ယတၢ်မၤကစၢ် စံးဘၣ်ယၤ “ဖဲဟီၣ်ခိၣ်ဒီဘ့ၣ် တၢ်ဒုးနဲၣ် လံာ်လဲၢ် (international book expo) အဂီၢ် နတၢ်ဖံးတၢ်မၤန့ၣ်, နကဘၣ်ရဲၣ်ကျဲၤရၤလီၤ တၢ်ကစီၣ်ခီဖျိလၢ ကွဲၤလ့လိၤ ဖဲပှၤဒုးနဲၣ်တၢ်အလီၢ်န့ၣ်လီၤ.” တၢ်မၤအံၤ လၢယဂီၢ်မ့ၢ် မူဒါလီၢ်ကဝီၤအသီအဃိ ယပျံၤတၢ်ဘၣ်ယိၣ်တၢ်န့ၣ်လီၤ. ယဃ့ဘါထုကဖၣ် “ယွၤဧၢ, ယတမၤတ့ၢ်တၢ် ဒ်သိးအံၤ နီတဘျီဘၣ်. ဝံသးစူၤ မၤစၢၤယၤတက့ၢ်” န့ၣ်လီၤ.

ယွၤကတဲာ်ကတီၤန့ၢ် တၢ်ဖိတၢ်လံၤဂံၢ်ခီၣ်ထံးတဖၣ်, ဒီးပှၤကဟံးစုနဲၣ်ကျဲယၤတဖၣ်, ခီဖျိပှၤသ့ကွၢ်ထွဲစဲးဖီကဟၣ်တဖၣ်, ဒီးပှၤကကတိၤရၤလီၤတၢ်တဖၣ်, တကးဒံးဘၣ်န့ၣ် ဖဲတၢ်ဒုးနဲၣ်အကတီၢ်, တၢ်မၤသ့ၣ်နီၣ်ထီၣ်က့ၤယၤလၢတၢ်ဂ့ၢ် လၢယလဲၤကပာ်ဘၣ်တဖၣ်န့ၣ်လီၤ. ယမ့ၢ်ကွၢ်ဆိကမိၣ်က့ၤတၢ်န့ၣ်, မ့ၢ်လၢယွၤသ့ၣ်ညါတၢ်လၢအလိၣ်တဖၣ်, ဒီးထိၣ်ဂဲၤထီၣ်ယၤ လၢယကစူးကါ ယတၢ်သ့တၢ်ဘၣ်တဖၣ် လၢအဝဲဟ့ၣ်တ့ၢ်လံယၤ အဃိ ယသ့ၣ်ညါယဲလၢ တၢ်ဘိးဘၣ်ရၤလီၤအတၢ်မၤ လဲၤအသးဂ့ၤဂ့ၤဘၣ်ဘၣ်န့ၣ်လီၤ.

ဖဲကစၢ်ယွၤကိးပှၤ လၢတၢ်မၤတမံၤမံၤအကတီၢ်, ကတဲာ်ကတီၤစ့ၢ်ကီးပှၤလၢတၢ်မၤအံၤအဂီၢ်န့ၣ်လီၤ. ဖဲယွၤဟ့ၣ်မူဟ့ၣ်ဒါ စီၤဘစၤလအ့လး လၢကဘှီထီၣ်ဒဲစီဆှံအကတီၢ်, စီၤဘစၤလအ့လး မ့ၢ်တ့ၢ်လံပှၤစုသ့စဲၣ်နီၤတဂၤန့ၣ်လီၤ. ၂ မိၤရှ့ ၃၁:၃ ပာ်ဖျါဝဲ, ကစၢ်ယွၤကတဲာ်ကတီၤအါထီၣ်အီၤ ခီဖျိတၢ်မၤပှဲၤအီၤလၢ ယွၤအသးဒီးတၢ်ကူၣ်သ့, တၢ်သ့ၣ်ညါ နၢ်ပၢၢ် ကယဲၢ်တၢ်သ့မၤတၢ်လၢစုခဲလၢာ်န့ၣ်လီၤ. အဆၢဖိ ၆ ပာ်ဖျါဝဲ ကစၢ်ယွၤဟ့ၣ်စ့ၢ်ကီး ပှၤမၤစၢၤတၢ် စီၤအၤဟလံအာ်ဃုာ်ဒီးပှၤမၤတၢ်ဖိစဲၣ်နီၤတဖၣ်န့ၣ်လီၤ. ခီဖျိယွၤအတၢ်သ့ ကတဲာ်ကတီၤအဝဲသ့ၣ်န့ၣ်, ပှၤမၤတၢ်ဖိတဖုအံၤ တ့တိာ်ကျဲၤထီၣ်, ဒီးဒုးအိၣ်ထီၣ်ဒဲစီဆှံ, တၢ်ကယၢပိးလီတဖၣ်, ဒီးပှၤလုၢ်တၢ်အခိၣ်တဖၣ် အကူအသိးန့ၣ်လီၤ. အဆၢဖိ ၇-၁၁ စံး၀ဲဒၣ် လၢပှၤအံၣ်စရ့လးဖိ အတၢ်ဘူၣ်ထီၣ်ဘါထီၣ်ယွၤအဂီၢ် တၢ်တဖၣ်အံၤ မ့ၢ်ပိးလီလၢအကါဒိၣ်တဖၣ်, ဒီးအကြၢးဝဲဘၣ်ဝဲန့ၣ်လီၤ.

“ဘစၤလအ့လး” အခီပညီမ့ၢ် “လၢယွၤအကဒု (အတၢ်ဒီတဒၢ)အပူၤ” န့ၣ်လီၤ. ပှၤစုသ့တဂၤအံၤ မၤတၢ်တိာ်ကျဲၤတၢ်မၤ လၢအသးသမူဒီစိၤ, လၢယွၤအတၢ်ဒီတဒၢ, အစိအကမီၤ, ဒီးအတၢ်ကတဲာ်ကတီၤန့ၢ်အီၤတၢ်အဖီလာ်န့ၣ်လီၤ. လၢတၢ်သးဒူအပူၤ, မ်ပကစူၢ်ဒိကနၣ်ယွၤအတၢ်ထိၣ်ဟူးထိၣ်ဂဲၤပှၤ, ဒီးမၤတုၤတၢ်လၢထီၣ်ပှဲၤထီၣ်တစုန့ၣ်တက့ၢ်. ကစၢ်ယွၤသ့ၣ်ညါ ပတၢ်လိၣ်တဖၣ်, ဒီးသ့ၣ်ညါဝဲလၢ ကဘၣ်ဟ့ၣ် တၢ်မနုၤဒီး အဆၢကတီၢ်ဖဲလဲၣ်န့ၣ်လီၤ.