ဒ့ဘ့း(David) ဒီး အဲန်ကၠံၢ်(Angie) ကလၢၢ်ဘၣ်ယွၤအတၢ်ကိးလၢ ကလဲၤဆူထံဂၤကီၢ်ဂၤႇ ဒီးတၢ်သးခုကစီၣ် အတၢ်မၤတဖၣ်လဲၤထီၣ်လဲၤထီန့ၣ် ကဲထီၣ်တၢ်မၤဂၢၢ်မၤကျၢၤ အဝဲသ့ၣ်ကလၢၢ်ဘၣ်တၢ်န့ၣ်လီၤ. အဝဲသ့ၣ်ကဘၣ်လဲၤတၢ်န့ၣ်လီၤ. ဘၣ်ဆၣ် လၢတၢ်သုးလီၢ်သုးကျဲအံၤန့ၣ် တၢ်လၢအတဂ့ၤအိၣ်ဝဲတမံၤန့ၣ်လီၤ. ခဲကနံၣ်အံၤႇ ဒ့ဘ့းအမိၢ်သးပှၢ်ပၢ်သးၦၢ်တဖၣ် ကဘၣ်မၤ ခရံာ်အိၣ်ဖျၢၣ် ထဲဒၣ်အဝဲသ့ၣ်န့ၣ်လီၤ.
ဒ်သိးမိၢ်ပၢ်တဖၣ် အတၢ်အိၣ်သယုၢ်သညိလၢ ခရံာ်အိၣ်ဖျၢၣ် အဆၢကတီၢ် ကဆံးလီၤစှၤလီၤအဂီၢ် ဒ့ဘ့း ဒီး အဲန်ကၠံၢ် ဂုာ်ကျဲးစၢးမၤ, ခီဖျိဆှၢလီၤဆိဝဲ ခရံၥ်အိၣ်ဖျဲၣ်တၢ်ဟ့ၣ်, တၢ်ဆၢဂ့ၤတဖၣ် ဒီးဖဲခရံၥ်အိၣ်ဖျဲၣ်အမုၢ်နံၤဂီၤဂီၤန့ၣ်, ကတိၤတၢ်ဒီးအဝဲသ့ၣ်လၢလီတဲစိန့ၣ်လီၤ. ဘၣ်ဆၣ်တၢ်လၢ မိၢ်ပၢ်တဖၣ်လိၣ်ဘၣ်ဝဲန့ၣ် မ့ၢ်ဒၣ်အဝဲသ့ၣ်န့ၣ်လီၤ. ဒ့ဘ့း မၤန့ၢ်အဘူးအလဲန့ၣ် အိၣ်ဒၣ်ထဲ ကက့ၤဟးဆူဟံၣ် ပူၤဘျီပူၤဘျီအဂီၢ်အဃိဒီး, အဝဲသ့ၣ်မၤတၢ်အဂၤမနုၤကသ့ဒံးလဲၣ်. ဒ့ဘ့း လိၣ်ဘၣ်တၢ်ကူၣ်သ့လီၤ.
