တၢ်သးကညီၤတၢ်ဧါ, မ့တမ့ၢ် တၢ်ဟ့ၣ်ကၣ်ဧါ. ဖဲ ကဝီၤတၢ်လိာ်ကွဲသတြီၤ ဖျၢၣ်ဒိ (Little League) အကတီၢ်န့ၣ်, ပှၤကွံာ် ဖျၢၣ်ဒိန့ၣ် တလီၤတံၢ်အဃိ, ဟဲဘၣ်ဒိ အဲၣ်စါယၤ (Isaiah) အခိၣ်န့ၣ်လီၤ. အဝဲဖီၣ်အခိၣ်ဒီး လီၤဃံၤဆူ ဟီၣ်ခိၣ်လိၤန့ၣ်လီၤ. မ့ၢ်လၢအဘူၣ်အတီၢ်ဂ့ၤအဃိ, အခိၣ်ကုာ်ကျၤ ဒီတဒၢဃာ်အီၤလၢ တၢ်ဘၣ်ဒိဘၣ်ထံး ဒိၣ်ဒိၣ်မုၢ်မုၢ် န့ၣ်လီၤ. ဖဲတၢ်လိာ်ကွဲ စးထီၣ်ကဒါက့ၤအကတီၢ်န့ၣ်, အဲၣ်စါယၤ ပာ်သူၣ်ပာ်သးဝဲဒၣ်လၢပှၤကွံာ်ဖျၢၣ်ဒိတဂၤန့ၣ် မ့ၢ်လၢမၤကမၣ်ဘၣ်တၢ် လၢတၢ်တဆိကမိၣ်အပူၤအဃိ ပျံၤတၢ်လၢတၢ်ကနိးကစုာ်အပူၤန့ၣ်လီၤ. အကတီၢ်ဖဲန့ၣ်, အဲၣ်စါယၤ မၤတၢ်လၢအလီၤဆီဒိၣ်မးတမံၤ တုၤဒၣ်လဲာ် အတၢ်မၤဆၢက့ၤအတၢ်ဂီၤဂဲၤဒိ (video) န့ၣ် ဘၣ်တၢ်ရၤလီၤသကုၤချ့မးန့ၣ်လီၤ. အဝဲလဲၤဝဲဆူ ပှၤကွံာ်ဖျၢၣ်ဒိတဂၤအံၤအအိၣ်, ဒီးဖိးဟုမၤမုာ်အီၤ, ဒီးဒုးသ့ၣ်ညါမၤလီၤတံၢ်အီၤလၢ တၢ်ခဲလၢာ် ဘၣ်လိာ်ဘၣ်စးဒီးအီၤအဂ့ၢ်န့ၣ်လီၤ.
တၢ်မၤသးတခါ လၢကဒုးအိၣ်ထီၣ် တၢ်အ့ၣ်လိာ်ဆိးက့အလီၢ်န့ၣ်, အဲၣ်စါယၤ ဃုထၢ တၢ်သးကညီၤအတၢ်မၤန့ၣ်လီၤ.
လၢလံာ်စီဆှံအလီၢ်လံၤ တကတြူၢ်အပူၤ, ပကထံၣ်ဘၣ် စီၤဧ့ရှီၤဃုထၢမၤဝဲ တၢ်ဒ်သိးအံၤ, တၢ်လၢအကီဒိၣ်န့ၢ်အန့ၣ်တၢ်တမံၤန့ၣ်လီၤ. စီၤဧ့ရှီၤ ဃုထၢဝဲလၢ ကပာ်တ့ၢ်ကွံာ် အတၢ်ကူၣ်ယံာ်တ့ၢ်မးတမံၤ, လၢကဟ့ၣ်ကၣ်က့ၤ အပုၢ်ပှၤအတဃံာ် စီၤယၤကိာ်လၢ အလီန့ၢ်ဝ့ၤန့ၢ်အီၤတဂၤန့ၣ်လီၤ. ဖဲစီၤယၤကိာ် ဃ့ၢ်ပူၤဖျဲးအသးသမူ, ယံာ်ဝဲ အနံၣ်ခံဆံဝံၤအလီၢ်ခံ, ဟဲက့ၤဆူဟံၣ်န့ၣ်ဒီး, လၢတၢ်ဟ့ၣ်ကၣ် စီၤယၤကိာ် လၢအမၤကမၣ်အီၤအလီၢ်န့ၣ်, စီၤဧ့ရှီၤဃုထၢတၢ်သးကညီၤ, ဒီးတၢ်ပျၢ်တၢ်ကမၣ် အတၢ်မၤန့ၣ်လီၤ. ဖဲစီၤဧ့ရှီၤ ထံၣ် စီၤယၤကိာ်န့ၣ်ဒီး, ၁ မိၤရှ့ ၃၃:၄ ပာ်ဖျါဝဲလၢ “ဃ့ၢ်သဂၢၢ်အီၤ, ဒီးဖိးအီၤ”န့ၣ်လီၤ. စီၤဧ့ရှီၤ တူၢ်လိာ်ဝဲ စီၤယၤကိာ်အတၢ်ဃ့ကညး, ဒီးဒုးသ့ၣ်ညါအပုၢ်လၢ တၢ်ဘၣ်လိာ်ဘၣ်စးဒီးအီၤခဲလၢာ်န့ၣ်လီၤ.
ဖဲပှၤတဂၤဂၤဒုးနဲၣ်ဖျါ တၢ်ပီၢ်ယၢ်လီၤသး လၢအမၤကမၣ်ဘၣ်ပှၤအဃိန့ၣ်ဒီး, ပကဘၣ်ဃုထၢတၢ်တမံၤ, တၢ်မၤတၢ်သးကညီၤအတၢ်မၤ မ့တမ့ၢ် တၢ်ဟ့ၣ်ကၣ်က့ၤတၢ်န့ၣ်လီၤ. ရိမ့ၤ ၅:၈ စံးဘၣ်ပှၤလၢ ပမ့ၢ်ဃုထၢ တၢ်ဖိးဟု ပှၤလၢအမၤကမၣ်ပှၤတဖၣ် လၢတၢ်သးကညီၤအတၢ်မၤအပူၤန့ၣ်ဒီး, မ့ၢ်ပလူၤပိာ်ထွဲ ကစၢ်ယ့ၣ်ရှူးအတၢ်ဟ့ၣ်ဒိ, ဒီးမ့ၢ်ကျိၤကျဲတမံၤ လၢအကမၤဃူမၤဖိးက့ၤတၢ်န့ၣ်လီၤ.
