ဖိသၣ်လွံၢ်နံၣ်ဖိ ကဲၣ်ဘ့ (Calvin) အဂီၢ်, ဒ်ညီနုၢ်တၢ်အိၣ်ဆူၣ်အိၣ်ချ့ အတၢ်မၤကွၢ်န့ၣ်, တၢ်အဖိးဖိတဖၣ် လၢတၢ်တမုၢ်လၢ်အပူၤ ဟဲဖျါထီၣ်လၢ အနီၢ်ကစၢ်လိၤန့ၣ်လီၤ. တၢ်လဲၤ ဒုးနဲၣ်သးအကတီၢ်န့ၣ်, ဘၣ်ဆဲးကသံၣ်ဖီၣ်, ဒီးထးဆဲးတၢ်အလီၢ်န့ၣ် တၢ်မၤဘၢအီၤလၢ တၢ်ကံးယာ်ဘူဘူဖိန့ၣ်လီၤ. တုၤဟံၣ်န့ၣ်ဒီး, အကတီၢ်ဘၣ်လၢ ကထုးကွံာ်တၢ်ကျးစဲဘူးအံၤန့ၣ်ဒီး, ကဲၣ်ဘ့ ကအံၣ်ကအုဝဲ လၢတၢ်ပျံၤအပူၤန့ၣ်လီၤ. လၢတၢ်မၤမုာ်အဖိခွါအဂီၢ်, အပၢ်စံးဝဲ, “ကဲၣ်ဘ့ဧၢ, နကဘၣ်ဒိဆါအဂီၢ် ယတမၤတၢ်နီတမံၤန့ၣ် နသ့ၣ်ညါကစီဒီ န့ၣ်လီၤ.” အပၢ်အဲၣ်ဒိးဝဲလၢ အဖိခွါကနာ်န့ၢ်အီၤ ဒိၣ်န့ၢ်အါန့ၢ် အတၢ်ပျံၤလၢ ကထုးကွံာ် တၢ်ကျးစဲဘူးန့ၣ်လီၤ.
တမ့ၢ်ထဲ ဖိသၣ် လွံၢ်နံၣ်ဖိတဖၣ်ဧိၤ အသးအဂံၢ်အဘါစၢ် ဖဲအဘၣ်ကွၢ်ဆၢၣ်မဲာ်ဒီး တၢ်တမုာ်တလၤတဖၣ်န့ၣ်ဘၣ်. တၢ်ကွဲးကါယါဘျါ, တၢ်ဘၣ်အိၣ်လီၤဖးဒီး ပှၤလၢပအဲၣ်တဖၣ်, တၢ်ကွၢ်ဆၢၣ်မဲာ်ဒီး နီၢ်သး (မ့) နီၢ်ခိ တမုာ်တလၤတဖၣ် ဒီးဂုၤဂၤအါမး- ထိၣ်ဟူး ထိၣ်ဂဲၤ ပတၢ်ပျံၤ, ပတၢ်သါသဖှိ, ပတၢ်ဟီၣ်တၢ်ယၢၤ, ဒီးပတၢ်ကအုကစွါတဖၣ်န့ၣ်လီၤ.
စီၤဒၤဝံးအဂီၢ်, အကတီၢ်လၢ အပှဲၤဒီး တၢ်ပျံၤတၢ်ဖုးတဖၣ်အကျါတဘျီန့ၣ်, ဖဲလၢ ဃ့ၢ်ပူၤဖျဲးအသးလၢ စီၤပၤ စီၤစီလူး, လၢအသးက့ၢ်သးကါအီၤ, ဒီးလဲၤတုၤဆူပှၤဖလ့ရှသးတဖၣ် အတၢ်ပၢအဖီလာ်န့ၣ်လီၤ. ဖဲပှၤသ့ၣ်ညါနီၣ်အီၤန့ၣ်ဒီး, စီၤဒၤဝံး ဘၣ်ယိၣ်ဝဲလၢ တၢ်ကမၤအသးဒီးအီၤ မနုၤလဲၣ်န့ၣ်လီၤ (ကွၢ် ၁ ရှမူၤ ၂၁:၁၀-၁၁). အဆၢဖိ ၁၂ ပာ်ဖျါဝဲလၢ စီၤဒၤဝံး “ပျံၤကၤသးအစီၤပၤ စီၤအၤကံၣ် ဒိၣ်မးလီၤ” န့ၣ်လီၤ. ကွၢ်ဆိကမိၣ်က့ၤ တၢ်အိၣ်သးတမုာ်တလၤအံၤန့ၣ်ဒီး, စံး ၅၆:၃-၄ အပူၤန့ၣ် စီၤဒၤဝံးကွဲးဝဲလၢ “မုၢ်နံၤလၢ ယဘၣ်ယိၣ်ဘၣ်ဘီန့ၣ်, ယသန့ၤယသးလၢနၤလီၤ…. ယသန့ၤယသးလၢယွၤ တၢ်လၢ တၢ်ဖံးတၢ်ညၣ်ကမၤယၤန့ၣ် ယတဘၣ်ယိၣ်ဘၣ်” န့ၣ်လီၤ.
ဖဲသးသမူအတၢ်တမုာ်တလၤတဖၣ် ဒုးအိၣ်ထီၣ် ပတၢ်ပျံၤတၢ်ဖုးအကတီၢ် ပကမၤတၢ်မနုၤလဲၣ်. ပနာ်န့ၢ်, သန့ၤပသးလၢ ပပၢ်အိၣ်လၢမူခိၣ်သ့ဝဲန့ၣ်လီၤ.
