အဲလဲး(စ) စမီလ့ၤ (Alex Smalley) အဲၣ်ဒိးဝဲပှၤကိးဂၤဒဲး ကမံပၢၢ်ထီၣ်ဂီၤဂီၤ, မ့တမ့ၢ် ကဆိကတီၢ်တၢ်ဖံးတၢ်မၤတစိၢ်ဖိ ဖဲမုၢ်လီၤနုာ် အကတီၢ်န့ၣ်လီၤ. ဘၣ်မနုၤအဃိလဲၣ်. ဒ်သိးလၢ ကခိးကွၢ် မုၢ်ဟဲထီၣ်, ဒီးမုၢ်လီၤနုာ်တဖၣ်အဂီၢ်န့ၣ်လီၤ. စမီလ့ၤ ဒ်အမ့ၢ် ပှၤဃိထံတၢ်လၢကီၢ်ဘြံးတ့ၣ် အတၢ်ဃုထံၣ်သ့ၣ်ညါ မူခိၣ်ကလံၤသီၣ်ဂီၤအခိၣ်တဂၤ အဂီၢ်န့ၣ်, ဆၢကတီၢ်တစိၢ်ဖိတဖၣ်အံၤ မ့ၢ်အကတီၢ်လၢ အဃံလၤဒိၣ်ကတၢၢ်, အလီၤကဟုကညီၢ်ဒိၣ်ကတၢၢ် လၢမုၢ်နံၤတနံၤအဂီၢ်န့ၣ်လီၤ. မုၢ်ဟဲထီၣ် မ့တမ့ၢ် မုၢ်လီၤနုာ်အကတီၢ် လၢအလီၤသးကတုၤ အါန့ၢ် မူကပိာ်လိၤ လါအဲးတဖၣ် မ့တမ့ၢ် တၢ်ကပီၤကပြ့ၢ်ပံာ်လ့လၢမုၢ်နၤ တဖၣ်န့ၣ်, မၤဂ့ၤအါထီၣ် သးအတၢ်အိၣ်အသး (mood), မၤအါထီၣ် သးအတၢ်ဟူးဂဲၤလၢအဂ့ၤတဖၣ် (positive emotions) ဒီးမၤဆံးလီၤစှၤလီၤ သးအတၢ်ဃၢတၢ်စံာ် (stress) သ့ဝဲန့ၣ်လီၤ. စမီလ့ၤ စံးဝဲလၢ “ဖဲနထံၣ် တၢ်လၢအလဲၢ်ဒီးဒိၣ်ဝဲတမံၤမံၤ, မ့တမ့ၢ် တၢ်လၢအဒုးအိၣ်ထီၣ် တၢ်လီၤကမၢကမၣ်တမံၤမံၤန့ၣ်ဒီး, နသးကကလၢၢ်ဘၣ်လၢ တၢ်ကမၤအသးဒ်နတၢ်ဂ့ၢ်ကီတဖၣ်ဆံးလီၤစှၤလီၤဝဲ, ဒီးနတကိၢ်ဂီၤလၢၤဘၣ်တၢ် ကဲာ်ဆိးန့ၣ်လီၤ.”

ဘၣ်ထွဲဒီးတၢ်လီၤလးလၢ စမီလ့ၤ အတၢ်ဃုထံၣ်န့ၢ်တဖၣ်န့ၣ် မ့ၢ်တၢ်ဒုးနၢ်ဟူက့ၤပှၤ ဝံယံးရမံယၤ အတၢ်ကတိၤလၢ ယံး ၃၂:၁၇ အပူၤ, “ကစၢ်ယွၤဧၢ, ကွၢ်ကွၢ်, နတ့လီၤဟီၣ်ခိၣ်ဒီးမူခိၣ် လၢနစိဒိၣ်နကမီၤထီ, ဒီးလၢနစုယူာ်ထီၣ်အသးလီၤ. တၢ်ကီတၢ်ခဲတအိၣ်ဘၣ်ဒီးနၤဘၣ်” န့ၣ်လီၤ.

စီၤပၤစီၤဒၤဝံးစ့ၢ်ကီး ထံၣ်န့ၢ်ကစၢ်ယွၤအတၢ်ဘၣ်တ့, ဒီး ထါစံးထီၣ်ပတြၢၤ ၁၉:၁-၂ အပူၤန့ၣ် စံးဝဲ “မူခိၣ်လီၣ်ဖျါထီၣ်ယွၤအလၤကပီၤ, ဒီးတၢ်လၢအမၤဝဲလၢအစုန့ၣ် မူကပိာ်လိၤ ဒုးနဲၣ်ဝဲလီၤ. မုၢ်တနံၤစံးဘၣ် မုၢ်တနံၤဒၣ် ဒီးမုၢ်တနၤ ဒုးနဲၣ်တၢ်သ့ၣ်ညါလၢ မုၢ်တနၤဒၣ်န့ၣ်လီၤ.” အဆၢဖိ ၆ ပာ်ဖျါဝဲ မုၢ်အဂ့ၢ်, “ဟဲထီၣ်ဝဲလၢမူထံး, ဒီးအတၢ်လဲၤတရံး မ့ၢ်ဆူမူထံးန့ၣ်လီၤ. ဒီးလၢအတၢ်ကိၢ်အမဲာ်ညါန့ၣ်, တၢ်တဘံၣ်ဘၣ် နီတမံၤဘၣ်” န့ၣ်လီၤ. ယွၤအတၢ်ဘၣ်တ့ အဃံအလၤန့ၣ် ဒုးနဲၣ်ဖျါက့ၤပှၤ တၢ်ဘၣ်တ့ သ့တၢ်လၢာ်ကစၢ်တဂၤန့ၣ်လီၤ. တနံၤအံၤ, မ်ပကဟံးန့ၢ်တၢ်ဆၢကတီၢ်, ကွၢ်ထီၣ်ဆူ မူကပိာ်လိၤ လၢတၢ်စံးပတြၢၤမၤလၤကပီၤကစၢ်ယွၤန့ၣ်တက့ၢ်.