တၢ်အဲၣ်ဘၣ်ကစၢ်ယွၤ ဒီးပှၤကညီတဖၣ်န့ၣ် မ့ၢ်တၢ်ဂ့ၢ်အခီၣ်ထံးလၢ အမၤဂၢၢ်ကျၢၤ ကဲးသရ့ Kathryn အတၢ်ကွဲးကျိာ်ထံ လံာ်စီဆှံအတၢ်မၤန့ၣ်လီၤ. ပိာ်မုၣ်ပိာ်မၢၤလၢ ကီၢ်အ့ဒံၢ်ယၢၣ်တဖၣ် ဖးဘၣ်လံာ်စီဆှံလၢအကစၢ်အကျိာ်ဒၣ်ဝဲ ဒီးနၢ်ပၢၢ်အါထီၣ် ယွၤအကလုၢ်အကထါအကတီၢ်န့ၣ် အဝဲသူၣ်ခုသးခုဝဲဒၣ်န့ၣ်လီၤ. အဝဲစံးဝဲဒၣ် ဖဲအဝဲသ့ၣ်တဖၣ် နၢ်ပၢၢ်အါထီၣ်အခါ “အဝဲသ့ၣ် စးထီၣ်ကိးပသူထီၣ်လၢ တၢ်သးခု မ့တမ့ၢ် ဒဲဝဲဒၣ်အစုတလီၢ်လီၢ်န့ၣ်လီၤ. အဝဲသ့ၣ်ဖးကစၢ်ယ့ၣ်ရှူးအဂ့ၢ်, ဒီးစံးဝဲ ‘အိ, လီၤလးဒိၣ်မး’” န့ၣ်လီၤ.

ပှၤကဖးဘၣ် လံာ်စီဆှံလၢ အကစၢ်ဒၣ်ဝဲအကျိာ်န့ၣ် ကအါထီၣ်ဝဲအဂီၢ် ကဲးသရ့ ဆၢမုၢ်လၢ်ဝဲဒၣ်န့ၣ်လီၤ. ခီဖျိလၢတၢ်ဆၢန့ၢ်ဘၣ်အံၤန့ၣ်, လၢအသးကံၢ်ပူၤပာ်ဝဲဒၣ်တၢ်မၢဖိစီၤယိၤဟၣ်သးပှၢ် အတၢ်ထံၣ်လၢညါခီလၢ ကီးပးမူးန့ၣ်လီၤ. လီၣ်ဖျါ ၇:၉ ပာ်ဖျါဝဲ ခီဖျိလၢသးစီဆှံန့ၣ်, ယွၤဆှၢနုာ်အီၤဆူ မူခိၣ်အလီၢ်ပစိာ်, ဖဲန့ၣ်ထံၣ်ဘၣ်ဝဲ “ပှၤဂီၢ်မုၢ်ဖးဒိၣ်လၢ ပှၤဂံၢ်ထီၣ်တသ့ဘၣ်နီတဂၤဘၣ်န့ၣ်, ဟဲလၢကယဲၢ်ပှၤကလုာ်, ဒီးကယဲၢ်ပှၤအဒူၣ်, ဒီးကယဲၢ်ပှၤဂီၢ်မုၢ်, ဒီးကယဲၢ်ပှၤကတိၤတၢ်အကျိာ် အကလုာ်ကလုာ်အကျါသ့ၣ်တဖၣ်န့ၣ် ဆၢထၢၣ်လၢ လီၢ်ပစိာ်အမဲာ်ညါဒီး သိဖိအမဲာ်ညါ” န့ၣ်လီၤ. အဝဲသ့ၣ် ဘူၣ်ထီၣ်ဘါထီၣ်ကစၢ်ယွၤ, ဒီးလၢအဆၢဖိ ၁၀ န့ၣ် စံးဝဲ “မ်တၢ်အုၣ်က့ၤခီၣ်က့ၤ အိၣ်ဒီးပကစၢ်…” န့ၣ်လီၤ.

ယွၤပာ်ဖှိၣ်အါထီၣ် ပှၤဂီၢ်မုၢ်လၢ အစံးထီၣ်ပတြၢၤအီၤတဖၣ် အနီၢ်ဂံၢ်ဒိၣ်ဒိၣ်အါအါန့ၣ်လီၤ. တမ့ၢ်ကစၢ်ယွၤစူးကါဝဲထဲ ပှၤကွဲးကျိာ်ထံလံာ်စီဆှံတဖၣ်အတၢ်မၤ, ဒီးပှၤလၢ အဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ်ဧိၤန့ၣ်ဘၣ်, မ့မ့ၢ် လၢတၢ်အဲၣ်အပူၤ ပှၤလၢအစိာ်ခီနီၤလီၤ ကစၢ်ယ့ၣ်ရှူး အတၢ်သးခုကစီၣ်ဆူ ပှၤလၢအဃၢၤတဖၣ်စ့ၢ်ကီးယွၤစူးကါဝဲဒၣ်န့ၣ်လီၤ. တၢ်ဖံးတၢ်မၤလၢအလီၤသးခုတမံၤအံၤအပူၤန့ၣ် ပသူၣ်ဖှံသးညီသ့ဝဲဒၣ်, ဒီးလၢ တၢ်ကမၢကမၣ်အပူၤန့ၣ် ကစၢ်ယွၤကထိၣ်ဂဲၤအါထီၣ်ပှၤဂီၢ်မုၢ် ဒ်သိးကစံးထီၣ်ပတြၢၤ ဃုာ်ဒီးမူခိၣ်ကလူးတဖၣ်, ဒ်အဆၢဖိ ၁၂ ပာ်ဖျါဝဲ “တၢ်စံးထီၣ်ပတြၢၤ, ဒီးတၢ်လၤကပီၤ, ဒီးတၢ်ကူၣ်ဘၣ်ကူၣ်သ့, ဒီးတၢ်စံးထီၣ်ပတြၢၤအဘျုးအဖှိၣ်, ဒီးတၢ်ယူးတၢ်ယီၣ်, ဒီးတၢ်စိတၢ်ကမီၤ, ဒီးတၢ်ဂံၢ်တၢ်ဘါန့ၣ်, မ်အအိၣ်ဒီးပကစၢ်လီၤထူလီၤယိာ်တက့ၢ်” န့ၣ်လီၤ.