျါတဂၤ, လၢအမ့ၢ် ရိၣ်စမၢ (Rosamond) န့ၣ်, ဆီတလဲက့ၤအသး အကစၢ်ဒၣ်ဝဲ “တသ့ဘၣ်” န့ၣ် အကတၢၢ်ထံၣ်သ့ၣ်ညါဝဲန့ၣ်လီၤ. အဝဲသံကွၢ် ပိာ်မုၣ်လၢအကူၣ်သ့အံၤ, “နမၤစၢၤယၤကသ့ဧါ” န့ၣ်ဒီးပိာ်မုၣ်န့ၣ် စံးဆၢအီၤ, “မ့ၢ်လၢနဃ့ယၤတၢ်မၤစၢၤအဃိ ယမၤစၢၤနၤကသ့သ့ၣ်သ့ၣ်” န့ၣ်လီၤ. တၢ်မၤစၢၤလၢထး ဟဲခီဖျိပိာ်မုၣ်လၢအကူၣ်သ့တဂၤအံၤအဃိ, ရိၣ်စမၢ စးထီၣ်လဲလိာ်အသး န့ၣ်လီၤ. အဝဲသံကွၢ်ကဒီး ပိာ်မုၣ်လၢ မ့ၢ်အကပျဲပျၢ်ကွံာ် ကယဲၢ်တၢ်လၢအမၤကီမၤခဲတ့ၢ်လံတဖၣ်အဂီၢ်ဧၣ်န့ၣ်လီၤ. ပိာ်မုၣ်န့ၣ်စံးဆၢအီၤလၢ “ယမ့ၢ်တပျဲပျၢ်နမၤကမၣ်ဘၣ်တၢ်န့ၣ်ဒီး, တမ့ၢ်ယကမၤတံာ်တာ်ယသးလၢ ယကသိၣ်ဃီၣ်နၤအဂီၢ်ဘၣ်” န့ၣ်လီၤ.
ယွၤသိၣ်ဃီၣ်ပှၤ အကတီၢ်တဖၣ်အိၣ်ဝဲဒၣ်န့ၣ်လီၤ. တၢ်နၢ်ပၢၢ် ဘၣ်မနုၤအဃိ ကစၢ်ယွၤသိၣ်ဃီၣ်ပှၤလဲၣ်န့ၣ် မ့ၢ်တၢ်အကါဒိၣ်န့ၣ်လီၤ. ယွၤအတၢ်ဘှီလိၤက့ၤတၢ်န့ၣ် တမ့ၢ်အတၢ်စံၣ်ညီၣ်ဃၣ်တၢ်ဘၣ်. မ့မ့ၢ် ဧ့ၤဘြံၤ ၁၂:၆ စံးဘၣ်ပှၤ ဒ်အမ့ၢ်ပၢ်အတၢ်သးအိၣ်လၢ ပတၢ်ဂ့ၤတၢ်ဝါအဂီၢ်န့ၣ်လီၤ. အဆၢဖိ ၁၀-၁၁ ပာ်ဖျါဝဲ ကစၢ်ယွၤအဲၣ်ဒိးစ့ၢ်ကီးလၢပက“န့ၢ်ဘၣ်ဃုာ်အတၢ်စီဆှံ,” ဒီးမုာ်လၤတၢ်တီတၢ်လိၤအတၤသၣ် လၢအဘၣ်ထွဲဒီး “တၢ်မုာ်တၢ်ဖိး”န့ၣ်လီၤ. တၢ်အဲၣ်လီၤက့ၤပသးဒၣ်ဝဲန့ၣ် ဟဲစိာ်န့ၢ် တၢ်သးဘၣ်ဒိဆါ, ဘၣ်ဆၣ် တၢ်စီတၢ်ဆှံ ကမၤလၢမၤပှဲၤပှၤ, ဒုးသူၣ်ခုသးခုပှၤ, ဒီးကမၤလီၤအဲၣ်လီၤကွံပှၤ ဒ်သိးကစၢ်ယွၤန့ၣ်လီၤ.
ရိၣ်စမၢ သံကွၢ် ပိာ်မုၣ်လၢအကူၣ်သ့တဂၤအံၤ, မ့ၢ်အအဲၣ် ပှၤသ့ၣ်ညါဒၣ်ထဲလၢအဂီၢ်
ဒၣ်ဝဲ, ဒ်သိးဒီးအီၤတဂၤသ့ဒ်လဲၣ်န့ၣ်လီၤ. ပိာ်မုၣ်အံၤ သကုးလီၤဒီးနၢမူအီၤ, ဒီးစံးဆၢက့ၤ, “ယသ့ၣ်ညါပာ်လၢ နကကဲထီၣ်နဲဒ်လဲၣ်အဃိ” န့ၣ်လီၤ. ယွၤအတၢ်မၤဘှီဘၣ်က့ၤစ့ၢ်ကီး ဟဲခီဖျိလၢ တၢ်အဲၣ်တၢ်ကွံ, ဒီးအဲၣ်ဒိးဝဲလၢ ပကကဲထီၣ်ပှၤတဖၣ်လၢ တၢ်ပညိၣ်တၢ်တိာ်ပာ်အိၣ်ပာ်လၢပဂီၢ်အသိးန့ၣ်လီၤ.