ပှၤတဂၤလၢ ပသ့ၣ်ညါအီၤ ဒ်ပှၤစီဆှံ နံးခလး(စ) (Saint Nicholas) န့ၣ် ဖဲခရံာ်နံၣ် ၂၇၀ အကပိာ်အကပၤန့ၣ် အိၣ်ဖျဲၣ်ထီၣ် လၢဟ့းလ့ၣ်ပှၤကဲဒိၣ်အဒူၣ်ဖိထၢဖိန့ၣ်လီၤ. တၢ်လၢအလီၤသးအုးန့ၣ် အမိၢ်အပၢ်သံသဒၣ်အီၤ ဖဲအဝဲမ့ၢ် ဖိသၣ်ဖိတဂၤအကတီၢ်အဃိ, အဝဲဘၣ်အိၣ်ဒီး အဖါတံၢ် လၢအအဲၣ်ဘၣ်အီၤ ဒီးသိၣ်လိနဲၣ်လိအီၤလၢ ကပိာ်ယွၤအခံန့ၣ်လီၤ. ဖဲနံးခလး(စ) မ့ၢ် ပှၤသးစၢ်တဂၤအကတီၢ်န့ၣ်, တၢ်စံၣ်ဃဲၤပာ်ဖျါဝဲဒၣ်လၢ အဝဲနၢ်ဟူဘၣ် ပှၤဒီပုၢ်ဝဲၢ်မုၣ်သၢဂၤ တယံာ်ဘၣ်န့ၣ် ကဖှီၣ်လီၤယာ်လီၤအဃိ, ကဖျီအသးန့ၣ်, ကဘၣ်ဟ့ၣ်တလးမူးပိာ်ခွါအဂီၢ် ကျိာ်စ့တအိၣ်အဂ့ၢ်န့ၣ်လီၤ. မ့ၢ်လၢအဲၣ်ဒိးအိၣ်မူမၤထွဲ ကစၢ်ယ့ၣ်ရှူး သိၣ်လိတၢ်ဘၣ်ဃးဒီး တၢ်ဟ့ၣ်မၤစၢၤ ပှၤလၢအလိၣ်ဘၣ်တၢ်တဖၣ်အဂီၢ်အဃိ, အဝဲဟံးန့ၢ် အတၢ်န့ၢ်သါ ဒီးဟ့ၣ်လီၤ ထူဘ့ၣ်ကျိာ်စ့ တဂၤတထၢၣ်စုာ်စုာ် ဆူပှၤဒီပုၢ်ဝဲၢ်မုၢ်တဖၣ်န့ၣ်လီၤ. လၢအနံၣ်တဖၣ်အပူၤ, အဝဲဟ့ၣ်လီၤကွံာ် ကျိာ်စ့အိၣ်တ့ၢ်တဖၣ် ခီဖျိတၢ်ဒုးအီၣ်ဒုးအီ ပှၤဖှီၣ်ဖိယာ်ဖိတဖၣ်, ဒီးတၢ်အံးထွဲကွၢ်ထွဲ ပှၤဂၤတဖၣ်အဂီၢ်န့ၣ်လီၤ. နံၣ်ကယၤတဖၣ် လဲၤပူၤကွံာ်ဝံၤ, နံခလၢး(စ) န့ၣ် ဘၣ်တၢ်မၤလၤကပီၤအီၤ လၢအဟ့ၣ်တၢ်အါအါဂီၢ်ဂီၢ်အဃိ, ဒီးလၢတၢ်ထိၣ်ဂဲၤပှၤအသးအဂီၢ် အဝဲဒုးအိၣ်ထီၣ်ပှၤတဂၤဒီး, ပသ့ၣ်ညါအီၤ ဒ်အမ့ၢ် စဲထၢၣ်ခလီး(စ) (Santa Claus) န့ၣ်လီၤ.
ခရံာ်အိၣ်ဖျဲၣ်အကတီၢ် တၢ်ကတြ့ၣ်ကတြီၣ် လၢအဖျါထဲခိတဖၣ်, ဒီးတၢ်ဟူထီၣ်သါလီၤတဖၣ်န့ၣ် ကကဲထီၣ်တၢ်ဘၣ်ယိၣ်လၢ, တၢ်မၤလၤကပီၤ ခရံာ်အိၣ်ဖျဲၣ်သ့ၣ်သ့ၣ်ဘၣ်ဆၣ်, မ့မ့ၢ် တၢ်ဟ့ၣ်လီၤ တၢ်အလုၢ်အလၢ်န့ၣ်, ဘၣ်ထွဲလိာ်သးဒီး နံခလၢး(စ) န့ၣ်လီၤ. အဝဲအတၢ်သးအိၣ်ဟ့ၣ်တၢ်န့ၣ် အိၣ်သူၣ်လီၤအသးလၢ တၢ်အဲၣ်ကစၢ်ယ့ၣ်ရှူးန့ၣ်လီၤ. နံခလၢး(စ) သ့ၣ်ညါဝဲလၢ ခရံာ်ဟဲစိာ်န့ၢ် တၢ်ဟ့ၣ်အဒိၣ်ကတၢၢ်, လၢအမ့ၢ်ယွၤ, ဒီးဒုးနဲၣ်ဖျါ တၢ်သူၣ်အိၣ်သးအိၣ်အတၢ်ဟ့ၣ် လၢပကွၢ်ဆိကမိၣ်တထီၣ်ဘးတၢ်တမံၤန့ၣ်လီၤ. မး ၁:၂၃ စံးဝဲ ကစၢ်ယ့ၣ်ရှူးမ့ၢ် “ယွၤအိၣ်ဒီးပှၤ” န့ၣ်လီၤ. ဒီးအဝဲဟဲစိာ်န့ၢ်ပှၤ တၢ်မူအတၢ်ဟ့ၣ်န့ၣ်လီၤ. ဟီၣ်ခိၣ်လၢအမ့ၢ်တၢ်သံအလီၢ်အကျဲန့ၣ်, အဆၢဖိ ၂၁ ပာ်ဖျါထီၣ် “အဝဲဒၣ်ကအုၣ်က့ၤခီၣ်က့ၤ အပှၤဂီၢ်မုၢ်လၢအတၢ်ဒဲးဘးလီၤ” န့ၣ်လီၤ.
ဖဲပစူၢ်နာ်ကစၢ်ယ့ၣ်ရှူးန့ၣ်, တၢ်သးအိၣ်ဟ့ၣ်လီၤသးန့ၣ် အိၣ်ထီၣ်ဝဲန့ၣ်လီၤ. ပမၤလၢပှဲၤ ပှၤဂၤအတၢ်လိၣ်တဖၣ်ဒီး, ဒ်ယွၤဟ့ၣ်ပှၤအသိး, ပဟ့ၣ်ပှၤဂၤ လၢတၢ်သးခုအပူၤန့ၣ်လီၤ. တၢ်အံၤမ့ၢ် ပှၤစီဆှံ နံး(ခ) (Saint Nick) အပူ, ဘၣ်ဆၣ်အါန့ၢ်အန့ၣ်, မ့ၢ်ဒၣ်ကစၢ်ယွၤအပူန့ၣ်လီၤ.