ကတိၤဒိအဆၢဒိၣ် ၃ မ့ၢ်တၢ်မၤလိဘၣ်ဃးဒီး တၢ်ဃုထံၣ်န့ၢ်တၢ်ကူၣ်သ့ႇ ဒုးနဲၣ်ၦၤလၢ ပကဒိးန့ၢ်တၢ်ကူၣ်သ့အဂီၢ် အဆၢဖိ ၅-၆ ပာ်ဖျါဝဲ ခီဖျိတၢ်ဟ့ၣ်လီၤပတၢ်အိၣ်သးမၤသးတဖၣ်ဆူ ကစၢ်ယွၤအအိၣ်, ဒီးအဆၢဖိ ၃-၄ ဒီး ၇-၁၂ ပၥ်ဖျါထီၣ် တၢ်ကူၣ်သ့အလုၢ်အၦ့ၤတဖၣ်ဒ်အမ့ၢ် တၢ်အဲၣ်တၢ်ကွံႇ ဒီးတၢ်တီတၢ်လိၤ, ဒီးအဆၢဖိ ၁၃-၁၈ ပာ်ဖျါဝဲ တၢ်ကူၣ်သ့အတၢ်ဘျုးတၢ်ဖှိၣ်, ဒ်အမ့ၢ် တၢ်ဃူတၢ်ဖိး, ဒီးသးသမူအတၢ်အိၣ်ကၢအိၣ်ခိးန့ၣ်လီၤ. လၢအဆၢဖိ ၃၂ အပူၤကွဲးနီၣ် အါထီၣ်ဝဲ ကစၢ်ယွၤဟ့ၣ်တၢ်ကူၣ်သ့ဒ်သိးအံၤန့ၣ် ခီဖျိတူၢ်လိာ်ၦၤ “ဆူအတၢ်ရ့လိာ်မုာ်လိၣ်အပူၤ” န့ၣ်လီၤ. ယွၤစံးကသွံတၢ်အစၢတဖၣ်ဆူ ၦၤလၢအရ့လိာ်သးဘူးဘူးတံၢ်တံၢ်ဒီးအီၤတဖၣ်န့ၣ်လီၤ.
ဘၣ်တနၤ, ဖဲဃ့ထုကဖၣ်တၢ် လၢအတၢ်ဂ့ၢ်ကီအဂီၢ်န့ၣ်ဒီး ဒ့ဘ့း အတၢ်ကူၣ်ဟဲအိၣ်ထီၣ် တမံၤန့ၣ်လီၤ. ခရံာ်အိၣ်ဖျဲၣ် အနံၤလၢခံတဘျီန့ၣ်, ဒ့ဘ့းဒီးအဲန်ကၠံၢ် ကူကၤထီၣ်တၢ်အကူအသိးအဂ့ၤတဖၣ်, မၤဃံလၤထီၣ်စီၣ်နီၤခိၣ်လၢ စးခိကတြ့ၣ်ကတြိၣ်တဖၣ်, ဒီးဟဲစိၥ်ထီၣ်ဟါတၢ်အီၣ် တၢ်ညၣ်အကၣ်တဖၣ်န့ၣ်လီၤ. ဒ့ဘ့းအမိၢ်အပၢ်တဖၣ်စ့ၢ်ကီး မၤဝဲတၢ်ဒ်န့ၣ်လီၤ. တၢ်န့ၣ်ဝံၤပၥ်ထီၣ် အလဲးထီးခီၣ်ဖၠူထၢၣ် လၢစီၢ်နီၤခိၣ်လိၤ, ဒီးအဝဲသ့ၣ်အီၣ်သကိးတၢ်ဒ်သိးသိး, ခီဖျိလၢ ထံၣ်လိၥ်ဘၣ်အသး လၢလဲးထီးအမဲၥ်သၣ်လိၤန့ၣ်လီၤ. တၢ်မၤအသး ဒ်အဝဲသ့ၣ်အီၣ်သကိးတၢ် လၢဒၢးတဖျၢၣ်ဃီအပူၤအသိးန့ၣ်လီၤ. စးထီၣ်ဖဲန့ၣ် တၢ်မၤဒ်သိးအံၤန့ၣ် ကဲထီၣ်အဝဲသ့ၣ်ဟံၣ်ဖိဃီဖိ အလုၢ်လၢ်န့ၣ်လီၤ.
ကစၢ်ယွၤတူၢ်လိာ် ဒ့ဘ့း ဆူအတၢ်ရ့လိာ်မုာ်လိာ်အပူၤ, ဒီးဟ့ၣ်လီၤအီၤတၢ်ကူၣ်သ့န့ၣ်လီၤ. လၢပတၢ်ကီတၢ်ခဲတဖၣ်အဂီၢ် ကစၢ်ယွၤအဲၣ်ဒိးစံးဆၢၦၤ ခီဖျိလၢ တၢ်ကတိၤကသွံဒံအပူၤန့ၣ်လီၤ.
