‘Rocky’ တၢ်ဂီၢ်မူတဖၣ်န့ၣ် ဒုးနဲၣ်ဝဲ ပှၤထိတၢ်ဖိ (boxer) လၢအတၢ်လဲၤခီဖျိတအိၣ်တဂၤအဂ့ၢ်, ဒီးခီဖျိလၢတၢ်ပာ်လီၤသးကျၢၤမှုဆှုအဃိ မၤနၢၤ တၢ်လၢအဖျါမၤအသးတသ့တဖၣ် ဒ်သိးကကဲထီၣ် ပှၤထိတၢ်စဲၣ်နီၤတဂၤလၢ ပှၤအတယၢၢ်အဃၢကတၢၢ်အတီၤန့ၣ်လီၤ. လၢတၢ်ဂီၤမူ ရီးကံၣ် နီၣ်ဂံၢ်သၢ (Rocky III) အပူၤန့ၣ်, ရီးကံၣ် (Rocky) ကဲထီၣ်လံ ပှၤမံၤဟူသၣ်ဖျါတဂၤ ဒီးဆိကမိၣ်ဒိၣ်လီၤက့ၤ အနီၢ်ကစၢ်ဒၣ်ဝဲ အတၢ်မၤန့ၢ်မၤနၢၤတၢ်တဖၣ်န့ၣ်လီၤ. တၢ်ဒိ ကွဲၤဟူဖျါ တၢ်ဘိးဘၣ်သ့ၣ်ညါတဖၣ် မၤတံာ်တာ် အတၢ်ဂဲၤလိာ် နီၢ်ခိတၢ်ဟူးတၢ်ဂဲၤအကတီၢ်န့ၣ်လီၤ. ပှၤစဲၣ်နီၤတဂၤအံၤ အဂံၢ်ဘါစၢ်လီၤဝဲ, ဒီးဘၣ်တၢ်ထိလီၤဃံၤ မၤနၢၤအီၤလၢ ပှၤတၤတၢ်တဂၤန့ၣ်လီၤ. တၢ်ဂီၤမူအအိၣ်တ့ၢ်တကူာ်န့ၣ် ဘၣ်ထွဲဒီး ရီးကံၣ် အတၢ်ဂုာ်ကျဲးစၢးမၤန့ၢ်က့ၤ အတၢ်တမဲးစု အပတီၢ်အကံၢ်အစီန့ၣ်လီၤ.
လၢသူၣ်ဂ့ၢ်သးကျိၤတကပၤန့ၣ်, ယူဒၤအစီၤပၤ စီၤအၤစါ လီၤမၢ်ကွံာ်ဝဲ တၢ်ဒုး အပတီၢ်ကံၢ်စီန့ၣ်လီၤ. လၢအတၢ်ပၢတၢ်ပြးအခီၣ်ထံး တပတီၢ်, ဖဲတၢ်လီၤပျံၤလီၤဘၣ်ယိၣ်တဖၣ် အကတီၢ်န့ၣ် သန့ၤအသးလၢကစၢ်ယွၤန့ၣ်လီၤ. ဖဲပှၤကူၤရှးဖိလၢအဆူၣ်တဖၣ် ကဟဲဒုးတၢ်အဂီၢ် ကတဲာ်ကတီၤအသးအကတီၢ်န့ၣ်, ၂ ကွဲးနီၣ်တၢ် ၁၄:၁၁ ပာ်ဖျါဝဲလၢ စီၤပၤအၤစါ ဃ့ဘါထုကဖၣ်, “မၤစၢၤပှၤတက့ၢ်. ယွၤပကစၢ်ဧၢ, အဂ့ၢ်ဒ်အံၤ, ပသန့ၤပသးလၢနၤ, ဒီးပလဲၤထီဒါ ပှၤဂီၢ်မုၢ် ဖးဒိၣ်အံၤလၢ နမံၤလီၤ” န့ၣ်လီၤ. အဆၢဖိ ၁၂-၁၅ ပာ်ဖျါဝဲလၢ ယွၤစံးဆၢ အတၢ်ထုကဖၣ်, ဒီးပှၤယူဒၤဖိတဖၣ် မၤနၢၤဝဲတၢ်ဒုး, ဒီးမၤပြံမၤပြါကွံာ် ဒုၣ်ဒါတဖၣ်န့ၣ်လီၤ.
နံၣ်တဖၣ်ပူၤကွံာ်ဝံၤအလီၢ်ခံ, ကီၢ်ယူဒၤဘၣ်တၢ်မၤပျံၤမၤဖုးကဒီးန့ၣ်လီၤ. တဘျီအံၤန့ၣ်, စီၤအၤစါ အသးမံလီၤက့ၤအသးဒၣ်ဝဲ ဒီးတကနၣ်ဃုာ်ယွၤလၢၤဘၣ်. လၢတၢ်န့ၣ်အလီၢ်န့ၣ်, ၂ ကွဲးနီၣ်တၢ် ၁၆:၂-၃ စံးဘၣ်ပှၤ, စီးအၤစါ လဲၤဝဲဆူ ကီၢ်စူၤရံအစီၤပၤ လၢတၢ်မၤစၢၤအဂီၢ်န့ၣ်လီၤ. ဖျါလၢအတၢ်မၤကဲထီၣ်ဘၣ်ဆၣ် ကစၢ်ယွၤတဘၣ်အသးဘၣ်. အဆၢဖိ ၇-၈ န့ၣ်ဝံဃနၤနံ စံးဘၣ် စီၤအၤစါ လၢနဆိကတီၢ်ကွံာ် နတၢ်နာ်သန့ၤသးလၢ ကစၢ်ယွၤလံန့ၣ်လီၤ. ခဲကနံၣ်အံၤ, ဘၣ်မနုၤအဃိ တသန့ၤအသးလၢကစၢ်ယွၤ ဒ်ခါလၢအပူၤကွံာ်အသိးန့ၣ်လဲၣ်.
ပကစၢ်ယွၤန့ၣ် ပနာ်သန့ၤအီၤသ့ဝဲထီဘိန့ၣ်လီၤ. အဆၢဖိ ၉ ပာ်ဖျါဝဲလၢ “ယွၤအမဲာ်ဟးဝ့ၤဝီၤတၢ်လၢ ဟီၣ်ခိၣ်ချၢ ဒီဘ့ၣ်ညါ, ဒ်သိးအကပာ်ဆူၣ်ထီၣ်အသး လၢပှၤအအိၣ်ဒီး အသးဒီဖျၢၣ် ဒီးအီၤတဖၣ်အဂီၢ်” န့ၣ်လီၤ. ဖဲလၢပပၢၤဃာ် ပနီၢ်သးအတၢ်ဂံၢ်ဆူၣ်ဘါဆူၣ်, ဒီးနာ်သန့ၤလီၤသးလၢ ကစၢ်ယွၤလၢာ်လၢာ်ဆ့ဆ့န့ၣ်ဒီး, ပကပလၢၢ်ဘၣ်အစိအကမီၤန့ၣ်လီၤ.
