Kyle(ခဲ(လ)) ဒီး Allison(အဲလံၣ်စၢၣ်) လဲၤဝဲ ၦၤထီၣ်ၦၢ်သီအတၢ်ဟးမုၥ်ကသုၣ်လၢ အမုၥ်ဒိၣ်မး ဆူတခီထံတခီကီၢ်န့ၣ်လီၤ. နၥ်သက့ ဖဲအဟဲက့ၤတုၤဆူဟံၣ်အလီၢ်ခံန့ၣ်, အဝဲသ့ၣ်ထံၣ်လၢ တၢ်သးလီၤဆီလၢ အတညီနုၢ်တခါ အိၣ်ထီၣ်ဝဲလၢ Kyle အခီၣ်လိၤန့ၣ်လီၤ. နီၢ်ဒီမါဝၤခံဂၤအံၤ ဘၣ်တၢ်နဲၣ်အီၤဆူ ကသံၣ်သရၣ်စဲၣ်နီၤ ဘၣ်ဃးဒီးတၢ်ဘၣ်ကူ ဘၣ်ဂၥ်တၢ်ဆါတဂၤအအိၣ်လီၤ. ကသံၣ်သရၣ်တဲသ့ၣ်ညါဘၣ် အဝဲသ့ၣ်လၢ တၢ်ဖိဃၢ်ဆံးဆံးလၢ အမူလၢတၢ်ဂၤအလိၤန့ၣ် ခူၣ်လီၤတၢ်အကျိၤဒီး နုၥ်လီၤဆူ Kyle အခီၣ်လၣ်အပူၤ ခီဖျိတၢ်ကဖိထံတဖၣ်လၢ အအိၣ်ထီၣ်လၢ အခီၣ်ဖံးတြံၥ်ခီၣ်အသီအဃိန့ၣ်လီၤ. တၢ်လၢအစးထီၣ် ဒ်တၢ်ဟးကသုၣ်ကသီမုၥ်လၤတခါ ကတၢၢ်ဝဲဒီး တၢ်ဒုးလိၥ်ယၤလိၥ်သးဒီး “ၦၤတမှံၤတဖၣ်” လၢတၢ်တအဲၣ်ဒိးအီၤတဖၣ် လၢအကီခဲတမံၤန့ၣ်လီၤ.

စီၤဒၤဝံး သ့ၣ်ညါလၢ အဝဲမ့ၢ်တဃ့တၢ်မၤစၢၤလၢယွၤ ဒ်သိးကဒုးတၢ်ဒဲးဘး အဂီၢ်ဘၣ်န့ၣ်, အတၢ်ဆၢအိၣ်မူလၢ အလီၤဘၣ်သူၣ်ဘၣ်သးလၢ ယွၤအမဲၥ်ညါအဂီၢ်န့ၣ် ကကဲထီၣ် တၢ်ဒုးလိၥ်သးဒီးၦၤတမှံၤလၢ တၢ်တအဲၣ်ဒိးအီၤလၢ အမ့ၢ်တၢ်ဒဲးဘးဒီး တၢ်ပူထီၣ်လီထီၣ်န့ၣ်လီၤ. စီၤဒၤဝံး ဘိးဘၣ်သ့ၣ်ညါဝဲ ယွၤဘၣ်တၢ်လီၣ်ဖျါထီၣ်လၢ န့ဆၢၣ်အကျါ (စံး ၁၉:၁-၆) ဒီးအတၢ်ကူၣ်သ့ဘၣ်တၢ်ထံၣ်န့ၢ်အီၤလၢ အတၢ်သိၣ်တၢ်သီအပူၤ (:၇-၁၀). ဒ်လဲၣ်ဝံၤအလီၢ်ခံ, အဝဲဃ့ယွၤလၢ အကဒီသဒၢအီၤလၢတၢ် တဒိကနၣ်ယွၤလၢ တၢ်တပၥ်သူၣ်ပၥ်သး, လၢတၢ်ပၥ်ထီၣ်ထီသး ဒီးလၢအပညိၣ် မၤအီၤအပူၤန့ၣ်လီၤ. အဝဲကွဲးဝဲ “မၤကဆှီယၤလၢ တၢ်ကမၣ်ခူသူၣ်န့ၣ်တက့ၢ်. တြီဃၥ်စ့ၢ်ကီး နခ့နၦၤလၢ တၢ်ကမၣ်အဒူတက့ၢ်” (:၁၂-၁၃). အဝဲသ့ၣ်ညါနီၣ်ဝဲ လၢအတအိၣ်ဒီး ၦၤကညီအဂံၢ်အဘါ, အတၢ်သ့တၢ်ဘၣ်, အတၢ်ကူၣ်တၢ်ဆးတဖၣ် ဒ်သိးတၢ်ဒဲးဘးအတၢ်ဆါ အသုတဘၣ်ကူဘၣ်ဂၥ်အီၤတဂ့ၤန့ၣ်လီၤ. အဃိလၢတၢ်ကူၣ်သ့အပူၤ, အဝဲဃ့တၢ်မၤစၢၤလၢယွၤန့ၣ်လီၤ.

ဒ်သိး ပတၢ်ဆၢအိၣ်မူလၢ တၢ်မၤလၤကပီၤယွၤအံၤ အသုတဘၣ် တၢ်ဂုၥ်ကွံၥ်န့ၢ်အီၤလၢ တၢ်ဒဲးဘးတဂ့ၤအဂီၢ် ပမၤလီၤတံၢ်တၢ်ကသ့ဒ်လဲၣ်. မ်ပကကွၢ်ဃီၤယွၤတထံၣ်ဃီ, အၢၣ်လီၤဒီးပီၢ်ယၢ်လီၤက့ၤပသးလၢ ပတၢ်ဒဲးဘး, ဒီးဃုယွၤ အတၢ်မၤစၢၤ ဒ်သိးပတြီဃၥ်သူၣ်သးတၢ်ဖိဃၢ်လၢ ပတအဲၣ်ဒိးအီၤတဖၣ် ဟဲနုၥ်အိၣ်ဆိးလၢပပူၤ အသုတသ့အဂီၢ်တက့ၢ်.