လၢ ၁၇၀၁ နံၣ်န့ၣ်, အဲကလံးဖှံထံ တၢ်အိၣ်ဖှိၣ် (the Church of England) စးထီၣ်သူၣ်ထီၣ် ‘တၢ်ရၤလီၤတၢ်သးခုကစီၣ်ကရၢ’ (The Society for the propagation of the Gospel) ဒ်သိး ကဆှၢလီၤ ပှၤစိာ်တၢ်သးခုကစီၣ်တဖၣ် ဆူဟီၣ်ခိၣ်ဒီဘ့ၣ်အဂီၢ်န့ၣ်လီၤ. အဝဲသ့ၣ်ဃုထၢဝဲမီထိၣ် လၢလဲးတ့ၣ် (Latin) ကျိာ် မ့ၢ်ဝဲ “ထရၣ်စံယဲး အၤဒံၣ်ဘၤ နး(စ)” (transiens adiuva nos), ဒီး အခီပညီမ့ၢ် “ဟဲဒီး မၤစၢၤပှၤတက့ၢ်” န့ၣ်လီၤ. လၢနံၣ်ကယၤတၢလံၤလံၤ, တၢ်ကိးဒ်သိးအံၤ မ့ၢ်တ့ၢ်ဝဲ တၢ်ကိးတၢ်သးခုကစီၣ်အကလူးတဖၣ်, ဒ်အမ့ၢ်ပှၤပိာ်ကစၢ်ယ့ၣ်ရှူးအခံတဖၣ် စိာ်ခရံာ်အတၢ်အဲၣ်, ဒီးအတၢ်ပျၢ်တၢ်ဒဲးဘး ဆူဟီၣ်ခိၣ်လၢ အလိၣ်ဘၣ်တၢ်သးခုကစီၣ်အံၤနီၢ်နီၢ်အဂီၢ်န့ၣ်လီၤ.
လံာ်ကျိၤ “ဟဲဒီးမၤစၢၤပှၤတက့ၢ်” အံၤ အိၣ်ဟဲဝဲလၢ “မၤက့းဒနံအတၢ်ကိး” ဖျါဖဲလံာ်မၤတၢ် ၁၆ န့ၣ်လီၤ. မၤတၢ် ၁၆:၈ ပာ်ဖျါဝဲ စီၤပီလူးဒီးအပှၤမၤသကိးတၢ်တဖု လဲၤတုၤဆူ ဝ့ၢ်တြိၤအါလၢ အၤစံပီၣ်လဲၣ်ကၢၢ်နံၤ- လၢမုၢ်နုာ်တကပၤ (မုၢ်မဆါတနံၤအံၤ ကီၢ်ထၢကံၣ်) န့ၣ်လီၤ. အဆၢဖိ ၉ စံးဘၣ်ပှၤ “စီၤပီလူး ထံၣ်တၢ်လၢညါခီ လၢမုၢ်နၤ, ဒီးပှၤမၤက့းဒနံဖိ ဆၢထၢၣ်ဃ့ကညးအီၤ ဒီးစံးဝဲဒၣ်, ‘ဟဲဆူ မၤက့းဒနံ, ဒီးမၤစၢၤပှၤတက့ၢ်’ ” န့ၣ်လီၤ. အဆၢဖိ ၁၀ ပာ်ဖျါဝဲ စီၤပီလူးဒီးအတံၤသကိးတဖၣ် ဒိးန့ၢ်တၢ်ထံၣ်လၢညါခီဝံၤအလီၢ်ခံ, “ဃုလဲၤတၢ်ဆူ မၤက့းဒနံးအပူၤတကီၢ်ခါ” န့ၣ်လီၤ. အဝဲသ့ၣ်နၢ်ပၢၢ်ဝဲလၢ တၢ်ကိးအံၤမ့ၢ် တၢ်လၢအကါဒိၣ်နီၢ်မးတမံၤန့ၣ်လီၤ.
ပှၤကိးဂၤဒဲးန့ၣ် တဘၣ်တၢ်ကိးအီၤလၢ ကဘၣ်လဲၤခီဂာ်ပီၣ်လဲၣ်တဖၣ်ဘၣ်ဆၣ် ခီဖျိလၢ ပတၢ်ထုကဖၣ်, ဒီးပကျိာ်ပစ့တဖၣ်န့ၣ် ပမၤစၢၤဆီၣ်ထွဲ ပှၤလၢအလဲၤတၢ်တဖၣ်သ့ဝဲဒၣ်န့ၣ်လီၤ. ပဝဲကိးဂၤဒဲး ပစံးကတိၤပာ်ဖျါ ခရံာ်အတၢ်သးခုကစီၣ် ဆူပှၤတဂၤဂၤ, လၢဒၢးပူၤမ့ၢ်ဂ့ၤ, လၢကျဲမ့ၢ်ဂ့ၤ, လၢပပှၤတဝၢပူၤမ့ၢ်ဂ့ၤ သ့ဝဲဒၣ်န့ၣ်လီၤ. မ်ပကဃ့ဘါထုကဖၣ်သကိးလၢ ကစၢ်ယွၤအဂ့ၤအဝါတဂၤအံၤ ကဟ့ၣ်ဂံၢ်ဟ့ၣ်ဘါပှၤ ဒ်သိးပကလဲၤခီဂာ်, ဒီးဟ့ၣ်တၢ်မၤစၢၤအဒိၣ်ကတၢၢ်တမံၤ, လၢအမ့ၢ် ခွဲးယာ်လၢ တၢ်ပျၢ်တၢ်ဒဲးဘး ခီဖျိလၢကစၢ်ယ့ၣ်ရှူးအမံၤ, ဆူပှၤဂုၤပှၤဂၤတဖၣ်အအိၣ်န့ၣ်တက့ၢ်.
