ကီၢ်ဘဟါမၢး(စ) ကလံၤထံး (southern Bahamas) တကပၤန့ၣ် ကီးဖိတဖျၢၣ်, ပှၤကိးအီၤလၢ ရဲးကဲး ကီး (Ragged Island) န့ၣ်လီၤ. နံၣ်ကယၤတဆံခွံအပူၤ, ပှၤထုးထီၣ် အံသၣ် ဖဲကီးအံၤ ဘၣ်ဆၣ် မ့ၢ်လၢတၢ်ဖံးတၢ်မၤဆံးလီၤစှၤလီၤအဃိ, ပှၤအါဂၤ သုးအိၣ်ဆိးက့ၤဆူ ကီးလၢအခိၣ် အဃၢၤတဖၣ်န့ၣ်လီၤ. ဖဲ ၂၀၁၆ နံၣ်န့ၣ်, ပှၤစှၤန့ၢ်အဂၤ ဃိးဆံ အိၣ်ဆိးဖဲကီးအံၤဒီး, တၢ်ဘူၣ် တၢ်ဘါ ကရူၢ်လီၤဆီ အိၣ်ဝဲသၢဖုဘၣ်ဆၣ် ကိးနွံဒဲးပှၤခဲလၢာ် ပာ်ဖှိၣ်လိာ်သးဖဲ တၢ်လီၢ်တတီၤ လၢတၢ်ဘူၣ်ထူဘါယွၤဒီး တၢ်ရ့လိာ်မုာ်လိာ်သးအဂီၢ်န့ၣ်လီၤ. ပှၤအိၣ်ဆိးတၢ်ဖိတဖၣ် စှၤဒိၣ်မး အဃိ, တၢ်အိၣ်မူသကိး ဒ်ပှၤတဝၢအသိးန့ၣ် မ့ၢ်တၢ်အကါဒိၣ်လီၤဆီလၢအဝဲသ့ၣ်အဂီၢ်န့ၣ်လီၤ.
လၢသီတၢ်အိၣ်ဖှိၣ်တဖၣ်အဂီၢ်စ့ၢ်ကီး ပှၤတဝၢအတၢ်ပာ်သူၣ်ပာ်သးန့ၣ် မ့ၢ်တၢ်လိၣ်တမံၤ လၢအကါဒိၣ်မး, ဒီးဆၢဒိးန့ၢ်ဘၣ်ဝဲဒၣ်န့ၣ်လီၤ. အဝဲသ့ၣ်အသူၣ်ပိၢ်သးဝး လၢတၢ်စူၢ်တၢ်နာ်အသီ လၢအထံၣ်န့ၢ်ဝဲ ခီဖျိလၢကစၢ်ယ့ၣ်ရှူးအတၢ်သံဒီး အတၢ်ဂဲၤဆၢထၢၣ်သမူထီၣ်က့ၤအပူၤန့ၣ်လီၤ. ဘၣ်ဆၣ် အဝဲသ့ၣ်သ့ၣ်ညါစ့ၢ်ကီးလၢ ကစၢ်န့ၣ်တအိၣ်လၢအဝဲသ့ၣ်အသိးအကျါ လၢနီၢ်ခိ နီၢ်ကစၢ်လၢၤဘၣ်အဃိ အဝဲသ့ၣ်သ့ၣ်ညါလၢ အလိၣ်ဘၣ်လိာ်သးတဂၤဒီးတဂၤန့ၣ်လီၤ. ဒ် မၤတၢ် ၂:၄၂ ပာ်ဖျါဝဲအသိး, အဝဲသ့ၣ်ဟံးန့ၢ်တၢ်ဆၢကတီၢ်လၢ တၢ်မၢဖိတဖၣ် အတၢ်သိၣ်လိသီလိ, တၢ်ရ့လိာ်မုာ်လိာ်သး, ဒီးတၢ်ဟံးန့ၢ်သကိး တၢ်သ့ၣ်နီၣ်ဘူၣ်စီဆှံအဂီၢ်န့ၣ်လီၤ. အဝဲသ့ၣ် ပာ်ဖှိၣ် အသးလၢဟံၣ်တဖၣ် လၢတၢ်ဘူၣ်ထီၣ်ဘါထီၣ်တၢ်အဂီၢ် ဒီးတၢ်အီၣ်သကိးအီသကိးတၢ်ဒီး တၢ်အံးထွဲကွၢ်ထွဲ ပှၤဂၤအတၢ်လိၣ်တဖၣ်န့ၣ်လီၤ. မၤတၢ် ၄:၃၂ ပာ်ဖျါထီၣ် တၢ်အိၣ်ဖှိၣ်ဒ်အမ့ၢ် “ပှၤဂီၢ်မုၢ်လၢအစူၢ်က့ၤနာ်က့ၤတဖၣ်န့ၣ်, အိၣ်ဒီး အသူၣ်တဖျၢၣ်ဃီအသးတဖျၢၣ်ဃီ” န့ၣ်လီၤ. အဝဲသ့ၣ်တဖၣ်န့ၣ် အိၣ်ပှဲၤဝဲဒီးသးစီဆှံ, ဒီးစံးထီၣ်ပတြၢၤကစၢ်ယွၤတဘိယူၢ်ဃီ, ဒီးဟဲစိာ် တၢ်အိၣ်ဖှိၣ် အတၢ်လိၣ်တဖၣ် ဆူယွၤအအိၣ်ခီဖျိလၢတၢ်ထုကဖၣ်န့ၣ်လီၤ.
ပှၤတဝၢမ့ၢ် တၢ်အကါဒိၣ်သပှၢ်တၢၢ်, လၢပတၢ်ဒိၣ်ထီၣ်, ဒီးတၢ်ဆီၣ်ထွဲမၤစၢၤတၢ်အဂီၢ် န့ၣ်လီၤ. တဘၣ်ကျဲးစၢးအိၣ်မူအိၣ်ဂဲၤဒၣ်ထဲဒၣ်နၤတဂၤဧိၤတဂ့ၤ. ဖဲလၢနနီၤဟ့ၣ် နတၢ်ဂဲၤလိာ်, ဒီးတၢ်သးခုတဖၣ်ဆူ ပှၤဂုၤပှၤဂၤ, ဒီးသုးဘူးသကိးဆူ ယွၤအအိၣ်န့ၣ်ဒီး, ကစၢ်ယွၤကမၤဒိၣ်ထီၣ် အါထီၣ် သးအတၢ်သ့ၣ်ညါလၢအဘၣ်ထွဲဒီးပှၤတဝၢဖိန့ၣ်လီၤ.
